തമ്പുകൾ തിരിച്ചെത്തി;​ സംഘടിത ഇഫ്താറുകൾ സജീവം

ദമ്മാം: കോവിഡി​​ന്‍റെ ഇരുണ്ടകാലത്ത്​ നിന്നുപോയ ഇഫ്താർ തമ്പുകൾ തിരിച്ചെത്തിയത്​ സാധാരണക്കാരായ നോമ്പുകാർക്ക്​​ ആശ്വാസമാകുന്നു. ദമ്മാം ഇസ്​ലാമിക്​ സെന്‍ററി​ന്‍റെ നേതൃത്വത്തിലാണ്​ വിവിധ ദേശക്കാർക്ക്​ പ്രത്യേകമായി ഇഫ്താർ വിഭവങ്ങൾ വിളമ്പിയും വിജ്ഞാന ക്ലാസുകൾ സംഘടിപ്പിച്ചും തമ്പ് ഒരുക്കിയിരിക്കുന്നത്​. ഫാക്ടറികളിലും മറ്റും ജോലിചെയ്ത്​ തളർന്നെത്തുന്നവർക്കും തൊഴിൽരഹിതർക്കും ഉൾപ്പെടെ ആയിരക്കണക്കിന്​ സാധാരണക്കാർക്ക്​ ആശ്വാസം നൽകുന്നതാണ്​ ഇഫ്താർ തമ്പുകൾ. ഓരോ ദേശക്കാർക്കും പ്രത്യേകം തയാറാക്കിയ തമ്പുകളിൽ മാതൃഭാഷയിലുള്ള അറിവുകളും ഉപദേശങ്ങളും നിറഞ്ഞ ​പ്രസംഗങ്ങൾ കേൾക്കാനുള്ള അവസരവുമുണ്ട്​.

ഇഫ്താറുകൾക്ക്​ സുഹൃത്തുക്കളോടൊപ്പം പോയി നേരത്തെ ഇടംപിടിച്ച്​ ഒന്നിച്ചിരുന്ന്​ നോമ്പുതുറന്ന ഗൃഹാതുര അനുഭവങ്ങൾ ദീർഘകാലമായി പ്രവാസം തുടരുന്ന പലർക്കും ആദ്യകാല അനുഭവങ്ങളിൽപെട്ടതാണ്​. റമദാൻ വിരുന്നെത്തുന്ന സന്ദേശംകൂടിയായിരുന്നു ഈ തമ്പുകളുടെ നിർമാണംപോലും. ദമ്മാമിൽ പാസ്​പോർട്ട്​ ഓഫിസിന്​ സമീപമുള്ള വിശാലമായ ഗ്രൗണ്ടിലാണ്​ നേരത്തെ തമ്പുകൾ നിർമിച്ചിരുന്നത്​. എന്നാൽ, ഇവിടെ പുതിയ ഹൈപ്പർ മാർക്കറ്റ്​ ഉൾപ്പെടെയുള്ളതി​ന്‍റെ നിർമാണ പ്രവർത്തനങ്ങൾ ആരംഭിച്ചതോടെ മുഹമ്മദ് ബിൻ സഊദ് സ്ട്രീറ്റിൽ ശരീഅ കോടതിക്ക് സമീപമാണ്​ ഇത്തവണ തമ്പുകൾ സ്ഥാപിച്ചിട്ടുള്ളത്​. വൈകീട്ട്​ അഞ്ച്​ മുതൽ തമ്പുകൾ സജീവമാകും.

അയ്യായിരത്തിലധികം ആളുകൾക്കാണ്​ ഇവിടെ നോമ്പുതുറ വിഭവങ്ങൾ ഒരുക്കിയിട്ടുള്ളത്​. മലയാള വിഭാഗത്തിന്​ കീഴിലാണ്​ ഏറ്റവും സജീവമായ പ്രവർത്തനങ്ങൾ നടക്കുന്നതെന്ന്​ ഐ.സി.സി മലയാള വിഭാഗം മേധാവി അബ്​ദുൽ ജബ്ബാർ അബ്​ദുല്ല മദീനി പറഞ്ഞു. മലയാള വിഭാഗം ടെന്‍റിൽ ഇസ്​ലാമിക്​ എക്സിബിഷൻ, വിവിധ വിഷയങ്ങളിൽ ദിനേന ഉദ്ബോധന ക്ലാസുകൾ, പ്രശ്നോത്തരി മത്സരം, സമ്മാന വിതരണം എന്നിവ നടക്കും. വൈകീട്ട് നാല് മുതൽ മുതിർന്നവർക്കും കുട്ടികൾക്കും ഖുർആൻ പാരായണ ഹിഫ്​ദ്​ ക്ലാസുകൾ, മാർച്ച് 31 മുതൽ ഏപ്രിൽ ഏഴു​വരെ നിശാ വിജ്ഞാന സദസ്സ് തുടങ്ങി നിരവധി ദഅവ പദ്ധതികൾ ഐ.സി.സിയും ദമ്മാം ഇന്ത്യൻ ഇസ്​ലാഹി സെന്‍ററും സഹകരിച്ച് നടപ്പാക്കുമെന്നും മലയാള വിഭാഗം അറിയിച്ചു. ഇതിനായി സെന്‍റർ സന്നദ്ധ പ്രവർത്തകരുടെ വിപുലമായ സ്വാഗതസംഘവും രൂപവത്​കരിച്ചിട്ടുണ്ട്​.