ചെറിയ പെരുന്നാൾ ആഘോഷത്തിന്​ നാടൊരുങ്ങി

ആലപ്പുഴ: ത്യാഗനിർഭരമായ വ്രതനാളുകൾക്ക്​ വിടചൊല്ലിയെത്തുന്ന ചെറിയ പെരുന്നാൾ (ഈദുൽഫിത്​ർ) ആഘോഷത്തിനായി നാടൊരുങ്ങി. രണ്ടുവർഷത്തെ കോവിഡ്​ മഹാമാരിക്കുശേഷം വിശ്വാസികളുടെ ഒത്തുചേരലുകൾക്ക്​ അവസര​മൊരുക്കുന്ന ആഘോഷത്തിന്​ മാറ്റുകൂട്ടാനുള്ള ആവേശത്തിലാണ്​ വീടുകളും പള്ളികളും. ഒരു മാസത്തെ നീണ്ട വ്രതാനുഷ്ഠാനത്തിലൂടെയും വ്യത്യസ്തമായ ആരാധനാകർമങ്ങളിലൂടെയും മനസ്സും ശരീരവും ശുദ്ധമാക്കിയാണ്​ വിശ്വാസി സമൂഹം ഈദുൽ ഫിത്​റിനെ വരവേൽക്കുന്നത്. പുതുവസ്ത്രം ധരിച്ചും സുഗന്ധംപൂശിയും തക്ബീർധ്വനികൾ മുഴക്കിയാണ് വിശ്വാസികൾ പള്ളികളിലേക്കും ഈദ്ഗാഹുകളിലേക്കും ഒഴുകിയെത്തുന്നത്. ജില്ലയിലെ വിവിധകേന്ദ്രങ്ങളിൽ ഈദ്​ഗാഹ്​ ഒരുക്കിയിട്ടുണ്ട്​. പള്ളിക്ക് പുറത്ത് പ്രത്യേക പന്തലുകൾ ക്രമീകരിച്ചും​ പ്രാർഥനക്ക് സൗകര്യമൊരുക്കിയിട്ടുണ്ട്. നമസ്കാരശേഷം പരസ്പരം ആശ്ലേഷിച്ചും ഹസ്തദാനം നടത്തിയും ആശംസകൾ കൈമാറും. പുതുവസ്ത്രവും സാധനസാമഗ്രികളും വാങ്ങാൻ ഞായറാഴ്ച വിപണിയിൽ വൻതിരക്കാണ് അനുഭവപ്പെട്ടത്. മൈലാഞ്ചി അണിയുന്ന തിരക്കിലായിരുന്നു വീടകങ്ങൾ. സ്ത്രീകളും കുട്ടികളും വിപണിയിൽനിന്ന് ലഭിക്കുന്ന ട്യൂബ് മൈലാഞ്ചിയിൽ വ്യത്യസ്തങ്ങളായ ഡിസൈനുകൾ തീർത്തു.