ഗ്ലാസ്ഗോ: ആഗോള താപനം കുറക്കാനുള്ള നടപടികൾ ചർച്ച ചെയ്യുന്നതിനായി സ്കോട്ലൻഡിൽ നടന്ന ആഗോള കാലാവസ്ഥ ഉച്ചകോടിയിൽ പങ്കെടുത്ത് മടങ്ങിയ പ്രധാന മന്ത്രിക്ക് ഇന്ത്യൻ സമൂഹം ഗംഭീര യാത്രായയപ്പ് നൽകി.
സ്കോട്ലൻഡിലെ ഇന്ത്യൻ സമൂഹത്തോട് സംവദിച്ച മോദി ചെണ്ട കൊട്ടുന്ന ദൃശ്യങ്ങൾ വൈറലായി മാറി. പ്രധാനമന്ത്രി മോദിയെ യാത്രയാക്കാനായി ചെണ്ടമേളവും ആർപ്പുവിളികളുമായി വലിയ ജനക്കൂട്ടം ഗ്ലാസ്ഗോയിൽ ഒത്തുചേർന്നിരുന്നു. ചിലർ പരമ്പരാഗത ഇന്ത്യൻ വസ്ത്രങ്ങളും തലപ്പാവും ധരിച്ചാണെത്തിയത്.
ഇന്ത്യൻ സമൂഹത്തെ അഭിവാദ്യം ചെയ്ത മോദി ചെണ്ട കൊട്ടിക്കൊണ്ട് ആഘോഷങ്ങളിൽ പങ്കുചേർന്നു. കുടുംബാംഗങ്ങളോട് സംവദിച്ച മോദി സംഘത്തിലെ കുഞ്ഞുങ്ങളെ തലോടി.
ആഗോള കാലാവസ്ഥ ഉച്ചകോടിക്കായി രണ്ടുദിവസമായി മോദി ഗ്ലാസ്ഗോയിലായിരുന്നു. ജി20 ഉച്ചകോടിക്കായി റോമിലെത്തിയ മോദി ഫ്രാൻസിസ് മാർപ്പാപ്പയെ സന്ദർശിച്ചിരുന്നു. മാർപ്പാപ്പയെ ഇന്ത്യയിലേക്ക് ക്ഷണിച്ചാണ് മോദി വത്തിക്കാനിൽ നിന്ന് മടങ്ങിയത്.
കാലാവസ്ഥ ഉച്ചകോടിക്കിടെ നരേന്ദ്രമോദിയും ബ്രിട്ടീഷ് പ്രധാനമന്ത്രി ബോറിസ് ജോൺസണും വ്യക്തിപരമായി കൂടിക്കാഴ്ച നടത്തിയിരുന്നു. പാരിസ്ഥിതിക സംരക്ഷണം, നൂതന സാങ്കേതിക വിദ്യകൾ, സാമ്പത്തികം, പ്രതിരോധം തുടങ്ങിയവ സംബന്ധിച്ചെല്ലാം ഇരുവരും ചർച്ച നടത്തി.
ഈ വർഷത്തെ ഇന്ത്യൻ റിപ്പബ്ലിക് പരേഡിൽ മുഖ്യാതിഥിയായി പങ്കെടുക്കാൻ ബ്രിട്ടീഷ് പ്രധാനമന്ത്രിയെ ക്ഷണിച്ചിരുന്നെങ്കിലും കോവിഡ് വ്യാപകമായ സാഹചര്യത്തിൽ ആ സന്ദർശനം ഒഴിവാക്കുകയായിരുന്നു. ബോറിസ് ജോൺസന്‍റെ ഇന്ത്യൻ സന്ദർശനം മുടങ്ങിയതിന് ശേഷം ഇരുവരും തമ്മിലുള്ള ആദ്യ കൂടിക്കാഴ്ചയായിരുന്നു ഗ്ലാസ്ഗോവിൽ നടന്നത്.
കാലാവസ്ഥാ വ്യതിയാനങ്ങളെ കുറക്കാനുള്ള സഹകരണം ഉൾപ്പടെ പ്രധാന വിഷങ്ങളിൽ ഇരുവരും ചർച്ച നടത്തി. ഈ ചർച്ചക്കിടെയാണ് പ്രധാനമന്ത്രി നരേന്ദ്രമോദി, ബോറിസ് ജോൺസണിനെ ഇന്ത്യൻ സന്ദർശനത്തിനായി ക്ഷണിച്ചതെന്ന് ഔദ്യോഗിക പ്രസ്ഥാവനയിൽ പറഞ്ഞു.
കാലാവസ്ഥാ മാറ്റങ്ങളെ തടയാനടക്കമുള്ള കാര്യങ്ങൾക്ക് തയാറാക്കിയ ധാരണകൾ നടപ്പാക്കാൻ ഇരു രാജ്യങ്ങളും പ്രതിജ്ഞാബന്ധമാണെന്ന് യുകെയിലെ ഇന്ത്യൻ ഹൈകമ്മീഷ്ണർ ഗൈത്രി ഇസാർ കുമാർ പറഞ്ഞു. 'ഞങ്ങൾ 2022 മാർച്ചിൽ ഒപ്പുവെയ്ക്കുന്ന ഇടക്കാല കരാറിനു വേണ്ടി 2021 നവംബറിൽ ചർച്ച തുടങ്ങുകയാണ്, ഷെഡ്യൂൾ അനുസരിച്ചാണ് കാര്യങ്ങൾ നടക്കുന്നതെങ്കിൽ 2022 നവംബറിൽ കരാർ ഒപ്പുവെക്കാനാകും.' -ഗൈത്രി ഇസാർ കുമാർ പറഞ്ഞു.
ഉച്ചകോടി വിജയകരമായി നടത്തിയതിനും, കാലാവസ്ഥാ വ്യതിയാനങ്ങളെ ലഘൂകരിക്കുന്നതിനുള്ള ശ്രമങ്ങൾക്കും പ്രധാനമന്ത്രി നരേന്ദ്രമോദി ബോറിസ് ജോൺസണെ അഭിനന്ദിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.