ഇ​സ്രായേലിനെതിരെ അന്താരാഷ്​ട്ര നിയമം നടപ്പാക്കാൻ യു.എന്നിന്​ ഇനിയെന്താണ്​ വേണ്ടത്​ -സൗദി വിദേശകാര്യ മന്ത്രി

റിയാദ്​: അധിനിവേശം ഇല്ലാതാക്കി ഫലസ്​തീനും ഇസ്രായേലുമെന്ന ദ്വിരാഷ്​ട്ര പരിഹാരം നടപ്പാക്കുന്നത് തുടർച്ചയായ ആക്രമണങ്ങളിൽനിന്ന്​ മധ്യപൗരസ്​ത്യ മേഖലയെ മുക്തമാക്കി സുരക്ഷയും സ്ഥിരതയും കൈവരിക്കാനുള്ള അടിസ്ഥാന മാർഗമാണെന്നാണ്​​​ സൗദി അറേബ്യ വിശ്വസിക്കുന്നതെന്ന്​​ വിദേശകാര്യ മന്ത്രി അമീർ ഫൈസൽ ബിൻ ഫർഹാൻ. അതിനാണ്​ സംയുക്ത അറബ്-ഇസ്‌ലാമിക് മന്ത്രിതല സമിതി നോർവേ, യൂറോപ്യൻ യൂനിയൻ എന്നിവരോടൊപ്പം ദ്വിരാഷ്​ട്ര പരിഹാരം നടപ്പാക്കുന്നതിനുള്ള അന്താരാഷ്​ട്ര സഖ്യം ആരംഭിച്ചതെന്ന്​ അദ്ദേഹം വ്യക്തമാക്കി. ന്യൂയോർക്കിൽ യു.എൻ ജനറൽ അസംബ്ലിയുടെ 79-ാം സെഷനോടനുബന്ധിച്ച്​ ‘ഫലസ്തീനിലെ സുരക്ഷ’ എന്ന വിഷയത്തിൽ സുരക്ഷ കൗൺസിൽ സംഘടിപ്പിച്ച യോഗത്തിൽ സംസാരിക്കവേയാണ്​​ അമീർ ഫൈസൽ ത​െൻറ രാജ്യത്തി​െൻറ നിലപാണ്​ വ്യക്തമാക്കിയത്​.

സമാധാനത്തിനായി ഗൗരവമായ പങ്കാളിത്തം ലോകത്തെ മുഴുവൻ രാജ്യങ്ങളും തമ്മിൽ ആരംഭിക്കേണ്ട സമയമാണിതെന്നും മന്ത്രി പറഞ്ഞു. രക്ഷാസമിതിയിലെ അംഗങ്ങളോട് പ്രത്യേകിച്ച് ഫലസ്തീൻ രാഷ്​ട്രത്തെ ഇതുവരെ അംഗീകരിച്ചിട്ടില്ലാത്ത രാജ്യങ്ങളോട് ദ്വിരാഷ്​ട്ര പരിഹാരത്തെ പിന്തുണക്കാനും സഹവർത്തിത്വവും സുസ്ഥിരവും സമാധാനവും കൈവരിക്കാനുള്ള സാധ്യതകൾ സംരക്ഷിക്കാനും ആഹ്വാനം ചെയ്യുകയാണെന്നും വിദേശകാര്യ മന്ത്രി പറഞ്ഞു.

കിഴക്കൻ ജറുസലേം തലസ്ഥാനമായി 1967-ലെ അതിർത്തി പരികൽപനയെ അടിസ്ഥാനമാക്കി ഒരു സ്വതന്ത്ര ഫലസ്തീൻ രാഷ്​ട്രം സ്ഥാപിക്കുന്നതിനുള്ള സൗദി അറേബ്യയുടെ പ്രതിബദ്ധത അദ്ദേഹം ആവർത്തിച്ചു. ഗുരുതരമായ ഇസ്രയേൽ ലംഘനങ്ങളും വഷളായിക്കൊണ്ടിരിക്കുന്ന മാനുഷിക സാഹചര്യങ്ങളും കണക്കിലെടുത്ത് രക്ഷാസമിതിയുടെ മുൻഗണന ഫലസ്തീൻ പ്രശ്നത്തിനാകണമെന്നും അദ്ദേഹം ഊന്നിപ്പറഞ്ഞു. ഞങ്ങൾ സുരക്ഷാ കൗൺസിന്​ മുമ്പാകെ ഇതേ അടിയന്തര ഫലസ്തീൻ പ്രശ്നം ആവർത്തിച്ച് ഉന്നയിച്ചിട്ടുണ്ട്. കൗൺസിൽ ​ഗൗരവമായ നടപടിയെടുക്കാതെ മുന്നോട്ട്​ പോകുന്ന സാഹചര്യത്തിലും ഞങ്ങൾ നിലപാട്​ ആവർത്തിച്ച്​ വ്യക്തമാക്കി.

കഴിഞ്ഞവർഷം ഒക്ടോബർ മുതൽ നിർദേശിച്ച 10 പ്രമേയങ്ങളിൽ ആറ്​ കരട് പ്രമേയങ്ങളാണ്​ സുരക്ഷാസമിതി വീറ്റോ ചെയ്​തത്​. വെടിനിർത്തൽ നടപ്പാക്കുന്നതിനോ വിനാശകരമായ മാനുഷിക സാഹചര്യത്തെ അഭിസംബോധന ചെയ്യുന്നതിനോ യു.എൻ കൈക്കൊണ്ട തീരുമാനങ്ങൾക്കൊന്നും ഇതുവരെ കഴിഞ്ഞിട്ടില്ല. സമാധാനത്തിലേക്കുള്ള വിശ്വസനീയമായ ഒരു രാഷ്​ട്രീയ പാതക്ക്​ വഴിയൊരുക്കുന്നില്ല. പ്രതിസന്ധികൾ അവസാനിപ്പിക്കാനും അന്താരാഷ്​ട്ര നിയമം നടപ്പാക്കാനും സെക്യൂരിറ്റി കൗൺസിലിന് എന്താണ് വേണ്ടതെന്ന്​ ഞങ്ങൾ അത്ഭുതത്തോടെ ​ചോദിക്കുകയാണ്​ -അദ്ദേഹം ധാർമികരോഷം പ്രകടിപ്പിച്ചു.

സുരക്ഷ കൗൺസിലിലെ അന്തർദേശീയ സമവായവും അഭിപ്രായവ്യത്യാസങ്ങളും തമ്മിലുള്ള വർധിച്ചുവരുന്ന വിടവ് വളരെ വ്യക്തമാവുകയാണ്​. ഇത് കൗൺസിലി​െൻറ പ്രകടനത്തെ തടസ്സപ്പെടുത്തുകയും അതി​െൻറ ഫലങ്ങളെ ദുർബലപ്പെടുത്തുകയും ചെയ്യും. സമാധാനം കൈവരിക്കുന്നതിന് അന്താരാഷ്​ട്ര സമൂഹത്തി​െൻറ, പ്രത്യേകിച്ച് സുരക്ഷ കൗൺസിലി​െൻറ സ്ഥാപനങ്ങളിൽനിന്നുള്ള ശാക്തീകരണവും തീരുമാനങ്ങൾ എടുക്കുന്നതിൽ ധൈര്യവും നടപ്പാക്കാനുള്ള പ്രതിബദ്ധതയും ആവശ്യമാണെന്നും വിദേശകാര്യ മന്ത്രി ഊന്നിപ്പറഞ്ഞു.

ഫലസ്തീനിലെ പ്രതിസന്ധി അവസാനിപ്പിക്കാനുള്ള നിയമപരവും ധാർമികവുമായ ഉത്തരവാദിത്തം സുരക്ഷ കൗൺസിലിനാണ്. എന്നാൽ അതി​െൻറ ചർച്ചകൾ രാഷ്​ട്രീയ പരിഗണനകളെ ആശ്രയിച്ചിരിക്കുന്നു. അത് ഉത്തരവാദിത്തങ്ങൾ നിർവഹിക്കുന്നതിൽ നിന്ന് കൗൺസിലി​നെ തടയുന്നു. ഫലസ്തീൻ രാഷ്​ട്രം സ്ഥാപിക്കുന്നതിനുള്ള ചർച്ചകൾക്കായി കാത്തിരിക്കണമെന്നും ഏകപക്ഷീയമായ നടപടികൾ സ്വീകരിക്കരുതെന്നും പറയുന്നവരുണ്ട്​. അവരോട്​ ഞങ്ങൾക്ക്​ പറയാനുള്ളത്​ ദ്വിരാഷ്​ട്ര പരിഹാരത്തി​െൻറ തത്വം തിരിച്ചറിയാൻ പോലും ഇസ്രായേൽ വിസമ്മതിക്കുമ്പോൾ എന്തുചെയ്യണമെന്നാണ്​? ഏതൊരു പരിഹാരത്തിനുമുള്ള സാധ്യതകളെ തുരങ്കംവയ്ക്കുന്ന ഏകപക്ഷീയമായ നടപടികളുമായി ഇസ്രായേൽ അതി​െൻറ അതിക്രമം തുടരുകയാണെന്നും​ സൗദി മന്ത്രി കുറ്റപ്പെടുത്തു.