'ഈ കുരുന്നുകൾ ഉറക്കത്തിലും നിലവിളിക്കുകയാണ്​'- ഇസ്രായേൽ വേട്ടക്കു പിറകെ ഗസ്സയുടെ വേദനയായി കുട്ടികൾ

ജറൂസലം: അത്യാധുനിക ബോംബർ വിമാനങ്ങൾ ഉപയോഗിച്ച്​ 11 ദിവസം ഗസ്സയിൽ മരണം പെയ്​ത ഇസ്രായേൽ താത്​കാലികമായി വെടിനിർത്തിയെങ്കിലും വേദനകളുടെ പുതിയ നെടുവീർപുകൾ കൊച്ചുതുരുത്തിനെ വേട്ടയാടുന്നു. സമാധാന പ്രതീക്ഷയോടെ കുരുന്നുകൾ അന്തിയുറങ്ങിയ കെട്ടിടങ്ങൾക്കു മേൽ ഉഗ്ര ശബ്​ദത്തോടെ നിരന്തരം വർഷിച്ച ബോംബുകളും മിസൈലുകളും ഉണ്ടാക്കിയ ആഘാതം കുട്ടികളിൽ ഭീതി നിറക്കുന്നതാണ്​ ആശങ്ക.

11 ദിവസത്തെ ആക്രമണത്തിൽ 253 ഫലസ്​തീനികൾ കൊല്ലപ്പെട്ടതിൽ 66ഉം കുട്ടികളായിരുന്നു​. 1,000 ലേറെ പേർ പരിക്കുകളോടെ ചികിത്സയിൽ കഴിയുന്നതിലും അനവധി പേർ കുരുന്നുകൾ. ഇസ്രായേലിൽ ഹമാസ്​ റോക്കറ്റാക്രമണത്തിൽ കൊല്ലപ്പെട്ട 12 പേരിലും രണ്ടു കുട്ടികളുണ്ട്​.

ഗസ്സയിൽ മാത്രം 1,800 വീടുകൾ പൂർണമായും 14,300 എണ്ണം ഭാഗികമായും ഇസ്രായേൽ ബോംബറുകൾ തകർത്തിരുന്നു. ഇവയിൽ താമസിച്ച പതിനായിരക്കണക്കിന്​ ഫലസ്​തീനികളാണ്​ യു.എൻ നടത്തുന്ന സ്​കൂളുകളിൽ അഭയം തേടിയത്​.

വെടിനിർത്തൽ നിലവിൽ വന്നെങ്കിലും നിരവധി കുടുംബങ്ങൾ ഇപ്പോഴും അതിന്‍റെ ആഘാതത്തിലാണ്​. 2014ൽ 51 ദിവസം നീണ്ട ഭീകരതയിൽനിന്ന്​ മനസ്സും നാടും മുക്​തമായി വരുന്നതിനിടെയായിരുന്നു പുതിയ ആക്രമണം. അന്ന്​, 2,200 ഫലസ്​തീനികളെ കൊന്നൊടുക്കിയതിൽ 500ഉം കുരുന്നുകളായിരുന്നു. ഗസ്സയിലെ ശുജാഇയ പ്രദേശത്ത്​ ഒറ്റ രാത്രിയിൽ മാത്രം 67 പേരെയാണ്​ കൂട്ടക്കുരുതി നടത്തിയത്​. ഇത്​ കൂട്ടക്കൊലയാണെന്ന്​ ഫലസ്​തീൻ പ്രസിഡന്‍റ്​ മഹ്​മൂദ്​ അബ്ബാസ്​ പറഞ്ഞിരുന്നു.

പ്രദേശത്തുണ്ടായിരുന്ന കുടുംബങ്ങളിൽ അവശേഷിച്ച കുട്ടികൾ ഇപ്പോഴും മാനസിക പ്രശ്​നങ്ങൾ അനുഭവിക്കുകയാണ്​. 'ഗസ്സയിൽ ഒരു മാതാവാകലാണ്​ ഏറ്റവും വലിയ വെല്ലുവിളി'യെന്ന്​ ശുജാഇയ കുരുതിയിൽ ഇരയായ മാധ്യമ പ്രവർത്തകൻ ഖാലിദ്​ ഹമദിന്‍റെ പത്​നി ശഹാദ പറയുന്നു. ഇരുവരും തമ്മിൽ വിവാഹം കഴിഞ്ഞ്​ മാസങ്ങൾ മാത്രം പിന്നിടു​േമ്പാഴായിരുന്നു ഇസ്രായേൽ ആക്രമണം. നാലു മാസം ഗർഭിണിയായിരുന്നു. പിറന്ന കുഞ്ഞ്​ തൗലീന്​ ഒരിക്കലെങ്കിലും ത​െന്‍റ പിതാവിനെ കാണാൻ അന്നുവീണ ബോംബുകൾ അനുവദിച്ചില്ല. കുഞ്ഞിനെ എല്ലാ അർഥത്തിലും മുന്നോട്ടുകൊണ്ടുപോകുന്ന വലിയ ഉത്തരവാദിത്വമാണ്​ ശഹാദയുൾപെടെ മറ്റു മാതാക്കളും ചെയ്യുന്നത്​.

കഴിഞ്ഞ നാളുകളിലെ സമയത്ത്​, കുട്ടികളെ അടുത്തുപിടിച്ച്​ നിൽക്കുകയായിരുന്നു പല മാതാപിതാക്കളും. ബോംബുകളുടെ ഹൃദയം തുളക്കുന്ന വലിയ ശബ്​ദം കേൾക്കു​േമ്പാൾ അവർ തകർന്നുപോകും. ഭീതിയിൽ വിറയാർന്നുനിൽക്കുന്നവർക്ക്​ തിരിച്ചുവരവിന്​ സമയമേ​െറ വേണം. ഇപ്പോഴും കുട്ടികളിൽ പ്രശ്​നങ്ങൾ നിലനിൽക്കുന്നതായി മൂന്നു കുരുന്നുകളുടെ മാതാവായ റീം ജർജൂർ പറയുന്നു. ഇത്തരം കുടുംബങ്ങളെ ലക്ഷ്യമിട്ട്​ ഗസ്സയിൽ ഫലസ്​തീൻ ട്രോമ സെന്‍റർ ​യു.കെ എന്ന സ്​ഥാപനം ഖദാ റിദ്​വാന്‍റെ നേതൃത്വത്തിൽ നടക്കുന്നുണ്ട്​. എണ്ണമറ്റ കുടുംബങ്ങൾ ഇവിടെയെത്തുന്നതായി ഖദാ റിദ്​വാൻ പറയുന്നു.

ഇത്തവണ കുരുതി ചെയ്യപ്പെട്ട 66 കുട്ടികളിൽ 12 പേരും കഴിഞ്ഞ ആക്രമണത്തിന്‍റെ ആഘാതമൊഴിവാക്കാൻ പ്രത്യേക പരിശീലന പദ്ധതിയിൽ ഭാഗമായവരായിരുന്നുവെന്ന്​ പറയുന്നു, നോർവീജിയൻ റഫ്യൂജി കൗൺസിൽ.

14 വർഷമായി ഇസ്രായേൽ ഉപരോധം അടിച്ചേൽപിച്ച ഗസ്സയിൽ ജനസംഖ്യയുടെ 50 ശതമാനത്തിനു മുകളിൽ ദാരിദ്ര്യ രേഖക്കു താഴെയാണ്​. 55 ശതമാനവും തൊഴിൽ രഹിതർ. ആരോഗ്യ മേഖല തീരെ തകർന്നുകിടക്കുന്നു. ജനസംഖ്യയുടെ 45 ശതമാനവും 18 വയസ്സിന്​ താഴെ.