കൊളുക്കുമല വീണ്ടും തുറന്നു; തണുത്തുറഞ്ഞ പുലരികൾ ആസ്വദിക്കാൻ സഞ്ചാരികൾ എത്തിത്തുടങ്ങി

ഇടുക്കി: തണുത്തുറഞ്ഞ പുലരികൾ ആസ്വദിക്കാൻ കൊളുക്കുമലയിലേക്ക്​ സഞ്ചാരികൾ എത്തിത്തുടങ്ങി. എട്ടു മാസങ്ങൾക്കുശേഷം ഞായറാഴ്​ച മുതൽ കൊളുക്കുമലയിലേക്ക്​ സഞ്ചാരികൾക്ക്​ പ്രവേശനം അനുവദിച്ചു.

കോവിഡ് വ്യാപനത്തെത്തുടർന്ന്​ മാർച്ച് 30നാണ്​ ജില്ല ഭരണകൂടം കൊളുക്കുമല ട്രക്കിങ് വിലക്കിയത്. അതിനുശേഷം ഇവിടം ആളനക്കമില്ലാതെ കിടക്കുകയായിരുന്നു. നവംബർ ഒന്നിന്​ ജില്ലയിലെ മറ്റു വിനോദസഞ്ചാര കേന്ദ്രങ്ങളിൽ സന്ദർശകരെ പ്രവേശിപ്പിച്ച്​ തുടങ്ങിയെങ്കിലും കൊളുക്കുമല ട്രക്കിങ് പിന്നെയും വൈകി.

ഇവിടെ ട്രക്കിങ് പുനരാരംഭിക്കാൻ നടപടി സ്വീകരിക്കണമെന്നാവശ്യപ്പെട്ട് കഴിഞ്ഞദിവസം ചിന്നക്കനാലിലെ ജീപ്പ് ഡ്രൈവർമാർ പഞ്ചായത്ത് ഓഫിസിന്​ മുന്നിൽ പ്രതിഷേധിച്ചിരുന്നു. ദേവികുളം സബ്​കലക്​ടറുടെ നേതൃത്വത്തിൽ ചർച്ച നടത്തിണ്​ ട്രക്കിങ് പുനരാരംഭിച്ചത്.

മൂന്നാറിൽനിന്ന്​ 50 കിലോമീറ്റർ ദൂരമുണ്ട്​ കൊളുക്കുമലയിലേക്ക്​. കേരള-തമിഴ്നാട് അതിർത്തിയിലാണ്​ ഇൗ പ്രദേശം. റോഡ്​ മോ​ശമായതിനാൽ ചിന്നക്കനാലിൽനിന്ന്​ ജീപ്പ് സർവിസിൽ പോകുന്നതാണ്​ ഉത്തമം. സമുദ്രനിരപ്പിൽനിന്ന്​ 7130 അടി മുകളിലാണ് കൊളുക്കുമല സ്ഥിതി ചെയ്യുന്നത്. ലോകത്തിലെ ഏറ്റവും ഉയരത്തിലുള്ള ടീ ഫാക്ടറി സ്​ഥിതി ചെയ്യുന്നതും ഈ ഭാഗത്താണ്​. 1900കളുടെ തുടക്കത്തിൽ ഒരു സ്കോട്ടിഷ് തോട്ടക്കാരനാണ് കൊളുക്കുമല ടീ എസ്​റ്റേറ്റ് ആരംഭിച്ചത്.