മാ​യ്ക്കാ​നാ​കാ​ത്ത നി​റ​ത്തി​ന്റെ അ​തി​രു​ക​ൾ

49ാമ​ത് അ​ന്ത​ർ​ദേ​ശീ​യ ബ്ലാ​ക്ക് ഫെ​മി​നി​സ്റ്റ് സ​മ്മേ​ള​നം ന​ട​ക്കു​ന്ന 2024 മാ​ർ​ച്ച് 22-23 ദി​വ​സ​ങ്ങ​ളി​ലാ​ണ് കേ​ര​ള​ത്തി​ൽ ക​റു​പ്പു​നി​റ​ത്തെ​ക്കു​റി​ച്ച് ല​ജ്ജാ​ക​ര​മാ​യ ചി​ല പ​രാ​മ​ർ​ശ​ങ്ങ​ളും ആ​ക്ര​മാ​ത്മ​ക​മാ​യ ച​ർ​ച്ച​യു​മു​ണ്ടാ​യ​ത്. സം​ഘ​ടി​ത ബ്ലാ​ക്ക് ഫെ​മി​നി​സം രൂ​പം​കൊ​ണ്ടി​ട്ട് അ​മ്പ​തു​വ​ർ​ഷ​ങ്ങ​ളേ ആ​കു​ന്നു​ള്ളൂ എ​ന്ന​ത് ഇ​ത്ത​രം ച​ർ​ച്ച​ക​ൾ​ക്ക് വ​ലി​യൊ​രു ച​രി​ത്ര പ​ശ്ചാ​ത്ത​ല​മു​ണ്ടെ​ങ്കി​ലും അ​വ​യു​ടെ വ്യ​വ​സ്ഥാ​പി​ത​മാ​യ വ​ള​ർ​ച്ച എ​ത്ര അ​ടു​ത്ത​കാ​ല​ത്തു​ണ്ടാ​യ​താ​ണെ​ന്ന് ന​മ്മെ ബോ​ധ്യ​പ്പെ​ടു​ത്തു​ന്നു. ആ​ഗോ​ള​ത​ല​ത്തി​ൽ അ​തു​ണ്ടാ​ക്കി​യ മാ​റ്റ​ങ്ങ​ൾ ശ​ക്ത​വും ദൂ​ര​വ്യാ​പ​ക​വു​മാ​ണ് എ​ന്ന​തി​ൽ ത​ർ​ക്ക​മി​ല്ല. എ​ന്നാ​ൽ അ​തി​ന്റെ അ​നു​ര​ണ​ന​ങ്ങ​ൾ ഇ​നി​യും എ​ത്തി​ച്ചേ​ർ​ന്നി​ട്ടി​ല്ലാ​ത്ത ലോ​ക​ത്തി​ന്റെ മൂ​ല​ക​ളി​ലൊ​ന്ന് കേ​ര​ള​ത്തി​ലെ ഫ്യൂ​ഡ​ൽ അ​വ​ശി​ഷ്ട​ങ്ങ​ൾ പേ​റു​ന്ന മ​ന​സ്സു​ക​ളാ​ണ് എ​ന്ന​താ​ണ് ഇ​വി​ടെ​യു​ണ്ടാ​യ ദൗ​ർ​ഭാ​ഗ്യ​ക​ര​മാ​യ സം​ഭ​വം ഓ​ർ​മി​പ്പി​ക്കു​ന്ന​ത്. ന​ർ​ത്ത​ക​നും നൃ​ത്താ​ധ്യാ​പ​ക​നും ക​ലാ​പ​ണ്ഡി​ത​നു​മാ​യ ഡോ. ​ആ​ർ.​എ​ൽ.​വി. രാ​മ​കൃ​ഷ്ണ​നെ​തി​രെ ന​ട​ത്ത​പ്പെ​ട്ട ദു​ർ​വ​ച​ന​ങ്ങ​ൾ മ​ലീ​മ​സ​മാ​യ രാ​ഷ്ട്രീ​യ​ബോ​ധ​ത്തി​ൽ​നി​ന്ന് ഉ​ണ്ടാ​യ​താ​ണ്.

ഒ​രു ജ​ന​ത എ​ന്ന​നി​ല​യി​ൽ മ​ല​യാ​ളി​ക​ൾ സ​വി​ശേ​ഷ​മാ​യും ദ​ക്ഷി​ണേ​ഷ്യ​ക്കാ​ർ പൊ​തു​വെ​യും സ്വ​ന്തം പൊ​തു​ബോ​ധ​ത്തി​ലേ​ക്ക് ആ​വാ​ഹി​ച്ചി​ട്ടു​ള്ള​ത് വെ​ളു​പ്പി​നോ​ടു​ള്ള തീ​വ്രാ​ഭി​ലാ​ഷ​മാ​ണ്. ഉ​ദാ​ഹ​ര​ണ​ങ്ങ​ൾ നി​ര​ത്തി​യാ​ൽ തീ​രാ​ത്ത​തും കേ​വ​ല​മാ​യ വ​സ്തു​താ​ക​ഥ​നം ആ​വ​ശ്യ​മി​ല്ലാ​ത്ത​തു​മാ​യ ഒ​രു നി​റ​ഞ്ഞ സാം​സ്കാ​രി​ക സാ​ന്നി​ധ്യ​മാ​ണ് ഈ ​വെ​ണ്മ​ഭ്ര​മം. ക​റു​പ്പ് അ​പ​ക​ർ​ഷ​ത​യു​ടെ​യും ദു​ര​ന്ത​ത്തി​ന്റെ​യും നി​റ​മാ​യി കാ​ണു​ന്ന സ​മീ​പ​നം സം​സ്കാ​ര​ത്തി​ൽ അ​ലി​ഞ്ഞു​ചേ​ർ​ന്ന​താ​ണ്. നി​റം ക​റു​പ്പാ​യ​തു​കൊ​ണ്ട് ഒ​രാ​ൾ​ക്ക് ന​ർ​ത്ത​ക​നാ​കാ​ൻ ക​ഴി​യി​ല്ല എ​ന്ന വാ​ദ​ത്തി​ന്റെ വേ​രു​ക​ൾ ഈ ​ഭ്ര​മ​ചി​ന്ത​യു​ടെ തീ​വ്ര​മാ​യ പ്ര​കാ​ശ​ന​മാ​ണ്. ഇ​ന്ത്യ​യി​ൽ യ​ഥാ​ർ​ഥ​ത്തി​ൽ മ​നു​ഷ്യ​ശ​രീ​ര​ത്തി​ന്റെ നി​റ​ത്തെ​ക്കു​റി​ച്ചും അ​തു​മാ​യി ബ​ന്ധ​പ്പെ​ട്ട ലാ​വ​ണ്യ​സ​ങ്ക​ൽ​പ​ങ്ങ​ൾ​ക്കും ബ്രാ​ഹ്മ​ണ്യ​ത്തോ​ളം​ത​ന്നെ പ​ഴ​ക്ക​മു​ണ്ടാ​കാം എ​ന്നാ​ണ് ആ​ര്യ​വ​ൽ​ക്ക​ര​ണ പ്ര​ക്രി​യ​യും ഇ​ത്ത​രം അ​ധീ​ശ​വ്യ​വ​ഹാ​ര​ങ്ങ​ളും പ​രി​ശോ​ധി​ക്കു​ന്ന ഒ​രാ​ൾ​ക്ക് ബോ​ധ്യ​പ്പെ​ടു​ക. കോ​ള​നി​വ​ത്ക​ര​ണ​ത്തി​ന്റെ കാ​ല​ത്താ​ക​ട്ടെ ഈ ​വം​ശീ​യ​ധാ​ര​ണ കൂ​ടു​ത​ൽ ബ​ല​പ്പെ​ടു​ക​യാ​ണ് ചെ​യ്‌​ത​ത്. അ​ത് ആ​ഗോ​ള​ത​ല​ത്തി​ൽ വെ​ള്ള​ക്കാ​രു​ടെ ആ​ധി​പ​ത്യ​പ​ദ്ധ​തി​യു​ടെ​യും ഒ​രു അ​വി​ഭാ​ജ്യ​ഘ​ട​ക​മാ​യി​രു​ന്നു. ഇ​ന്ത്യ​യി​ൽ ഡോ. ​ബി.​ആ​ർ. അം​ബേ​ദ്‌​ക​ർ ജാ​തി​യെ എ​ന്ന​തു​പോ​ലെ, അ​മേ​രി​ക്ക​യി​ൽ ഏ​താ​ണ്ട് അ​തേ കാ​ല​ത്തു​ത​ന്നെ വം​ശ​വി​വേ​ച​ന​ത്തി​ന്റെ രാ​ഷ്ട്രീ​യം അ​പ​ഗ്ര​ഥി​ച്ച ഉ​ന്ന​ത ചി​ന്ത​ക​നാ​ണ് ഡു ​ബോ​യി​സ്‌. ഡു ​ബോ​യി​സി​ന്റെ ഏ​റ്റ​വും പ്ര​ശ​സ്ത​മാ​യ ആ​ശ​യ​ങ്ങ​ളി​ലൊ​ന്ന് സ​മൂ​ഹ​ത്തി​ൽ കീ​ഴാ​ള​ത്ത​മു​ള്ള​വ​രോ കോ​ള​നി​വ​ത്ക​രി​ക്ക​പ്പെ​ട്ട​വ​രോ ആ​യ വി​ഭാ​ഗ​ങ്ങ​ൾ അ​നു​ഭ​വി​ക്കു​ന്ന ആ​ന്ത​രി​ക​സം​ഘ​ർ​ഷ​ത്തെ സൂ​ചി​പ്പി​ക്കു​ന്ന ഡ​ബി​ൾ കോ​ൺ​ഷ്യ​സ്‌​നെ​സ് (ഇ​ര​ട്ട​ബോ​ധം) ആ​ണ്. അ​ദ്ദേ​ഹ​ത്തി​ന്റെ ‘ദി ​സോ​ൾ​സ് ഓ​ഫ് ബ്ലാ​ക്ക് ഫോ​ക്ക്’(1903) എ​ന്ന പു​സ്ത​ക​ത്തി​ൽ ഇ​തേ​ക്കു​റി​ച്ചു​ള്ള വി​ശ​ദ ച​ർ​ച്ച​യു​ണ്ട്. ഡു ​ബോ​യി​സ് ഇ​തി​നെ സ്വ​യം നോ​ക്കു​ന്ന​ത് കൂ​ടാ​തെ ‘മ​റ്റു​ള്ള​വ​രു​ടെ ക​ണ്ണി​ലൂ​ടെ എ​പ്പോ​ഴും സ്വ​യം നോ​ക്കു​ന്ന ബോ​ധം’​എ​ന്നാ​ണ് വി​ശേ​ഷി​പ്പി​ച്ച​ത്. ഇ​തോ​ടൊ​പ്പം വം​ശീ​യ​മാ​യ വി​ഭ​ജ​ന​ത്തെ​യും ക​റു​ത്ത​വ​ർ​ഗ​ക്കാ​ർ അ​ഭി​മു​ഖീ​ക​രി​ക്കു​ന്ന അ​സ​മ​ത്വ​ത്തെ​യും പ​രാ​മ​ർ​ശി​ച്ച് ഇ​രു​പ​താം നൂ​റ്റാ​ണ്ടി​ലെ പ്ര​ധാ​ന പ്ര​ശ്നം നി​റ​വു​മാ​യി ബ​ന്ധ​പ്പെ​ട്ട​താ​കു​മെ​ന്നും ഡു ​ബോ​യി​സ് പ്ര​വ​ചി​ച്ചു. ഇ​തി​നെ ‘ക​ള​ർ ലൈ​ൻ’(​നി​റ​ത്തി​ന്റെ അ​തി​ർ​വ​ര) എ​ന്ന​ദ്ദേ​ഹം വി​ശേ​ഷി​പ്പി​ച്ചു. ഇ​രു​പ​താം നൂ​റ്റാ​ണ്ടി​ന്റെ പ്ര​ധാ​ന പ്ര​ശ്നം ഏ​ഷ്യ​യി​ലെ​യും ആ​ഫ്രി​ക്ക​യി​ലെ​യും അ​മേ​രി​ക്ക​യി​ലെ​യും മ​നു​ഷ്യ​ർ​ക്കി​ട​യി​ൽ ഇ​രു​ണ്ട നി​റ​ങ്ങ​ളും നേ​ർ​ത്ത നി​റ​ങ്ങ​ളു​മാ​യു​ള്ള ബ​ന്ധ​ത്തി​ന്റെ പ്ര​ശ്‌​ന​മാ​ണ് എ​ന്നും വ​ർ​ണ​പ്ര​ശ്ന​ത്തി​ന്റെ ആ​ഗോ​ള​സ്വ​ഭാ​വം വ്യ​ക്ത​മാ​ക്കി​ക്കൊ​ണ്ട് ആ​ദ്യം വി​ളി​ച്ചു​പ​റ​ഞ്ഞ ചി​ന്ത​ക​ൻ ക​റു​ത്ത​വം​ശ​ജ​നാ​യ ഡു ​ബോ​യ്സ് ആ​യി​രു​ന്നു.

വി​ജ​യ് പ്ര​സാ​ദ് ര​ചി​ച്ച ‘ത​വി​ട്ടു തൊ​ലി​ക്കാ​രു​ടെ ത​ല​വി​ധി’(The Karma of Brown Folk) എ​ന്ന പു​സ്ത​കം അ​മേ​രി​ക്ക​യി​ലെ ദ​ക്ഷി​ണേ​ഷ്യ​ക്കാ​രു​ടെ ജീ​വി​ത​വീ​ക്ഷ​ണ​ങ്ങ​ളി​ലേ​ക്ക് ആ​ഴ്ന്നി​റ​ങ്ങു​ന്ന, വി​മ​ർ​ശ​നാ​ത്മ​ക​വും ചി​ന്തോ​ദ്ദീ​പ​ക​വു​മാ​യ കൃ​തി​യാ​ണ്. ദ​ക്ഷി​ണേ​ഷ്യ​ക്കാ​ർ ഉ​ൾ​പ്പെ​ടെ​യു​ള്ള ഏ​ഷ്യ​ൻ അ​മേ​രി​ക്ക​ക്കാ​ർ, ത​ങ്ങ​ളു​ടെ ന്യൂ​ന​പ​ക്ഷ പ​ദ​വി മ​റ്റ് ന്യൂ​ന​പ​ക്ഷ വി​ഭാ​ഗ​ങ്ങ​ളു​ടെ, പ്ര​ത്യേ​കി​ച്ച് ആ​ഫ്രി​ക്ക​ൻ അ​മേ​രി​ക്ക​ക്കാ​രു​ടെ പോ​രാ​ട്ട​ങ്ങ​ളെ തു​ര​ങ്കം​വെ​ക്കു​ന്ന​തി​നും അ​മേ​രി​ക്ക​യി​ലെ വം​ശീ​യ ശ്രേ​ണി​ക​ളു​ടെ​യും വെ​ള്ള​ക്കാ​രു​ടെ ആ​ധി​പ​ത്യ​ത്തെ പി​ന്തു​ണ​ക്കു​ന്ന​തി​നും ഉ​പ​യോ​ഗി​ക്കു​ന്ന​തി​ന്റെ ചി​ത്ര​മാ​ണ് അ​ദ്ദേ​ഹം വ​ര​ച്ചു​കാ​ട്ടാ​ൻ ശ്ര​മി​ക്കു​ന്ന​ത്. ദ​ക്ഷി​ണേ​ഷ്യ​ക്കാ​ർ അ​മേ​രി​ക്ക​യി​ൽ ക​റു​പ്പി​നും വെ​ളു​പ്പി​നും ഇ​ട​യി​ൽ നി​ന്നു​കൊ​ണ്ട് വെ​ള്ള​ക്കാ​രു​ടെ പ്രീ​തി പി​ടി​ച്ചു​പ​റ്റാ​നും ക​റു​ത്ത​വ​രു​ടെ സ​മ​ര​ങ്ങ​ളെ നി​ർ​വീ​ര്യ​മാ​ക്കാ​നും സ്വ​ന്തം പാ​ർ​ശ്വ​വ​ത്കൃ​ത​സ്ഥാ​നം ഉ​പ​യോ​ഗി​ക്കു​ന്നു. അ​വി​ടെ ത​വി​ട്ടു​തൊ​ലി​ക്കാ​രാ​യി ക​ണ​ക്കാ​ക്ക​പ്പെ​ടു​ന്ന, ഇ​വി​ടെ സ്വ​ന്തം വം​ശീ​യ​മേ​ന്മ​യി​ലും തൊ​ലി​യു​ടെ വ്യ​ത്യ​സ്ത​ത​യി​ലും അ​ഭി​മാ​നം ക​ണ്ടെ​ത്തു​ന്ന, ഇ​ന്ത്യ​ൻ ഉ​പ​രി​വ​ർ​ഗ​മാ​ണ് ഇ​തി​ന്റെ മു​ഖ്യ വ​ക്താ​ക്ക​ൾ. ഇ​തി​നു സ​മാ​ന​മാ​യ ഒ​ന്നാ​ണ് കേ​ര​ള​ത്തി​ലെ ശൂ​ദ്ര​രാ​ഷ്ട്രീ​യം ഇ​രു​പ​താം നൂ​റ്റാ​ണ്ടി​ന്റെ തു​ട​ക്ക​ത്തി​ൽ സ്വ​ന്തം അ​ധി​കാ​ര​സ്ഥാ​പ​ന​ത്തി​ന് ബ്രാ​ഹ്മ​ണി​ക്ക​ൽ അ​ധി​കാ​ര​ഘ​ട​ന​യെ സ​മ​ർ​ഥ​മാ​യി ഉ​പ​യോ​ഗി​ച്ചു​കൊ​ണ്ട് നി​ർ​വ​ഹി​ച്ച​ത്. ബി.​ജെ.​പി സ്പോ​ൺ​സ​ർ ചെ​യ്യു​ന്ന​താ​യി ആ​രോ​പ​ണ​മു​ള്ള ഇ​ന്ത്യ​യി​ലെ ഒ.​ബി.​സി-​ദ​ലി​ത് സം​ഘ​ർ​ഷ​ങ്ങ​ളി​ലെ ഇ​ര​ക​ൾ ദ​ലി​ത​രാ​ണ് എ​ന്ന​തും ഇ​തോ​ടൊ​പ്പം ചേ​ർ​ത്തു​വാ​യി​ക്കേ​ണ്ട​താ​ണ്.

ക​റു​പ്പു​നി​റം എ​ന്ന നാ​മ​ത്തി​ൽ​നി​ന്ന് അ​തി​ലെ വ​ർ​ണം എ​ടു​ത്തു​ക​ള​യു​ക​യും അ​ത് അ​ധ​മ​ത്വ​ത്തി​ന്റെ സൂ​ച​ക​മാ​യി മ​ന​സ്സി​ലാ​ക്ക​പ്പെ​ടു​ന്ന സാ​ഹ​ച​ര്യം സൃ​ഷ്ടി​ക്കു​ക​യും ചെ​യ്തു എ​ന്ന​താ​ണ് നൂ​റ്റാ​ണ്ടു​ക​ളാ​യു​ള്ള വ​ർ​ണ​വ്യ​വ​ഹാ​രം നി​ർ​വ​ഹി​ച്ച ച​രി​ത്ര​ദൗ​ത്യം. ക​റു​പ്പി​ന് അ​ഴ​കു​ണ്ടോ ഇ​ല്ല​യോ എ​ന്ന​തു​പോ​ലും ആ ​വ്യ​വ​ഹാ​ര​ത്തി​നു​ള്ളി​ൽ മാ​ത്രം ചോ​ദി​ക്കാ​വു​ന്ന ചോ​ദ്യ​മാ​യി അ​ത് മാ​റ്റി​ത്തീ​ർ​ത്തി​രി​ക്കു​ന്നു. വെ​ളു​പ്പി​നെ ഉ​ദാ​ത്ത​വ​ത്ക​രി​ക്കു​ക എ​ന്ന​തി​ന​പ്പു​റം, ക​റു​പ്പും വെ​ളു​പ്പും എ​ന്ന വൈ​രു​ധ്യം ച​രി​ത്ര​ത്തി​ൽ സൂ​ക്ഷ്മ​പ്പെ​ടു​ത്തു​ക എ​ന്ന​ത് ഈ ​വ്യ​വ​ഹാ​ര​ത്തി​ന്റെ ഫ​ല​മാ​യി ഉ​ണ്ടാ​യ​താ​ണ്. ഡൂ ​ബോ​യി​സ് പ​റ​ഞ്ഞ​തു​പോ​ലെ മാ​ത്ര​മ​ല്ലെ​ങ്കി​ലും, അ​ദ്ദേ​ഹ​ത്തി​ന്റെ നി​രീ​ക്ഷ​ണം അ​ർ​ഥ​വ​ത്താ​ക്കു​ന്ന വ​ർ​ണ​വ്യ​വ​ഹാ​ര​മാ​ണ്‌ ഇ​രു​പ​താം നൂ​റ്റാ​ണ്ടി​ലൂ​ടെ പ​രി​ണ​മി​ച്ച് ഇ​പ്പോ​ൾ ഇ​രു​പ​ത്തൊ​ന്നാം നൂ​റ്റാ​ണ്ടി​ൽ എ​ത്തി​നി​ൽ​ക്കു​ന്ന​ത്. മ​നു​ഷ്യ​ശ​രീ​ര​ത്തി​ന്റെ നി​റ​ഭേ​ദ​ങ്ങ​ളെ​ക്കു​റി​ച്ചു​ള്ള ഏ​ഷ്യ​ൻ യാ​ഥാ​ർ​ഥ്യ​വു​മാ​യി പൊ​രു​ത്ത​മി​ല്ലാ​തെ​യാ​ണ് ക​റു​പ്പി​നെ​ക്കു​റി​ച്ചു​ള്ള വ്യ​വ​ഹാ​രം ഏ​ഷ്യ​യി​ലും നി​ല​നി​ൽ​ക്കു​ന്ന​ത്. ഞാ​ൻ ഹോ​ങ്കോ​ങ്ങി​ൽ വെ​ച്ച് പ​രി​ച​യ​പ്പെ​ട്ട ഒ​രു ചൈ​നീ​സ് വി​ദ്യാ​ർ​ഥി​നി പ​റ​ഞ്ഞ​ത്, വ​ള​രെ​ക്കാ​ലം അ​വ​ർ വി​ചാ​രി​ച്ചി​രു​ന്ന​ത് ഇ​ന്ത്യ​ക്കാ​രു​ടെ നി​റം ക​റു​ത്തി​രി​ക്കു​ന്ന​ത് അ​വ​ർ ദേ​ഹ​ത്തു​നി​ന്ന് അ​ഴു​ക്കു ക​ള​യാ​ത്ത​തു​കൊ​ണ്ടാ​ണ് എ​ന്നാ​യി​രു​ന്നു​വ​ത്രെ. അ​വ​ർ​ക്ക​തു അ​റ​പ്പു​ണ്ടാ​ക്കി​യി​രു​ന്നു​വ​ത്രെ. ഇ​ന്ത്യ​ക്കാ​രു​ടെ നി​റം ക​റു​പ്പാ​ണോ എ​ന്ന മ​റി​ച്ചു​ള്ള ചോ​ദ്യം​പോ​ലും ആ ​വ്യ​വ​ഹാ​ര​ത്തി​ന്റെ മു​ൻ‌​കൂ​ർ ബ​ന്ദി​യാ​വു​ക​യാ​ണ് ചെ​യ്യു​ന്ന​ത്. അ​തു​കൊ​ണ്ടാ​ണ് നി​റ​വു​മാ​യി ബ​ന്ധ​പ്പെ​ട്ട ച​ർ​ച്ച​ക​ളി​ൽ അ​തി​സ​ങ്കീ​ർ​ണ​മാ​യ ചേ​രി​തി​രി​വു​ക​ൾ ഉ​ണ്ടാ​കു​ന്ന​ത്. നി​റം, നി​റ​മ​ല്ല. അ​ത് വം​ശ​വും ജാ​തി​യു​മാ​യി മു​ൻ‌​കൂ​ർ കൂ​ട്ടി​ച്ചേ​ർ​ക്ക​പ്പെ​ട്ടി​രി​ക്കു​ന്ന പ്ര​ത്യ​യ​ശാ​സ്ത്ര​മാ​ണ്. ക്ലാ​സി​ക്ക​ൽ ക​ല​ക​ളി​ൽ എ​വി​ടെ​യാ​ണ് ജാ​തി​യും വം​ശീ​യ​ത​യും ഉ​ള്ള​തെ​ന്ന് ചോ​ദി​ക്കു​ന്ന​വ​രു​ണ്ട്. ക​ല​ക്ക് മ​നു​ഷ്യ​രാ​ശി​യു​ടെ പൊ​തു ബൗ​ദ്ധി​കോ​ൽ​പ​ന്നം എ​ന്ന നി​ല​യി​ലു​ള്ള സാ​ർ​വ​ജ​നീ​ന​ത​യി​ൽ ഊ​ന്നു​ന്ന ഈ ​ചോ​ദ്യം അ​പ്ര​സ​ക്ത​മ​ല്ല. ബൂ​ർ​ഷ്വാ​സി​യു​ടെ ക​ല​യ​ല്ല, ക​ലാ​സ​ങ്ക​ൽ​പ​ത്തെ​യാ​ണ് ഇ​ല്ലാ​താ​ക്കേ​ണ്ട​ത് എ​ന്നും വി​പ്ല​വാ​ത്മ​ക​മാ​യ ഒ​രു സ​മീ​പ​ന​ത്തി​ന്റെ മു​ൻ​വ്യ​വ​സ്ഥ​ത​ന്നെ അ​താ​ണെ​ന്നു​മു​ള്ള അ​ർ​ഥ​ത്തി​ൽ മാ​ർ​ക്സി​സ്റ്റ് ക​ലാ​വി​മ​ർ​ശ​ക​നാ​യ പി​യേ​ർ മാ​ഷെ​റി പ​റ​ഞ്ഞ​ത് ഇ​തു​മാ​യി കൂ​ട്ടി​വാ​യി​ക്കാ​വു​ന്ന​താ​ണ്. എ​ന്നാ​ൽ ഇ​ന്ത്യ​ൻ ക്ലാ​സി​ക്ക​ൽ ക​ല​ക​ളി​ലെ വ​രേ​ണ്യ​ബോ​ധം ജാ​തി​യു​മാ​യി​ക്കൂ​ടി അ​ഭേ​ദ്യ​മാം​വി​ധം ബ​ന്ധ​പ്പെ​ട്ടി​രി​ക്കു​ന്നു എ​ന്ന​ത് വി​സ്മ​രി​ക്കാ​ൻ ക​ഴി​യി​ല്ല. ക​ല എ​ന്താ​ണെ​ന്ന​തി​നെ​ക്കു​റി​ച്ചു​ള്ള ഇ​ന്ത്യ​ൻ ക്ലാ​സി​ക്ക​ൽ ധാ​ര​ണ​യും നി​ർ​വ​ച​ന​ങ്ങ​ളും ജാ​തി​യു​ടെ സാ​മൂ​ഹി​ക മാ​ന​ദ​ണ്ഡ​ങ്ങ​ളെ​യും അ​ധി​കാ​ര ഘ​ട​ന​ക​ളെ​യും അ​മി​ത​മാ​യി ആ​ശ്ര​യി​ച്ചു​നി​ൽ​ക്കു​ന്നു.

ഇ​ത് കേ​വ​ല​മാ​യ ബൂ​ർ​ഷ്വാ​വ​ത്ക​ര​ണ​ത്തി​ലൂ​ടെ പ​രി​ഹ​രി​ക്ക​പ്പെ​ടു​ന്നി​ല്ല എ​ന്ന​തി​ന്റെ​കൂ​ടി ഉ​ദാ​ഹ​ര​ണ​മാ​ണ് ഇ​പ്പോ​ൾ ഉ​ണ്ടാ​യി​ട്ടു​ള്ള വി​വാ​ദം. ജാ​തി​യും വം​ശീ​യ​ത​യും ക​ല​യി​ൽ​നി​ന്നു വേ​ർ​പെ​ടു​ത്താ​ൻ ക​ഴി​ഞ്ഞി​ട്ടി​ല്ല എ​ന്ന​തി​ന്റെ ഉ​ദാ​ഹ​ര​ണ​മാ​ണ​ല്ലോ ടി.​എം. കൃ​ഷ്ണ​ക്കെ​തി​രെ ന​ട​ന്ന ആ​ക്ര​മ​ണ​വും. അ​ദ്ദേ​ഹ​ത്തെ ‘ബ്രാ​ഹ്മ​ണ വം​ശ​ഹ​ത്യ​വാ​ദി’​എ​ന്നാ​ണ് വി​ളി​ച്ച​ത്. ച​ട്ട​മ്പി​സ്വാ​മി​ക​ളു​ടെ ചി​ന്ത​യെ​യും രാ​ഷ്ട്രീ​യ​ത്തെ​യും ച​രി​ത്ര​പ​ര​മാ​യി അ​പ​ഗ്ര​ഥി​ക്കാ​ൻ ശ്ര​മി​ച്ച എ​ന്നെ വി​ളി​ച്ചി​രി​ക്കു​ന്ന​ത് ‘നാ​യ​ർ വം​ശ​ഹ​ത്യാ​വാ​ദി’​എ​ന്നാ​ണ്. വം​ശ​ത്തെ​യും ഹ​ത്യ​യെ​യും ഒ​ക്കെ​ക്കു​റി​ച്ചു​ള്ള വ്യ​വ​ഹാ​ര​ങ്ങ​ളി​ൽ​നി​ന്ന് ക​ടം​കൊ​ണ്ട് ന​ട​ത്തു​ന്ന ആ​ഭാ​സ​വ്യ​വ​ഹാ​രം എ​ന്ന​തി​ന​പ്പു​റം ഈ ​സ​വ​ർ​ണാ​ശ്ലീ​ല​ങ്ങ​ൾ​ക്ക് കൂ​ടു​ത​ൽ വി​പു​ല​മാ​യ രാ​ഷ്ട്രീ​യ​ല​ക്ഷ്യ​ങ്ങ​ളു​ണ്ടെ​ന്ന​തും കേ​ര​ള​ത്തി​ലെ വി​വാ​ദം ബോ​ധ്യ​പ്പെ​ടു​ത്തു​ന്നു​ണ്ട്.