വികസനവഴിയിൽ ഇൻഡസ്​ട്രിയൽ ഏരിയ: സ്​ട്രീറ്റ് 33 ഇനി എക്സ്​പ്രസ്​ വേ ആകും

ദോഹ: ഇൻഡസ്​ട്രിയൽ ഏരിയയിലെ സ്​ട്രീറ്റ് 33 ഇനി എക്സ്​പ്രസ്​ വേക്കായി വഴിമാറും. സ്​ട്രീറ്റ് 33നെ എക്സ്​പ്രസ്​ വേ ആക്കി ഉയർത്തുന്നതിനുള്ള നിർമാണ പ്രവർത്തനങ്ങൾക്ക് പൊതുമരാമത്ത് വകുപ്പ് അശ്ഗാൽ കഴിഞ്ഞദിവസം തുടക്കംകുറിച്ചു. ഈസ്​റ്റ് ഇൻഡസ്​ട്രിയൽ സ്​ട്രീറ്റിൽ 33 ഈസ്​റ്റ് ഇൻറർചെയ്ഞ്ചിൽനിന്ന്​ വെസ്​റ്റ് ഇൻഡസ്​ട്രിയൽ സ്​ട്രീറ്റിലേക്കുള്ള അഞ്ചു കിലോമീറ്റർ ഭാഗമാണ് ഗതാഗതം സുഗമമാക്കുന്നതിെൻറ ഭാഗമായി എക്സ്​പ്രസ്​ വേ ആയി ഉയർത്തുന്നത്.

ഇരുഭാഗത്തേക്കും മൂന്നുവരിപ്പാതയിൽനിന്നും നാലുവരിപ്പാതയാക്കുന്നതോടെ മണിക്കൂറിൽ 16,000 വാഹനങ്ങളെ ഉൾക്കൊള്ളാൻ റോഡിനാകുമെന്ന് അശ്ഗാൽ അറിയിച്ചു. ഇതോടൊപ്പം അൽ കസ്സാറത് സ്​ട്രീറ്റ്, വെസ്​റ്റ് ഇൻഡസ്​ട്രിയൽ സ്​ട്രീറ്റ് എന്നിവിടങ്ങളിലായി രണ്ടു നിലകളുള്ള രണ്ടു പുതിയ ഇൻറർചെയ്​ഞ്ചുകളും നിർമിക്കുന്നുണ്ട്. 2022ൽ നിർമാണം പൂർത്തിയാകുന്നതോടെ ഇൻഡസ്​ട്രിയൽ ഏരിയയുടെ മധ്യത്തിലുള്ള ഹൈവേ മേഖലയിലെ ഗതാഗത രംഗത്ത് വലിയ പുരോഗതിക്ക് വഴിയൊരുക്കും. പ്രാദേശിക റോഡുകളിലെത്താതെതന്നെ ലക്ഷ്യസ്​ഥാനത്ത് വളരെ വേഗത്തിലെത്താനും പാത സഹായിക്കും.

ഇൻഡസ്​ട്രിയൽ ഏരിയ റോഡുമായി ബന്ധിപ്പിച്ചുള്ള സ്​ട്രീറ്റ് 33 ദോഹയിൽനിന്ന് ഇൻഡസ്​ട്രിയൽ ഏരിയയിലേക്കും ഈസ്​റ്റ്-വെസ്​റ്റ് ഇൻഡസ്​ട്രിയൽ സ്​ട്രീറ്റുകൾ, അൽ കസ്സാറത് സ്​ട്രീറ്റ് എന്നിവിടങ്ങളിലേക്കും സൽവാ റോഡ്, ജി റിങ് റോഡ് എന്നിവയിലേക്കും വളരെ വേഗത്തിൽ എത്താനുള്ള പാതയായി മാറും. രണ്ട് റൗണ്ട് എബൗട്ടുകൾ ഇൻറർചെയ്ഞ്ചുകളാക്കി ഉയർത്തുന്നതോടെ ദോഹയിൽനിന്ന് അൽ കസ്സാറത് സ്​ട്രീറ്റിലേക്കും തിരിച്ചുമുള്ള ഗതാഗതം എളുപ്പത്തിലാകും. കൂടാതെ, സമീപപ്രദേശത്തെ വ്യവസായശാലകളിലേക്കും വാണിജ്യ സ്​ഥാപനങ്ങളിലേക്കുമുള്ള ഗതാഗതവും ഇതോടെ സുഗമമാകും. വെസ്​റ്റ് ഇൻഡസ്​ട്രിയൽ ഏരിയയിലെ റൗണ്ട് എബൗട്ടിന് പകരം ഇൻറർചെയ്ഞ്ച് വരുന്നതോടെ ദോഹ, സൽവാ റോഡിലെ ബുസിദ്റ ഇൻറർചെയ്ഞ്ച്, എഫ് റിങ് റോഡിലെ അബു സില്ല ഇൻറർചെയ്്ഞ്ച് എന്നിവിടങ്ങളിൽനിന്ന് വെസ്​റ്റ് ഇൻഡസ്​ ട്രിയൽ ഏരിയയിലേക്ക് പുതിയ പാതയിലൂടെയുള്ള ഗതാഗതം എളുപ്പമാകും.