പാലക്കാട്: ഒറ്റപ്പാലം കോടതി പരിസരത്ത് മാധ്യമപ്രവര്‍ത്തകരെ ആക്രമിച്ച കേസില്‍ രണ്ട് ആർ.എസ്.എസ് പ്രവര്‍ത്തകര്‍ കീഴടങ്ങി. ആർ.എസ്.എസ് ജില്ലാ പ്രചാരകരായ തിരുവനന്തപുരം വട്ടിയൂര്‍ക്കാവ് സ്വദേശി വിഷ്ണു, സുമേഷ് എന്നിവർ ഷൊർണൂർ പൊലീസ് സ്റ്റേഷനിലെത്തിയാണ് കീഴടങ്ങിയത്. വിഷ്ണു ഉൾപ്പെടെ മൂന്നു പേർക്കെതിരെ സംഭവത്തിൽ വധശ്രമത്തിനു പൊലീസ് കേസെടുത്തിരുന്നു.
നെല്ലായിൽ സി.പി.എം–ആർ.എസ്.എസ് സംഘർഷവുമായി ബന്ധപ്പെട്ട കേസിൽ അറസ്റ്റിലായ ആർ.എസ്.എസ് പ്രവർത്തകരുടെ ദൃശ്യങ്ങൾ പകർത്തുന്നതിനിടെ കോടതി പരിസരത്തുവെച്ചാണ് മാധ്യമപ്രവർത്തകർക്ക് മർദനവും വധഭീഷണിയുമുണ്ടായത്. ആറ് ആർ.എസ്.എസ് പ്രവർത്തകരെ കോടതിയിലേക്ക് കൊണ്ടു പോകുമ്പോഴാണ് പ്രകോപനം കൂടാതെ മൂന്നുപേർ മാധ്യമപ്രവർത്തകനെ കൈയ്യേറ്റം ചെയ്തത്. ഇതു തടയാൻ ചെന്നപ്പോഴാണു മറ്റുള്ളവർ ആക്രമിക്കപ്പെട്ടത്. പൊലീസ് നോക്കിനിൽക്കെയായിരുന്നു സംഭവം.
ഏഷ്യാനെറ്റിലെ ശ്യാംകുമാര്‍, മാതൃഭൂമിയുടെ വി. അനൂപ്, റിപ്പോര്‍ട്ടര്‍ ചാനലിലെ ശ്രീജിത് ശ്രീകുമാര്‍ എന്നീ മാധ്യമപ്രവര്‍ത്തകരെയാണ് പ്രതികള്‍ക്കൊപ്പം വന്ന സംഘം ആക്രമിക്കുകയും കൊല്ലുമെന്നു ഭീഷണിപ്പെടുത്തുകയും ചെയ്തത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.