പ്രതീകാത്മക ചിത്രം
ന്യൂഡൽഹി: സി.പി.എമ്മിന്റെ 23ാം പാർട്ടി കോൺഗ്രസ് കണ്ണൂരിൽ. ഡൽഹിയിൽ നടന്ന കേന്ദ്ര കമ്മിറ്റിയിലാണ് പാർട്ടി കോൺഗ്രസ് കേരളത്തിൽ നടത്താൻ തീരുമാനമായത്. ഒമ്പത് വർഷത്തിന് ശേഷമാണ് കേരളത്തിൽ വെച്ച് പാർട്ടി കോൺഗ്രസ് നടക്കാൻ പോകുന്നത്. 2012ൽ കോഴിക്കോട് നഗരത്തിൽ വെച്ചായിരുന്നു 20ാം പാർട്ടി കോൺഗ്രസ്. 2018ൽ ഹൈദരാബാദിൽ വെച്ചായിരുന്നു 22ാം പാർട്ടി കോൺഗ്രസ് നടന്നത്.
ഏപ്രിലായിരിക്കും പാർട്ടി കോൺഗ്രസ്. സംസ്ഥാന സമ്മേളനങ്ങൾ ഒക്ടോബറോട് കൂടി ആരംഭിക്കും. ഈ വർഷം ഏപ്രിലിൽ നടക്കാനിരുന്ന 23ാം പാർട്ടി കോൺഗ്രസ് കോവിഡ് പ്രതിസന്ധിയും കേരളം, പശ്ചിമബംഗാള്, തമിഴ്നാട്, അസം സംസ്ഥാനങ്ങളിലെ അസംബ്ലി തെരഞ്ഞെടുപ്പുകളും കണക്കിലെടുത്താണ് 2022 ലേക്ക് നീട്ടിയത്.
കോവിഡ് സാഹചര്യത്തിൽ പാർട്ടി സമ്മേളനങ്ങൾ എങ്ങനെ നടത്തും എന്ന കാര്യം ആശങ്കയുണ്ടാക്കുന്നുണ്ട്. നിലവിലെ രാഷ്ട്രീയ സാഹചര്യവും ബംഗാൾ, കേരള നിയമസഭ തെരഞ്ഞെടുപ്പ് ഫലങ്ങളും കേന്ദ്രകമ്മിറ്റി വിശദമായി പരിശോധിച്ചു. ത്രിപുരയിൽ നടക്കാൻ പോകുന്ന തെരഞ്ഞെടുപ്പ് ഒരുക്കങ്ങളെ കുറിച്ചും യോഗത്തിൽ ധാരണയായി. തലമുറമാറ്റമടക്കം കേരളത്തിൽ നടപ്പാക്കിയ പരിഷ്കാരങ്ങളും കേന്ദ്രകമ്മിറ്റി ശരിവച്ചു.
ബംഗാൾ ഘടകത്തിനെതിരെ യോഗത്തിൽ വിമർശനമുയർന്നു. കോൺഗ്രസുമായുള്ള സഖ്യം വേണ്ടായിരുന്നുവെന്നാണ് അഭിപ്രായമുയർന്നത്. സംസ്ഥാനത്ത് പാർട്ടിക്ക് തിരിച്ചുവരാൻ വേണ്ട കാര്യങ്ങൾ എന്താണെന്ന് പാർട്ടി യോഗങ്ങളിൽ ചർച്ച ചെയ്യാൻ നിർദേശമുണ്ട്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.