ന്യൂഡൽഹി: നടനും മോഡലുമായിരുന്ന സിദ്ധാർഥ് ശുക്ല വിടവാങ്ങി. 40 വയസ്സായിരുന്നു. 2019ലെ ബിഗ് ബോസ് സീസൺ 13 ജേതാവുമായിരുന്ന താരം ഇന്ന് രാവിലെയാണ് ബോളിവുഡിനെയും ആരാധകരെയും ഞെട്ടിച്ച് മരണത്തിന് കീഴടങ്ങിയത്. ഹൃദയാഘാതത്തെ തുടർന്ന് മുംബൈ കൂപർ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കഴിഞ്ഞ ദിവസം വരെ സമൂഹ മാധ്യമങ്ങളിൽ സജീവമായിരുന്നു. ടോക്യോ പാരാലിമ്പിക്സിൽ സുനിൽ ആന്‍റിലും അവാനി ലേഖരയും മെഡൽ നേടിയതിനെ അഭിനന്ദിച്ചായിരുന്നു അവസാനമായി ട്വീറ്റ് ചെയ്തത്.
മോഡലിങ് രംഗത്ത് കരിയർ തുടങ്ങിയ സിദ്ധാർഥ് ശുക്ല 2008ലെ ടി.വി പരിപാടിയായ 'ബാബുൽ കാ ആംഘേൻ ഛോട്ടീ നാ'യിൽ നായക വേഷത്തിലെത്തിയാണ് അഭിനയത്തിന് തുടക്കമിടുന്നത്. തുടർന്ന്, നിരവധി പരമ്പരകളിലൂടെ ടെലിവിഷൻ ലോകത്ത് ചിര പ്രതിഷ്ഠ നേടിയ താരം 'ബാലിക വധു'വിൽ നടി പ്രത്യുഷ ബാനർജിക്കൊപ്പം അഭിനയിച്ച് ്ശ്രദ്ധേയനായി. ബിഗ് ബോസ് സീസൺ 13നു പുറമെ 'ഖത്രോൻ കെ ഖിലാഡി 7'ലും ജേതാവായിരുന്നു.
ആലിയ ഭട്ടും വരുൺ ധവാനും മുഖ്യറോളിലെത്തിയ 'ഹംപ്റ്റി ശർമ കി ദുൽഹനിയ', ബിസിനസ് ഇൻ ഖസാകിസ്താൻ' എന്നിവയിലും വേഷമിട്ടു. അന്തരിച്ച ശുക്ലക്ക് മാതാവും രണ്ടു സഹോദരിമാരുമുണ്ട്.
അജയ് ദേവ്ഗൻ, അക്ഷയ് കുമാർകപിൽ ശർമ, മാധുരി ദീക്ഷിത്, ബിപാഷ ബസു, മാധവൻ തുടങ്ങി നിരവധി പ്രമുഖർ സിദ്ധാർഥ ശുക്ലക്ക് ആദരാഞ്ജലികളർപിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.