‘മാനസികസംഘർഷം ഒരു വ്യക്​തിയെ അർബുദ രോഗ​ത്തിലേക്ക്​ നയിക്കുമോ‍? വെജിറ്റേറിയൻ ഭക്ഷണം അർബുദം തടയുമോ?’

കാൻസർ അഥവാ അർബുദം ഇന്നൊരു മാറാരോഗമല്ല​. അതേസമയം, ഈ രോഗത്തെക്കുറിച്ചുള്ള ശാസ്​ത്രീയ അവബോധം സാധാരണക്കാരിൽ മാത്രമല്ല, ഉയർന്ന വിദ്യാഭ്യാസം നേടിയവരിലും വളരെ കുറവാണ്.എന്തുകൊണ്ടാണ്​ അർബുദം വരുന്നത്​, അർബുദം പകരുമോ, മുഴുവനായി ചികിത്സിച്ചു മാറ്റാനാവുമോ, ഭക്ഷണശീലം അർബുദത്തിന്​ കാരണമാവുമോ? -തുടങ്ങിയ ചോദ്യങ്ങൾ ഇപ്പോഴും സമൂഹത്തിൽ ഉയർന്നുകേൾക്കുന്നുണ്ട്​.

ഈ പശ്ചാത്തലത്തിൽ ഇന്നുവരെ ആധുനിക വൈദ്യശാസ്​ത്രം കൈവരിച്ച അറിവുകളുടെ അടിസ്ഥാനത്തിൽ അർബുദ ചികിത്സ, രോഗപ്രതിരോധം എന്നിവയിൽ ബോധവത്​കരണം കുറേക്കൂടി ഫലപ്രദമായി നടത്തേണ്ടി വരുന്നു.

വില്ലൻ ദുശ്ശീലങ്ങൾതന്നെ

50 ശതമാനം അർബുദത്തിനും കാരണം മനുഷ്യരുടെ ദുശ്ശീലങ്ങൾതന്നെയാണ്​. പുകവലി, മുറുക്ക്​, പുകയില ഉൽപന്നങ്ങളുടെ ഉപയോഗം, മദ്യപാനം, മറ്റു​ ലഹരി ഉപയോഗങ്ങൾ തുടങ്ങിയവ തന്നെയാണ് പ്രധാന കാരണങ്ങൾ​. അതേസമയം, ബാക്കി 50 ശതമാനം വരുന്ന കാരണങ്ങളെക്കുറിച്ച്​ സാമാന്യജനത്തിന്​ അവബോധം വളരെ കുറവാണ്​.

തനിക്ക്​ മദ്യപാനം, പുകവലി തുടങ്ങിയ ദുശ്ശീലങ്ങളൊന്നുമില്ല; അതുകൊണ്ട് അർബുദബാധയിൽനിന്ന്​ സുരക്ഷിതരാണ്​ എന്ന്​ കരുതുന്നവരാണ്​ സമൂഹത്തിലെ ഭൂരിപക്ഷം പേരും. എന്നാൽ, ഈ ചിന്ത വെറും അന്ധവിശ്വാസം മാത്രമാണ്​. പ്രധാനമായും നിരുപദ്രവമെന്ന്​ നാം കരുതുന്ന ജീവിതശൈലികൾവരെ അർബുദത്തിന്​ കാരണമാവുന്നുണ്ട്​​.

ഭക്ഷണശീലങ്ങൾ തിരിച്ചടി

പണ്ടു​കാലം മുതൽ സമൂഹത്തിലെ ഭൂരിപക്ഷം പേരും പച്ചക്കറികളോടൊപ്പം മത്സ്യവും മാംസവും ഭക്ഷണത്തിൽ ഉൾപ്പെടുത്തുന്നുണ്ട്. അതുകൊണ്ടുതന്നെ മത്സ്യ-മാംസങ്ങൾ കഴിക്കുന്നത്​ അർബുദത്തിന്​ കാരണമാവുമെന്നോ വെജിറ്റേറിയൻ ഭക്ഷണം മാത്രം കഴിക്കുന്നവർക്ക്​ അർബുദം വരില്ലെന്നോ ഉറപ്പിച്ചുപറയാൻ കഴിയില്ല.

കീടനാശിനികൾ അമിതമായി അടങ്ങിയ പച്ചക്കറികളുടെ നിരന്തര ഉപയോഗം അർബുദത്തിന്​ കാരണമായേക്കാം എന്ന കാര്യം ചേർത്തുപറയേണ്ടതാണ്​. എന്നാൽ, ആധുനിക ജീവിതശൈലി മുന്നോട്ടുവെക്കുന്ന പാചകരീതികളും രാസവസ്​തുക്കൾ യഥേഷ്​ടം അടങ്ങിയ പുതിയതരം വിഭവങ്ങളും ആരോഗ്യത്തിന്​ ഭീഷണിതന്നെയാണ്​.

ചുട്ടെടുക്കുന്ന ഭക്ഷണം കുറക്കണം

ഇന്ന്​ ധാരാളമായി ആവശ്യക്കാരുള്ള ചു​ട്ടെടുക്കുന്ന മാംസഭക്ഷണങ്ങൾ അർബുദത്തിന്​ കാരണമാവും എന്ന്​ നേരത്തെതന്നെ പഠനങ്ങളുണ്ട്​. ഇലക്​ട്രിക്​ ഉപകരണങ്ങളിലൂടെയും തീക്കനൽ ഉപയോഗിച്ചും ചു​ട്ടെടുക്കുന്ന മാംസഭക്ഷണങ്ങളിൽ അർബുദത്തിന്​ കാരണമാവുന്ന ചില ഘടകങ്ങൾ അടങ്ങിയിട്ടുണ്ട്​.

എന്നാൽ, ഒരിക്കലോ വല്ലപ്പോഴുമോ ഇത്തരം ഭക്ഷണം കഴിച്ചാൽ രോഗം പിടിപെടുമെന്ന ഭീതിവേണ്ട. മറിച്ച്​ മൂന്നുനേരം കഴിക്കുന്ന ഭക്ഷണത്തിൽ അളവിൽ കൂടുതൽ ഇത്തരം ഘടകങ്ങൾ അടങ്ങിയിട്ടുണ്ടെങ്കിലും അവ പതിവായി ദീർഘകാലം കഴിക്കുകയോ ശീലമാക്കുകയോ ചെയ്​താലും അർബുദം വരാനുള്ള സാധ്യത തള്ളിക്കളയാൻ കഴിയില്ല. ബാർബിക്യൂ, ഷവർമ പോലുള്ള പാചകരീതികളിൽ ഇത്തരം അപകടങ്ങൾ ഒളിച്ചിരിപ്പുണ്ട്​.

ടിൻ ഫുഡ്​ സൂക്ഷിക്കണം

ടിന്നുകളിൽ ലഭിക്കുന്ന സംസ്​കരിച്ച മാംസത്തി​ന്റെ അമിതോപയോഗവും ആരോഗ്യത്തെ പ്രതികൂലമായി ബാധിക്കും. ലോകാരോഗ്യ സംഘടനയുടെ മുന്നറിയിപ്പ്​ അനുസരിച്ച്​ ഒരു ടിൻ ഇത്തരം മാംസം 100 സിഗരറ്റുകൾ വലിക്കുന്നതിന്​ തുല്യമാണെന്ന്​ പറയുന്നു. അതേസമയം, മത്സ്യം വേവിച്ച്​ കഴിക്കുന്നതോ മുട്ട കഴിക്കുന്നതോ പൊതുവിൽ ആരോഗ്യപ്രശ്​നങ്ങൾ സൃഷ്​ടിക്കുന്നതായി കണ്ടെത്തിയിട്ടില്ല. എന്നാൽ, ഉണങ്ങിയ മത്സ്യത്തി​ന്റെ ഉപയോഗം അത്ര സുരക്ഷിതമാണെന്ന്​ പറയാനാവില്ല.

റെഡ്​ മീറ്റ്​ കുറക്കുക

ശരീരത്തിൽ കൊഴുപ്പി​ന്റെ അളവ്​ കൂട്ടുന്ന ബീഫ്​, മട്ടൻ തുടങ്ങിയ ചുവന്ന മാംസത്തിന്റെ (Red Meat) ഉപയോഗം കഴിയുന്നത്ര കുറ​ക്കുന്നതാണ്​ നല്ലത്​.

നിറങ്ങൾ അത്ര നന്നല്ല

ഭക്ഷണത്തിൽ ചേർക്കുന്ന രാസവസ്​തുക്കളും നിറങ്ങളുമാണ് മറ്റൊന്ന്. മിക്ക വിഭവങ്ങളും ബേക്കറി പലഹാരങ്ങളും നമുക്ക്​ ലഭിക്കുന്നത്​ ആകർഷകമായ നിറങ്ങൾ ​ചേർത്ത ശേഷമാണ്. ഇത്തരം കൃത്രിമ നിറങ്ങൾ അർബുദത്തിന്​ കാരണമാവും എന്ന്​ പഠനങ്ങൾ തെളിയിച്ചിട്ടുണ്ട്​.

വ്യായാമം ഏറ്റവും പ്രധാനം

രുചി മാത്രം ലക്ഷ്യമിട്ട്​ തയാറാക്കുന്ന ഫാസ്​റ്റ്​ ഫുഡ്, ബേക്കറി പലഹാരങ്ങൾ, പൊരിച്ചതും വറുത്തതുമായ മാംസവിഭവങ്ങൾ തുടങ്ങിയ കൊഴുപ്പേറിയ ഭക്ഷണവസ്​തുക്കൾ ആവശ്യത്തിൽ കൂടുതൽ കഴിക്കുന്നതിന്​ പുറമെ ഒട്ടും വ്യായാമമില്ലാത്ത ജീവിതശൈലിയും കൊണ്ട് കണ്ടുവരുന്ന ഒരു ആരോഗ്യപ്രശ്​നമാണ്​ പൊണ്ണത്തടി. ഇത്തരം പൊണ്ണത്തടി, നേരിട്ടല്ലെങ്കിലും അർബുദത്തിന്​ കാരണമാവുന്നുണ്ട്​. പ്രത്യേകിച്ച്​ സ്​ത്രീകളിൽ.

ശരീരത്തിൽ ഇത്തരം കൊഴുപ്പ്​ അടിഞ്ഞുകൂടു​മ്പോൾ അവിടെ ഹോർമോണുകൾ ശേഖരിക്കപ്പെടുക്കുകയും അത്​ ചിലതരം അർബുദത്തിന്​ (Hormone dependent cancers) കാരണമാവുകയും ചെയ്യുന്നു. ഇത്തരം അമിത കൊഴുപ്പ്​ ഹോർമോൺ വ്യതിയാനങ്ങൾക്ക്​ ഇടയാക്കുകയും തുടർന്ന്​ സ്​തനം, ഗർഭാശയം എന്നിവിടങ്ങളിലെ അർബുദത്തിന്​ സാധ്യത കൂട്ടുകയും ചെയ്യുന്നു.

വെജ്​ വേണോ നോൺ ആകണോ

പുതിയ ജീവിത സാഹചര്യത്തിൽ ഉയർന്നുകേൾക്കുന്ന മറ്റൊരു വിഷയമാണ്​​ വെജിറ്റേറിയൻ-നോൺ വെജിറ്റേറിയൻ ഭക്ഷണങ്ങളുടെ ഉപയോഗവും അർബുദം വരാനുള്ള സാധ്യതയെക്കുറിച്ചുള്ള സംശയങ്ങളും.

പൊതുവിൽ മാംസഭക്ഷണം കഴിക്കുന്നവർക്ക്​ രോഗം വരാനുള്ള സാധ്യത കൂടുതലാണെന്നും സസ്യാഹാരികൾ താരതമ്യേന സുരക്ഷിതരാണെന്നുമുള്ള ഒരു ചിന്താഗതി സമൂഹത്തിൽ ആഴത്തിൽ വേരോടിയിട്ടുണ്ട്​. ഈ ചിന്താഗതിയിൽ അൽപം ശരിയും അതിലധികം തെറ്റിദ്ധാരണകളുമാണ്. നിലവിലുള്ള പഠനങ്ങൾ ചൂണ്ടിക്കാണിക്കുന്നത്​ വെജിറ്റേറിയൻ ഭക്ഷണം കഴിക്കുന്നതുകൊണ്ടുമാത്രം അർബുദത്തെ തടയാനാവില്ല എന്നതാണ്.

അതേസമയം, മാംസാഹാരം കഴിച്ചതുകൊണ്ടുമാത്രം ഒരാൾക്ക്​ അർബുദം വരാൻ സാധ്യതയുണ്ടെന്നും പറയാനാവില്ല. എന്നാൽ, അർബുദബാധക്ക് നിരവധി ഘടകങ്ങൾ കാരണമാവുന്നുണ്ടെങ്കിലും മാംസാഹാരം കഴിക്കുന്നവരെ അപേക്ഷിച്ച് പത്തിലൊന്ന് സസ്യാഹാരികളിൽ മാത്രമാണ് രോഗം കണ്ടുവരുന്നത്.

നാരുകൾ കൂട്ടാം കൊഴുപ്പ്​ കുറക്കാം

ശാസ്​ത്രീയമായി പറഞ്ഞാൽ നാരുകളടങ്ങിയ ഭക്ഷണം കൂടുതൽ കഴിക്കുകയും കൊഴുപ്പേറിയ ഭക്ഷണം പരമാവധി ഒഴിവാക്കുകയുമാണ്​ അർബുദം വരാതിരിക്കാൻ ശ്രദ്ധിക്കേണ്ട അടിസ്ഥാന കാര്യങ്ങൾ. അതുകൊണ്ടുകൂടിയാണ്​ ആഹാരത്തിൽ കൂടുതൽ പഴങ്ങളും പച്ചക്കറികളും ഉൾപ്പെടുത്താനും കൊഴുപ്പേറിയ, വറുത്തതും പൊരിച്ചതുമായ മാംസവും ബേക്കറി പലഹാരങ്ങളും പരമാവധി ഒഴിവാക്കാനും പറയുന്നത്​.

അനങ്ങാപ്പാറനയം വേണ്ട

മുൻകാലങ്ങളെപ്പോലെ കായികാധ്വാനമുള്ള ജോലികൾ ഇന്ന്​ കുറയുകയാണ്​. യന്ത്രവത്​കരണവും കമ്പ്യൂട്ടറൈസേഷനും ചേർന്ന്​ ഒട്ടും വ്യായാമം നൽകാത്ത ജോലിയിലാണ്​ ഭൂരിപക്ഷം പേരും. വാഹനങ്ങൾ സാർവത്രികമായതോടെ നടത്തംപോലും നമ്മുടെ ജീവിതത്തിൽനിന്ന്​ അപ്രത്യക്ഷമായി.

ഇത്തരം ജീവിതശൈലി വ്യക്തികളെ പൊണ്ണത്തടിയിലേക്ക്​ നയിക്കും. കഴിക്കുന്ന ഭക്ഷണത്തിലെ അശാസ്​ത്രീയ രീതികളും വ്യായാമക്കുറവും ഒരുമിച്ച്​ ചേരു​മ്പോൾ ഹൃ​ദ്രോഗം, പ്രമേഹം, രക്തസമ്മർദം തുടങ്ങിയ ജീവിതശൈലി രോഗങ്ങൾക്ക്​ പുറമെ അർബുദത്തിനും കാരണമാവുന്നു.

പാരമ്പര്യം എന്ന ഘടകം

അർബുദം വരാനുള്ള പല കാര്യങ്ങളിൽ ഒന്നുമാത്രമാണ്​ പാരമ്പര്യം. അതാക​ട്ടെ അഞ്ച്​ ശതമാനം മാത്രമാണ്​. അതേസമയം, കുടുംബം തലമുറകളായി പിന്തുടർന്നുവരുന്ന ജീവിതശൈലിമൂലം ഒന്നിലധികം തലമുറകളിൽപ്പെട്ടവർക്ക്​ ഒരേതരത്തിലുള്ള അർബുദം പിടിപെടാം​. ഇത്തരം അവസ്ഥകളിൽ രോഗം പാരമ്പര്യരോഗമായി​ തെറ്റിദ്ധരിക്കാറുണ്ട്​. ഉദാഹരണത്തിന്​ പുകവലിക്കാരനായ പിതാവിനും പുകവലിക്കാരനായ മകനും ശ്വാസകോശ അർബുദം വരാവുന്നതാണ്​. മദ്യപാനത്തിന്റെ കാര്യത്തിലും ഇതു സംഭവിക്കാം.

പരിശോധനകളിലൂടെ നേരത്തെ കണ്ടെത്താം

വ്യാപകമായി കണ്ടുവരുന്ന ചില അർബുദങ്ങൾ പതിവായ ആരോഗ്യ പരിശോധനകളിലൂടെ ഇന്ന്​ നേരത്തേ കണ്ടെത്താം​. നിലവിൽ സ്​തനം, ഗർഭാശയമുഖം, വൻകുടൽ, ശ്വാസകോശം എന്നിവിടങ്ങളിലെ അർബുദമാണ്​ പ്രാരംഭദശയിൽതന്നെ കണ്ടെത്താൻ കഴിയുന്നത്​.

മാമോഗ്രാം (mammogram) എന്ന പരിശോധനയിലൂടെ സ്​തനാർബുദത്തി​ന്റെ ആദ്യ ലക്ഷണങ്ങൾപോലും കണ്ടെത്താവുന്നതാണ്​. മിക്ക ആശുപത്രികളിലും ഇന്ന്​ ലഭ്യമാകുന്ന ലളിതമായ ഒരുതരം എക്​സ്​-റേ പരിശോധനയാണിത്​. 50 വയസ്സുകഴിഞ്ഞ സ്​ത്രീകൾക്ക്​​ വർഷംതോറും ഈ പരിശോധന നടത്താൻ ഇപ്പോൾ നിർദേശിക്കുന്നുണ്ട്​.

ഗർഭാശയമുഖ അർബുദത്തിന്റെ കാര്യത്തിൽ പാപ്​ സ്​മിയർ (Pap smear) ഫലപ്രദമാണ്​. ഗർഭാശയമുഖത്തുള്ള കോ​ശങ്ങളുടെ പരിശോധനയിലൂടെ രോഗസാന്നിധ്യം തിരിച്ചറിയാം​. മലത്തിലുള്ള രക്തപരിശോധനയിലൂടെയും കൊളനോസ്​കോപ്പി (colonoscopy) വഴിയും വൻകുടലിലെ അർബുദം കണ്ടെത്താം​. കാമറ ഘടിപ്പിച്ച കുഴൽപോലുള്ള ഉപകരണം വൻകുടലിലേക്ക്​ പ്രവേശിപ്പിച്ചാണ്​ കൊളനോ സ്​കോപ്പി നടത്തുന്നത്​. മലശോധന, ദഹനം എന്നീ പ്രശ്​നങ്ങളുമായി ബന്ധപ്പെട്ട് എത്തുന്നവർക്കാണ്​ ഈ പരിശോധന നിർദേശിക്കാറുള്ളത്​.

ദീർഘകാലം നിരന്തരം പുകവലിക്കുന്നവരിൽ അർബുദം വരാനുള്ള സാധ്യത പരിഗണിച്ച്​ സി.ടി സ്​കാൻ പരിശോധനയിലൂടെ ​ശ്വാസകോശ അർബുദത്തിന്റെ സാന്നിധ്യം കണ്ടെത്താം. പുറമെ പുരുഷന്മാരിൽ കണ്ടുവരുന്ന പ്രോസ്​റ്റേറ്റ്​ കാൻസർ പി.എസ്​.എ എന്ന പ്രോസ്​റ്റേറ്റ്​ സ്​പെസിഫിക്​ ആന്റിജൻ (Prostate-Specific Antigen) ടെസ്​റ്റിലൂടെ കണ്ടെത്താവുന്നതാണ്​.

ജീവിതശൈലിയും കാരണമായേക്കാം

ദുശ്ശീലങ്ങൾക്ക്​ പുറമെ ചില ശീലങ്ങളും നമ്മെ രോഗത്തി​ന്റെ വഴിയിലേക്ക്​ നടത്തുന്നുണ്ട്​​. അതിൽ പ്രധാനപ്പെട്ടത്​ ഭക്ഷണരീതികളും വ്യായാമമില്ലായ്​മയും മാനസിക സംഘർഷങ്ങളും വ്യക്തികൾ ജീവിക്കുന്ന പരിസ്ഥിതിയുടെയും അന്തരീക്ഷത്തി​ന്റെയും പ്രത്യേകതകളുമാണ്​. അർബുദജനകവസ്തുക്കളുമായി (Carcinogens) നിരന്തര സമ്പർക്കം പുലർത്തുന്ന ജോലിയിൽ ഏർപ്പെടുന്നവർക്കും അർബുദം വരാനുള്ള സാധ്യതയുണ്ട്​.

മാനസിക സംഘർഷങ്ങൾ നിറഞ്ഞ ജീവിതം

നമ്മളി​പ്പോൾ ജീവിക്കുന്ന സാഹചര്യം പലതരത്തിലുള്ള മാനസിക സംഘർഷങ്ങൾ നിറഞ്ഞതാണ്​. ടെൻഷൻ അഥവാ മാനസിക സംഘർഷങ്ങൾ ഇല്ലാത്തവരായി ആരുമില്ല. മാനസികസംഘർഷങ്ങൾ ഒരു വ്യക്​തിയെ അർബുദ രോഗ​ത്തിലേക്ക്​ നയിക്കുമോ എന്ന ചോദ്യത്തിന്​ വ്യക്തമായ ഉത്തരം നൽകാൻ പ്രയാസമാണെങ്കിലും ചില രോഗികളിലെങ്കിലും രോഗം പിടിപെടുന്നതിന്​ മുന്നോടിയായി കടുത്ത മാനസിക സംഘർഷങ്ങളിലൂടെ കടന്നുപോയതായി കണ്ടെത്തിയിട്ടുണ്ട്.

അകാലത്തിൽ ഉറ്റവർ മരിച്ചുപോയവർ, സാമ്പത്തിക തകർച്ച നേരിട്ടവർ തുടങ്ങി കടുത്ത മാനസിക സംഘർഷങ്ങൾ അനുഭവിച്ചവരിൽ പലർക്കും പിന്നീട്​ രോഗം വന്ന്​ ചികിത്സകരുടെ മുന്നിലെത്താറുണ്ട്​.

സംഘർഷങ്ങൾ ലഘൂകരിക്കാനുള്ള മനഃശാസ്​ത്ര മാർഗങ്ങൾ അവലംബിച്ചും വ്യായാമം, പ്രാർഥന, യോഗ തുടങ്ങിയ മനസ്സിന്​ ശാന്തിയും സമാധാനവും നൽകുന്ന വഴികൾ തിരഞ്ഞെടുത്തും മാനസിക സംഘർഷങ്ങളെയും അതുവഴിയുള്ള ആരോഗ്യ പ്രശ്​നങ്ങളെയും ഒരു പരിധിവരെ പ്രതിരോധിക്കാം​.

അവഗണിക്കരുത് ഈ ലക്ഷണങ്ങളെ

നേരത്തെ തിരിച്ചറിഞ്ഞ്​ വിദഗ്​ധ ചികിത്സ നൽകുന്നതിലൂടെ ഇന്ന് വലിയൊരു ശതമാനം അർബുദ രോഗങ്ങളും പൂർണമായി സുഖപ്പെടുത്താം. എന്നാൽ, എങ്ങനെയാണ്​ രോഗം പ്രാരംഭഘട്ടത്തിൽ കണ്ടെത്തുക എന്ന ചോദ്യത്തിന്​ ഒറ്റവാക്കിൽ ഉത്തരം നൽകാൻ കഴിയില്ല.

ശരീരത്തി​ന്റെ ഏത്​ അവയവത്തെയും പിടിപെടാവുന്ന ഒരു രോഗമാണ്​ അർബുദം. അതുകൊണ്ടുതന്നെ രോഗം ബാധിക്കുന്ന അവയവങ്ങൾക്ക്​ അനുസരിച്ച്​ രോഗലക്ഷണങ്ങൾ വ്യത്യസ്​തമാകും. സ്​തനാർബുദത്തിന്​ സ്​തനങ്ങളിലെ മുഴയോ അസാധാരണ നിറംമാറ്റമോ പാടുകളോ വേദ​നയോ മുലക്കണ്ണുകളിലൂടെ രക്​തം അടക്കമുള്ള സ്രവങ്ങൾ വരുന്നതോ ആയിരിക്കും രോഗലക്ഷണം.

പുകവലിക്കുന്ന ഒരു വ്യക്തിക്ക്​ വിട്ടുമാറാത്ത ചുമയോ ശ്വസനപ്രശ്​നങ്ങളോ ആയിരിക്കും ലക്ഷണം. അന്നനാളത്തിന്​ അർബുദം വന്നാൽ ഭക്ഷണം ഇറക്കാൻ പ്രയാസവും കുടലിൽ അർബുദമുള്ളയാൾക്ക്​ കറുത്തനിറത്തിലുള്ള മലമോ മലത്തിൽ രക്​തമോ ആയിരിക്കും രോഗലക്ഷണം.

ശരീരത്തിൽ പ്രത്യ​ക്ഷപ്പെടുന്ന എല്ലാ രോഗലക്ഷണങ്ങളെയും അവഗണിക്കാതെ വൈദ്യപരിശോധനക്ക്​ വിധേയമാക്കുകയും അത്​ അർബുദമല്ല എന്ന്​ ഉറപ്പുവരുത്തുകയുമാണ്​ ചെയ്യേണ്ടത്​. അതേസമയം, ഒരു ചെറിയ സമയത്തിൽ ശരീരഭാരം ക്രമാതീതമായി കുറയുക, പ്രത്യേകിച്ച്​ കാരണങ്ങളില്ലാതെ കടുത്ത ക്ഷീണം, വിട്ടുമാറാത്ത പനി, വിശപ്പില്ലായ്മ, മൂക്കില്‍നിന്നോ വായില്‍നിന്നോ ഉള്ള രക്തസ്രാവം, കാരണമില്ലാത്ത വിളര്‍ച്ച, തുടർച്ചയായ അണുബാധ, പെട്ടെന്നുണ്ടാകുന്ന അപസ്മാരം, തലവേദന, ​​പ്രായത്തിന്​ യോജിക്കാത്ത കാഴ്ചപ്രശ്​നങ്ങൾ, ശബ്ദത്തില്‍ വരുന്ന മാറ്റങ്ങൾ, ആഹാരം വിഴുങ്ങുന്നതിനുള്ള ബുദ്ധിമുട്ട്, വായ്ക്കുള്ളിൽ വെളുത്തപാട പോലുള്ള ആവരണം, വേദനരഹിതമായ തടിപ്പുകൾ തുടങ്ങിയവ വിവിധ അർബുദങ്ങളുടെ ലക്ഷണങ്ങളാവാൻ സാധ്യതയുണ്ട്​. എന്നാൽ, ഇത്​ വിദഗ്​ധ പരിശോധനകളിലൂടെ സ്ഥിരീകരിക്കണം.

●