യു.പിയിലും ഉത്തരാഖണ്ഡിലും മണിപ്പൂരിലും ഗോവയിലും ബി.ജെ.പി; പഞ്ചാബിൽ ആം ആദ്മി

ഉ​ത്ത​ർ​പ്ര​ദേ​ശ്, പ​ഞ്ചാ​ബ്, ഉ​ത്ത​രാ​ഖ​ണ്ഡ്, ഗോ​വ, മ​ണി​പ്പൂ​ർ നി​യ​മസഭ തെരഞ്ഞെടുപ്പിലെ വോട്ടെണ്ണൽ പുരോഗമിക്കുന്നു....

പഞ്ചാബ് മുൻ മുഖ്യമന്ത്രി പഞ്ചാബ് ലോക് കോൺഗ്രസ് നേതാവുമായ ക്യാപ്റ്റൻ അമരീന്ദർ സിങ് പരാജയപ്പെട്ടു

പഞ്ചാബ് മുൻ മുഖ്യമന്ത്രി പഞ്ചാബ് ലോക് കോൺഗ്രസ് നേതാവുമായ ക്യാപ്റ്റൻ അമരീന്ദർ സിങ് പാട്യാല സീറ്റിൽ പരാജയപ്പെട്ടു. വോട്ടിങ് നിലയിൽ നാലാം സ്ഥാനത്താണ് അമരീന്ദർ സിങ്. ആം ആദ്മി പാർട്ടി സ്ഥാനാർഥി അജിത് പാൽ സിങ് കോഹ് ലിയാണ് വിജയിച്ചത്. ശിരോമണി അകാലിദളിലെ ഹർപാൽ ജുനേജ രണ്ടാം സ്ഥാനത്തും കോൺഗ്രസിന്‍റെ വിഷ്ണു ശർമ നാലാംസ്ഥാനത്തും എത്തി. 

അഞ്ച് സംസ്ഥാനങ്ങളിലെ നിലവിലെ സീറ്റുനില

യു.പി (202/403): ബി.ജെ.പി-270, എസ്.പി-121, ബി.എസ്.പി-5, കോൺഗ്രസ് -3, മറ്റുള്ളവർ -3

പഞ്ചാബ് (69/117): എ.എ.പി-90, കോൺഗ്രസ്-18, ബി.ജെ.പി-2, എസ്.എ.ഡി-6, മറ്റുള്ളവർ-1

ഉത്തരാഖണ്ഡ് (36/70): ബി.ജെ.പി-44, കോൺഗ്രസ്-22, മറ്റുള്ളവർ-5, എ.എ.പി-0

ഗോവ (21/40): ബി.ജെ.പി-18, കോൺഗ്രസ്-11, ടി.എം.സി സഖ്യം-4, എ.എ.പി-2, മറ്റുള്ളവർ-5

മണിപ്പൂർ: ബി.ജെ.പി-29, കോൺഗ്രസ്-10, എൻ.പി.പി-10, ജെ.ഡി.യു-3, മറ്റുള്ളവർ -8

ഉത്തരാഖണ്ഡിൽ കേവലഭൂരിപക്ഷം കടന്ന് ബി.ജെ.പി; മുഖ്യമന്ത്രി ധാമി പിന്നിൽ, ഹരീഷ് റാവത്തിനും തിരിച്ചടി

ഡെറാഡൂൺ: കോൺഗ്രസ് കടുത്ത മത്സരം കാഴ്ചവെക്കുമെന്ന് എക്സിറ്റ് പോളുകൾ പ്രവചിച്ച ഉത്തരാഖണ്ഡിൽ ബി.ജെ.പി മുന്നേറ്റം. 42 സീറ്റുകളിൽ ബി.ജെ.പി മുന്നിട്ടു നിൽക്കുകയാണ്. അതേസമയം, മുഖ്യമന്ത്രി പുഷ്കർ സിങ് ധാമി പിന്നിലാണ്. 24 സീറ്റിലാണ് കോൺഗ്രസ് മുന്നിട്ടു നിൽക്കുന്നത്. മുൻ മുഖ്യമന്ത്രിയും കോൺഗ്രസ് നേതാവുമായ ഹരീഷ് റാവത്ത് പിന്നിലാണ്. മുഖ്യമന്ത്രി പുഷ്കർ സിങ് ധാമിയുടെ ഖാട്ടിമ മണ്ഡലത്തിൽ കോൺഗ്രസ് സ്ഥാനാർഥി ഭുവൻ ചന്ദ്ര കാപ്രി 954 വോട്ടുകൾക്ക് മുന്നിലാണ്. ബി.എസ്.പി രണ്ട് സീറ്റിൽ മുന്നിലാണ്. മറ്റുള്ളവരും രണ്ട് സീറ്റിൽ മുന്നിട്ടു നിൽക്കുന്നു.

ഗോവയിൽ ആര് മുഖ്യമന്ത്രിയാകണമെന്ന് പാർട്ടി തീരുമാനിക്കുമെന്ന് ബി.ജെ.പി നേതാവ് വിശ്വജിത്ത് റാണ

ഗോവയിൽ ആര് മുഖ്യമന്ത്രിയാകണമെന്നത് സംബന്ധിച്ച് പാർട്ടി തീരുമാനമെടുക്കുമെന്ന് ബി.ജെ.പി നേതാവ് വിശ്വജിത്ത് റാണ. ഗോവയിൽ വ്യക്തമായ ഭൂരിപക്ഷത്തോടെ സർക്കാർ രൂപീകരിക്കുമെന്നും അദ്ദേഹം പറഞ്ഞു. അഴിമതിക്കാരേയും പുറത്ത് നിന്നുള്ള​വരേയും ഗോവയിലെ ജനങ്ങൾ തിരസ്കരിച്ചു. ജനങ്ങൾക്ക് വേണ്ടി പ്രവർത്തിക്കുന്നവരേയാണ് അവർ തെരഞ്ഞെടുത്തത്. ഗോവയിൽ മുഖ്യമന്ത്രിയായി പ്രമോദ് സാവന്ത് തുടരുമോയെന്ന ചോദ്യത്തിന് അക്കാര്യം പാർട്ടി തീരുമാനിക്കുമെന്നായിരുന്നു റാണയുടെ മറുപടി.

ഗോവയിൽ ബി.ജെ.പിയാണ് മുന്നേറുന്നത്. 19 സീറ്റിലാണ് ബി.ജെ.പി മുന്നേറ്റം. ആദ്യഘട്ടത്തിൽ മികച്ച പ്രകടനം കാഴ്ചവെച്ച കോൺഗ്രസ് ഇപ്പോൾ 10 സീറ്റിലാണ് മുന്നേറുന്നത്. തൃണമൂൽ കോൺഗ്രസ് സഖ്യം നാല് സീറ്റുകളിലും മറ്റുള്ളവർ ഏഴ് സീറ്റിലുമാണ് മുന്നേറുന്നത്.

പഞ്ചാബിൽ ഭഗ്വന്ത് മാൻ മുഖ്യമന്ത്രിയാകുമെന്ന് എ.എ.പി മുതിർന്ന നേതാവ് മനീഷ് സിസോദിയ

പഞ്ചാബിൽ ഭഗ്വന്ത് മാൻ മുഖ്യമന്ത്രിയാകുമെന്ന് എ.എ.പി മുതിർന്ന നേതാവ് മനീഷ് സിസോദിയ. ഗോവയിലും ഉത്തരാഖണ്ഡിലും യുപിയിലും ഞങ്ങൾ സ്ഥാനാർത്ഥികളെ നിർത്തിയിരുന്നെങ്കിലും പഞ്ചാബിലായിരുന്നു ശ്രദ്ധ. ക്രമേണ ഈ സംസ്ഥാനങ്ങളിലെ ജനങ്ങളും ആപ്പിനെ വിശ്വസിക്കാൻ തുടങ്ങുമെന്നും സിസോദിയ വ്യക്തമാക്കി.

മണിപ്പൂരിൽ ഭൂരിപക്ഷം കടക്കാതെ ബി.ജെ.പി, ഏഴിലേക്ക് ഒതുങ്ങി കോൺഗ്രസ്

ഗോവയിലെ ജനങ്ങൾ മാറ്റങ്ങൾക്ക് വേണ്ടിയാണ് വോട്ട് ചെയ്തതെന്ന് കോൺഗ്രസ് അധ്യക്ഷൻ ഗിരീഷ് ചൊന്തങ്കർ

ഗോവയിലെ ജനങ്ങൾ മാറ്റങ്ങൾക്ക് വേണ്ടിയാണ് വോട്ട് ചെയ്തതെന്ന് കോൺഗ്രസ് സംസ്ഥാന അധ്യക്ഷൻ ഗിരീഷ് ചൊന്താങ്കർ. തെരഞ്ഞെടുപ്പ് ഫലം നിരീക്ഷിക്കുകയാണെന്നും അദ്ദേഹം പറഞ്ഞു.

ഉത്തരാഖണ്ഡിൽ ലീഡ് നിലയിൽ കേവല ഭൂരിപക്ഷം കടന്ന് ബി.ജെ.പി

ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഗൊരഖ്പൂർ സീറ്റിൽ ലീഡ് ചെയ്യുന്നു