കളത്തട്ട്-മുരിക്കുംമൂട് റോഡ്​ നന്നാക്കുന്നില്ല; പ്രതിഷേധം ശക്​തമാകുന്നു​

27 ന് പ്രതിഷേധ സായാഹ്നം കായംകുളം: വർഷങ്ങളായി തകർന്ന് കിടക്കുന്ന കളത്തട്ട്-മുരിക്കുംമൂട് റോഡ്​ നന്നാക്കാത്തതിൽ പ്രതിഷേധം ശക്തമാക്കുന്നു. കുറ്റിത്തെരുവ് ജുമാ മസ്ജിദ്, മദ്​റസ, സ്കൂൾ, ഗ്യാസ് ഗോഡൗൺ ഉൾപ്പെടെ നിരവധി സ്ഥാപനങ്ങളിലേക്കുള്ളവരും റോഡിന്‍റെ ഇരുവശത്തെ താമസക്കാരുമാണ് പ്രയാസപ്പെടുന്നത്. മഴക്കാലത്ത് തോടായി മാറുന്ന റോഡ് വേനൽക്കാലത്ത് 'പൊടി ഉൽപാദന' കേന്ദ്രമാണ്. 19, 20, 22 വാർഡുകളിലൂടെ കടന്നുപോകുന്ന റോഡ് നന്നാക്കുന്നതിൽ അധികൃതർ ഗുരുതര അലംഭാവം കാണിക്കുന്നതായാണ്​ ആക്ഷേപം. ശാശ്വത പരിഹാരം ആവശ്യപ്പെട്ട് വിവിധ സംഘടനകളുടെ നേതൃത്വത്തിൽ 27ന് പ്രതിഷേധ സായാഹ്നം സംഘടിപ്പിച്ചിരിക്കുകയാണ്. വൈകീട്ട് നാലിന് മുരുക്കുംമൂട് ജങ്​ഷനിലാണ് പരിപാടി. കുറ്റിത്തെരുവ് ജമാഅത്ത് കമ്മിറ്റി , പൗരസമിതി, കടമ്പാട്ട് ക്ഷേത്ര കമ്മിറ്റി, പി.എം.സി റെസിഡന്റ് അസോസിയേഷൻ, മൈത്രി റെസിഡന്‍റ്​ അസോസിയേഷൻ, കേരള മുസ്‌ലിം ജമാഅത്ത്, എസ്.കെ.എസ്.എസ്.എഫ്, മന്നാനിയ യൂത്ത് ഫെഡറേഷൻ, ഓട്ടോ തൊഴിലാളി യൂനിയൻ, യുവധാര ക്ലബ്​ തുടങ്ങിയ സംഘടനകളാണ് നേതൃത്വം നൽകുന്നത്. റോഡിന്റെ ശോച്യാവസ്ഥ പരിഹരിക്കണമെന്ന ആവശ്യവുമായി പി.ഡി.പി മുനിസിപ്പൽ കമ്മിറ്റിയുടെ നേതൃത്വത്തിൽ നഗരസഭ ചെയർപേഴ്സൻ നിവേദനം നൽകി. പ്രസിഡന്‍റ്​ അബ്‌ദുൽ സത്താർ, എസ്.എം. താഹ, സതീഷ് ചന്ദ്രൻ എന്നിവർ നേതൃത്വം നൽകി. വർഷങ്ങളായി തകർന്നു കിടക്കുന്ന മുരിക്കുംമൂട് - ജുമാമസ്ജിദ് -കളത്തട്ട് റോഡിന്റെ ശോച്യാവസ്ഥ ഉടൻ പരിഹരിക്കാൻ അധികാരികൾ തയാറാകണമെന്ന് കുറ്റിത്തെരുവ് ജമാഅത്ത് കമ്മിറ്റിയും ആവശ്യപ്പെട്ടു. നടപടിയില്ലെങ്കിൽ ജനകീയ സമരം സംഘടിപ്പിക്കാനും തീരുമാനിച്ചു. പ്രസിഡന്‍റ്​ ഇ. സുധീർ അധ്യക്ഷത വഹിച്ചു. ഫസൽ റഹ്​മാൻ, സുബൈർ കുന്നേൽ, എ.ജെ.ആർ. ജലാലുദ്ദീൻ, സക്കീർഹുസൈൻ, ഇടയിലപറമ്പിൽ നസീർ, വാളക്കോട് അബ്ദുൽ, ഷുക്കൂർ അൽ ബർക്കത്ത്, അബ്ദുൽ സത്താർ, സിദ്ദീഖ് തുടങ്ങിയവർ സംസാരിച്ചു. തെരഞ്ഞെടുപ്പ് കാലത്ത് പ്രദേശവാസികൾക്ക് കൊടുത്ത ഉറപ്പുകൾ പാലിക്കാൻ എം.എൽ.എയും ചെയർപേഴ്സനും തയാറാകണമെന്ന് എൽ.ഡി.എഫ് ഇലക്​ഷൻ കമ്മിറ്റി പ്രസിഡന്‍റായിരുന്ന ജനതാദൾ -എസ് ജില്ല സെക്രട്ടറി സലിം മുരുക്കുംമൂട് ആവശ്യപ്പെട്ടു. ചിത്രം:APLKY3ROAD തകർന്ന കളത്തട്ട്-മുരിക്കുംമൂട് റോഡ്​