ദു​ബൈ​ക്ക്​ പ്രി​യം പൊ​തു​ഗ​താ​ഗ​തം

ദു​ബൈ: എമിറേറ്റിലെ താമസക്കാർക്കും വിനോദ സഞ്ചാരികൾക്കും പ്രിയപ്പെട്ടതാണ്​ പൊതുഗതാഗത സംവിധാനങ്ങളെന്ന്​ വെളിപ്പെടുത്തി കണക്കുകൾ. ഓരോ വർഷവും പിന്നിടുമ്പോൾ വിവിധ പൊതുഗതാഗത സംവിധാനങ്ങളുടെ ഉപയോക്താക്കളുടെ എണ്ണം വർധിക്കുന്നതായാണ് റോഡ്​ ഗതാഗത അതോറിറ്റി (ആർ.ടി.എ) പുറത്തുവിട്ട റിപ്പോർട്ട്​ വ്യക്തമാക്കുന്നത്​. ഈ വർഷം ജൂൺ വരെയുള്ള ആറു മാസങ്ങളിൽ 33.7 കോടി യാത്രക്കാർ പൊതുഗതാഗത സംവിധാനങ്ങൾ ഉപയോഗിച്ച്​ യാത്ര ചെയ്തതായി അധികൃതർ വെളിപ്പെടുത്തി.

ദുബൈ മെ​ട്രോ, ദുബൈ ട്രാം, ബസുകൾ, സ്മാർട്​ കാറുകൾ, ബസ്​ ഓൺ ഡിമാൻഡ്​, ടാക്സികൾ, സമുദ്ര ഗതാഗത സംവിധാനങ്ങളായ അബ്രകൾ, ഫെറി, വാട്ടർ ടാക്സി, വാട്ടർ ബസ് എന്നിവ ഉപയോഗപ്പെടുത്തിയ​വരുടെ ആകെ എണ്ണമാണിത്​. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച്​ 11 ശതമാനം വളർച്ചയാണ്​ യാത്രികരുടെ എണ്ണത്തിൽ രേഖപ്പെടുത്തിയിരിക്കുന്നത്​.

2022 ജൂൺ വരെ ആറുമാസം 30.4 കോടി യാത്രക്കാരാണ്​ ഈ സംവിധാനങ്ങൾ ഉപയോഗിച്ചത്​. നിലവിൽ ദിവസവും ശരാശരി 18.6 ലക്ഷം പേർ പൊതുഗതാഗതം ഉപയോഗിക്കുന്നുണ്ട്​. കഴിഞ്ഞ വർഷമിത്​ 16.8 ലക്ഷം മാത്രമായിരുന്നു. ദുബൈ മെട്രോയും ടാക്സിയുമാണ്​ ഏറ്റവും കൂടുതൽ യാത്രക്കാരെ ആകർഷിക്കുന്നത്​.

ആകെ യാത്രക്കാരിൽ 36.5 ശതമാനം പേരും മെട്രോ സേവനങ്ങൾ ഉപയോഗപ്പെടുത്തിയതാണ്​. 29 ശതമാനം യാത്രക്കാർ ദുബൈ ടാക്സി ഉപയോഗിച്ചവരുമാണ്​. 24.5 ശതമാനം ആളുകളാണ്​ ബസ്​ യാത്രക്കാർ. ആറുമാസ കാലയളവിലെ ഏറ്റവും തിരക്കേറിയ മാസം മാർച്ചാണ്​. ആറു കോടി പേരാണ്​ മാർച്ചിൽ മാത്രം പൊതുഗതാഗതം ഉപയോഗപ്പെടുത്തിയത്​.

ദുബൈയിലെ സാമ്പത്തിക മേഖലയുടെ ഉണർവാണ്​ വർധിച്ച യാത്രക്കാരുടെ എണ്ണം വ്യക്തമാക്കുന്നതെന്ന്​ ആർ.ടി.എ ബോർഡ്​ ഓഫ്​ ഡയറക്​ടേഴ്​സ്​ ചെയർമാനും ഡയറക്ടർ ജനറലുമായ മത്വാർ അൽ തായർ പറഞ്ഞു. പൊതുഗതാഗതം പ്രോത്സാഹിപ്പിക്കുന്നതിന്​ ആർ.ടി.എ നടപ്പാക്കിയ പദ്ധതികൾ വിജയകരമായതും കണക്കുകൾ വ്യക്തമാക്കുന്ന വസ്തുതയാണ്​. സംയോജിത ഗതാഗത സംവിധാനങ്ങൾ എമിറേറ്റിലെ സഞ്ചാരത്തിന്‍റെ നട്ടെല്ലായി തീർന്നിരിക്കുന്നു -അദ്ദേഹം കൂട്ടിച്ചേർത്തു.

മെട്രോയിൽ 12.34 കോടി യാത്രക്കാർ

ദുബൈയിൽ ഏറ്റവും കൂടുതൽ ഉപയോഗപ്പെടുത്തുന്ന ദുബൈ മെ​ട്രോ സർവിസ്​ വഴി ആറു മാസത്തിൽ യാത്ര ചെയ്തവരുടെ എണ്ണം 12.34 കോടിയാണ്​. റെഡ്​, ഗ്രീൻ ലൈനുകളിൽ സഞ്ചരിച്ച ആകെ യാത്രക്കാരുടെ എണ്ണമാണിത്​. ഏറ്റവും കൂടുതൽ യാത്രക്കാർ കടന്നുപോയത്​ ബുർജുമാൻ, യൂനിയൻ സ്​റ്റേഷനുകൾ വഴിയാണ്​. ബുർജുമാൻ 72.5 ലക്ഷവും യൂനിയൻ 54 ലക്ഷം യാത്രക്കാരുമാണ്​ ഉപയോഗപ്പെടുത്തിയത്​.

റെഡ്​ ലൈനിൽ എറ്റവും തിരക്കേറിയ സ്​റ്റേഷൻ അർ റിഗ്ഗയാണ്​. മാൾ ഓഫ്​ എമിറേറ്റ്​സ്​, ബുർജ്​ ഖലീഫ/ദുബൈ മാൾ സ്​റ്റേഷനുകളാണ്​ പിന്നാലെയുള്ളത്​. ​ഗ്രീൻ ലൈനിൽ ശറഫ്​ ഡി.ജി സ്​റ്റേഷനിലാണ്​ ഏറ്റവും കൂടുതൽ യാത്രക്കാർ കടന്നുപോയത്. ബനിയാസ്​, സ്​റ്റേഡിയം സ്​റ്റേഷനുകളാണ്​ പിന്നാലെയുള്ളത്​.

ദുബൈ ട്രാം വഴി ആറുമാസത്തിൽ കടന്നുപോയ യാത്രക്കാരുടെ എണ്ണം 42 ലക്ഷമാണ്​. 8.3 കോടി യാത്രക്കാരാണ്​ ബസുകൾ ഉപയോഗപ്പെടുത്തിയത്​. സമുദ്ര ഗതാഗത മാർഗങ്ങൾ ഉപയോഗപ്പെടുത്തിയത്​ 91 ലക്ഷം പേരാണ്​.