ഇബ്രാഹിം റഈസിയുടെ ഹെലികോപ്റ്റർ തകർന്നതിന് കാരണം കനത്ത മൂടൽമഞ്ഞ്; അന്തിമ അന്വേഷണ റിപ്പോർട്ടുമായി ഇറാൻ

തെഹ്‌റാൻ: പ്രസിഡന്‍റായിരുന്ന ഇബ്രാഹിം റഈസിയുടെയും സംഘത്തിന്റെയും മരണത്തിനിടയാക്കിയ ഹെലികോപ്ടർ അപകടത്തെ കുറിച്ചുള്ള അന്തിമ അന്വേഷണ റിപ്പോർട്ട് പുറത്തുവിട്ട് ഇറാൻ ഭരണകൂടം. സങ്കീർണമായ കാലാവസ്ഥയാണ് ഹെലികോപ്ടർ അപകടത്തിന്റെ പ്രാഥമിക കാരണമായി ഇറാൻ സൈന്യം ചുമതലപ്പെടുത്തിയ ഉന്നതസമിതി ചൂണ്ടിക്കാട്ടുന്നത്.

അസർബൈജാൻ അതിർത്തി മേഖലക്കടുത്തുള്ള പർവതപ്രദേശത്തെ കനത്ത മൂടൽമഞ്ഞ് ആണ് അപകടത്തിലേക്ക് നയിച്ചത്. വസന്തകാലത്തെ സങ്കീർണമായ കാലാവസ്ഥയും അന്തരീക്ഷവും കാരണം ഹെലികോപ്റ്റർ പർവതത്തിൽ ഇടിച്ചിറങ്ങുകയായിരുന്നു. കനത്ത മഞ്ഞിന്‍റെ പെട്ടെന്നുള്ള വരവ് മേഖലയിലെ ഹെലികോപ്റ്ററിന്‍റെ യാത്രക്ക് തടസമായെന്നും ഉന്നത സമിതി റിപ്പോർട്ടിൽ ചൂണ്ടിക്കാട്ടുന്നു.

അതേസമയം, ഹെലികോപ്റ്റർ അപകടത്തിന് പിന്നിൽ ഗൂഢാലോചനയുണ്ടെന്ന ആരോപണം സൈന്യം ആദ്യം തന്നെ തള്ളിയിരുന്നു. കൂടാതെ, സുരക്ഷാമാനദണ്ഡങ്ങൾ ലംഘിച്ച് അധികയാത്രക്കാരുമായി അമിതഭാരം വഹിച്ച് ഹെലികോപ്റ്റർ സഞ്ചരിച്ചത് അപകടത്തിന് വഴിവെച്ചെന്ന് ആഗസ്റ്റിൽ ഫാർസ് വാർത്താ ഏജൻസി ആരോപിച്ചിരുന്നു. എന്നാൽ, ആരോപണം ഇറാൻ സായുധസേന അന്നേ തള്ളിയിരുന്നു.

മേയ്​ 12ന് ഇറാന്‍റെ കിഴക്കൻ അസർബൈജാൻ അതിർത്തി മേഖലയിലുണ്ടായ ഹെലികോപ്ടർ അപകടത്തിലാണ് പ്രസിഡന്‍റ്​ ഇബ്രാഹീം റഈസിയും വിദേശകാര്യ മന്ത്രി അമീർ അബ്ദുല്ലഹിയാനും പ്രവിശ്യ ഗവർണർ ഉൾപ്പെടെ ഒമ്പതുപേർ കൊല്ലപ്പെട്ടത്. അപകടത്തിൽ ഇറാൻ പ്രസിഡന്‍റിനും വി​ദേ​ശ​കാ​ര്യ മ​ന്ത്രിക്കും പുറമേ ഇറാന്റെ കിഴക്കൻ അസർബൈജാൻ പ്രവിശ്യ ഗവർണർ മാലിക് റഹ്മതി, പരമോന്നത നേതാവിന്റെ കിഴക്കൻ അസർബൈജാൻ പ്രതിനിധി ആയത്തുല്ല മുഹമ്മദ് അലി അൽ ഹാശിം, പ്രസിഡന്റിന്റെ സുരക്ഷാ സംഘത്തലവൻ സർദാർ സയ്യിദ് മെഹ്ദി മൂസവി, ഹെലികോപ്ടർ പൈലറ്റ് കേണൽ സയ്യിദ് താഹിർ മുസ്തഫവി, കോ പൈലറ്റ് കേണൽ മുഹ്സിൻ ദരിയാനുഷ്, ​ഫ്ലൈറ്റ് ടെക്നീഷ്യൻ മേജർ ബെഹ്റൂസ് ഗാദിമി എന്നിവരും കൊല്ലപ്പെട്ടു.

ഇ​റാ​ൻ- അ​സ​ർ​ബൈ​ജാ​ൻ സം​യു​ക്ത സം​രം​ഭ​മാ​യ ഖി​സ് ഖ​ലാ​സി അ​ണ​ക്കെ​ട്ട് ഉ​ദ്ഘാ​ട​നം ക​ഴി​ഞ്ഞ് മു​തി​ർ​ന്ന നേ​താ​ക്ക​ൾ​ക്കൊ​പ്പം ത​ബ്രീ​സി​ലേ​ക്ക് പു​റ​പ്പെ​ട്ട ഹെ​ലി​കോ​പ്ട​ർ ജു​ൽ​ഫ​യി​ലെ വ​ന​മേ​ഖ​ല​യി​ൽ ഇ​ടി​ച്ചി​റ​ക്കുകയായിരുന്നു. അ​റാ​സ് ന​ദി​ക്ക് കു​റു​കെ​യു​ള്ള അ​ണ​ക്കെ​ട്ട് അ​സ​ർ​ബൈ​ജാ​ൻ പ്ര​സി​ഡ​ന്റ് ഇ​ൽ​ഹാം അ​ലി​യേ​വി​നൊ​പ്പമാണ് ഉ​ദ്ഘാ​ട​നം നി​ർ​വ​ഹി​ച്ച​ത്. തിരികെ വരുംവഴിയാണ് അപകടം. മൂ​ന്ന് ഹെ​ലി​കോ​പ്ട​റു​ക​ളി​ലാ​യാ​ണ് റ​ഈ​സി​യും സം​ഘ​വും പു​റ​പ്പെ​ട്ട​ത്. മ​റ്റു ര​ണ്ട് ഹെ​ലി​കോ​പ്ട​റു​ക​ൾ സു​ര​ക്ഷി​ത​മാ​യി തി​രി​ച്ചെ​ത്തി​യിരുന്നു.