ത്രില്ലർ താളുകൾ

1

ബോറടിച്ച നേരത്ത് ബോർഹസിന്റെ1

കഥകൾ വായിച്ചപ്പോൾ

ജീവിതമൊരു ഷെർലോക്ഹോംസ് 2

നോവൽപോലെ തോന്നി.

2

മുന്നോട്ടുള്ള പ്രയാണം

ഡാവിഞ്ചി കോഡ്3 പോലെ

ദുരൂഹമായ നേരങ്ങളിലൊക്കെയുമുള്ളിലെ

അനുഭവങ്ങളുടെ എക്സ് റേ ഷീറ്റുകളിൽ

കാലം നിഴലിച്ചിരുന്നു.

3

കണ്ടതിനുള്ളിൽ കാണാത്തതുണ്ടെന്നും

കേട്ടതിനുള്ളിൽ കേൾക്കാത്തതുണ്ടെന്നുമോർക്കേ

ഉള്ളിലൊരു ജെയിംസ് ബോണ്ട് 4 ചിരിക്കുന്നുണ്ടായിരുന്നു.

4

ചിരി മാഞ്ഞ നേരങ്ങളിലൊക്കെയും

സിഡ്‌നി ഷെൽഡന്റെ5 വിജയനായകന്മാരെയോർത്ത്

ആശ്വസിക്കാറുണ്ടായിരുന്നു.

5

ഒടുവിൽ...

അഗതാ ക്രിസ്റ്റിയുടെ6 കഥകളിലെ

കൊലയാളിയെ പോലൊരാൾ

പലരുടെ വാക്കുകളിലും

ഒളിച്ചിരിക്കുന്നുണ്ടെന്ന്

മനസ്സിലായ നേരമവൾ

മറ്റൊരു ത്രില്ലർ കഥ

കുറിക്കുകയായിരുന്നു.