മായാവതി ബംഗ്ലാവ്​ ഒഴിഞ്ഞു; ആഢംബര ബംഗ്ലാവും ഒഴിയണമെന്ന്​ സർക്കാർ 

ലക്​നോ: മുൻ മന്ത്രിമാർ സർക്കാർ ബംഗ്ലാവുകൾ ഒഴിയണമെന്ന സുപ്രീം കോടതി ഉത്തരവി​​​െൻറ പശ്​ചാത്തലത്തിൽ യു.പി മുൻ മുഖ്യമന്ത്രി മായാവതി ത​​​െൻറ ബംഗ്ലാവി​​​െൻറ താക്കോലുകൾ സ്​പീഡ്​ പോസ്​റ്റ്​ വഴി സർക്കാറിലേക്ക്​ അയച്ചുകൊടുത്തു. മുൻ മുഖ്യമന്ത്രി എന്ന നിലയിൽ മായാവതിക്ക്​ അനുവദിച്ച ബംഗ്ലാവി​​​െൻറ താക്കോലാണ്​ നൽകിയത്​. എസ്​റേററ്റ്​ ഒാഫീസർമാർ താക്കോൽ സ്വീകരിക്കാൻ വിസമ്മതിച്ചതിനെ തുടർന്നാണ്​ താക്കോൽ സ്​പീഡ്​ പോസ്​റ്റ്​ വഴി അയച്ചു കൊടുത്തത്​. 

സുപ്രീം കോടതി വിധി അനുസരിച്ചുവെന്ന്​ ബി.എസ്​.പി അവകാശപ്പെടു​േമ്പാഴും സർക്കാറി​​​െൻറ നിർബന്ധമാണ്​ ബംഗ്ലാവുകൾ ഒഴിയാനുള്ള മായാവതിയുടെ തീരുമാനത്തിന്​ പിറകിലെന്നാണ്​ റിപ്പോർട്ടുകൾ. ഇൗ ബംഗ്ലാവ്​ മാത്രം ഒഴിഞ്ഞാൽ പോരെന്നാണ്​ സർക്കാർ നിലപാട്​. ലക്​നോവിലെ ഏറ്റവും പ്രമുഖമായ മാൾ അവന്യൂവിലെ 10 മുറി ആഢംബര ബംഗ്ലാവ്​ മായാവതിയാണ്​ ഉപയോഗിക്കുന്നത്​. ഇൗ ബംഗ്ലാവും​ ഒഴിയണമെന്നും​ സർക്കാർ ആവശ്യ​െപ്പട്ടിട്ടുണ്ട്​​. 

മാൾ അവന്യൂവിലെ ആഢംബര ബംഗ്ലാവ്​ ബി.എസ്​.പി സ്​ഥാപകൻ കാൻഷിറാമി​​​െൻറ സ്​മാരകമാണെന്നാണ്​ മായാവതിയുടെ അവകാശവാദം. ശ്രീ കാൻഷി റാംജി യാദ്​ഗാർ വിശ്രം സ്​ഥൽ എന്ന ബോർഡും​ ബംഗ്ലാവിന്​ മുന്നിൽ ബി.എസ്​.പി സ്​ഥാപിച്ചിട്ടുണ്ട്​. എന്നാൽ ഒഴിയേണ്ട ബംഗ്ലാവുകളുടെ പട്ടികയിൽ ഇതും ഉ​ൾപ്പെടുമെന്ന്​ സർക്കാർ പറയുന്നു. 

ദിവസങ്ങൾക്ക്​ മുമ്പ്​ മുതിർന്ന ബി.എസ്​.പി നേതാവും മായാവതിയുടെ സഹായിയുമായ സതീഷ്​ ചന്ദ്ര മിശ്ര മുഖ്യമന്ത്രി യോഗി ആദിത്യനാഥിനെ കണ്ട്​ അഞ്ചുപേജുള്ള കത്ത്​ കൈമാറിയിരുന്നു. സർക്കാർ രേഖകൾ സഹിതം നൽകിയ കത്ത്​ ഇൗ ബംഗ്ലാവ്​ മായാവതി ഒഴിയേണ്ടതില്ലെന്ന്​ വ്യക്​തമാക്കുന്നതാണെന്നായിരുന്നു സതീഷ്​ ചന്ദ്രയുടെ അവകാശ വാദം. 

2011ൽ മായാവതി മുഖ്യമന്ത്രിയായിരുന്നപ്പോൾ ബംഗ്ലാവ്​ കാൻഷിറാം സ്​മാരകമാക്കിയെന്ന്​ തെളിയിക്കുന്നതാണ്​ രേഖകൾ. മായാവതി ബംഗ്ലാവിലെ രണ്ടു മുറികൾ മാത്രമാണ്​ ഉപയോഗിക്കുന്നതെന്നും ബംഗ്ലാവി​​​െൻറ സംരക്ഷണ ചുമതല നിർവഹിക്കുന്നത്​ അവരാണെന്നും ബി.എസ്​.പി പറഞ്ഞു. 

സുപ്രീം കോടതി വിധിയു​െട പശ്​ചാത്തലത്തിൽ മായാവതിക്കും അഖിലേഷ്​ യാദവിനുമടക്കം നാല്​ മുൻ മുഖ്യമന്ത്രിമാർക്ക്​ 15 ദിവസത്തിനകം ബംഗ്ലാവുകൾ ഒഴിയണമെന്നാവശ്യപ്പെട്ട്​ സർക്കാർ നോട്ടീസ്​ അയച്ചിരുന്നു.  മായാവതി നോട്ടീസ്​ അനുസരിക്കുമെന്നാണ്​ കരുതുന്നതെന്നും അധികൃതർ പറഞ്ഞു.