പിടിയിലായ പ്രതി അജ്മൽ അന്വേഷണസംഘത്തോടൊപ്പം
കൊല്ലം: മൺറോത്തുരുത്തിൽ നിന്ന് 31കിലോ കഞ്ചാവുമായി യുവാവ് അറസ്റ്റിൽ. തൃക്കരുവ പള്ളിമുക്ക് മൂലയിൽ വീട്ടിൽ വാടകക്ക് താമസിക്കുന്ന അജ്മൽ (25) ആണ് കഞ്ചാവുമായി ജില്ല എക്സൈസ് എൻഫോഴ്സ്മെന്റ് ആൻഡ് ആന്റി നാർകോട്ടിക് സ്പെഷൽ സ്ക്വാഡിന്‍റെ പിടിയിലായത്.
കേരളത്തിലേക്ക് ആന്ധ്രാപ്രദേശ്, ഒഡിഷ സംസ്ഥാനങ്ങളിൽ നിന്ന് വൻതോതിൽ കഞ്ചാവ് കടത്തി വിൽപന നടത്തിവരുന്നവരിൽ പ്രധാനിയാണ് അജ്മൽ. കഞ്ചാവ് ജില്ലയിലെത്തിച്ച് വിവിധ ഭാഗങ്ങളിലുള്ള ലഹരി വിൽപനക്കാർക്ക് നൽകി അമിതലാഭം ഉണ്ടാക്കിവരികയായിരുന്നു ഇയാൾ. എക്സൈസ് സ്പെഷൽ സ്‌ക്വാഡ് കഴിഞ്ഞ ദിവസങ്ങളിൽ നടത്തിയ പരിശോധനയിൽ 42 കിലോ കഞ്ചാവുമായി ഒരാളെ അറസ്റ്റ് ചെയ്തിരുന്നു. 73 കിലോയോളം കഞ്ചാവാണ് രണ്ട് കേസുകളിലുമായി പിടികൂടിയത്.
സ്പെഷൽ സ്ക്വാഡിലെ എക്സൈസ് സർക്കിൾ ഇൻസ്പെക്ടർ എസ്.എസ്. ഷിജുവിന്റെ നിർദേശാനുസരണം കൊല്ലം സ്പെഷൽ സ്‌ക്വാഡ് എക്സൈസ് ഇൻസ്പെക്ടർ സി.പി. ദിലീപിന്‍റെ നേതൃത്വത്തിൽ നടത്തിയ പരിശോധനയിൽ അസി. എക്സൈസ് ഇൻസ്പെക്ടർ പ്രേംനസീർ, പ്രിവന്‍റീവ് ഓഫിസർ പ്രസാദ്കുമാർ, സിവിൽ എക്സൈസ് ഓഫിസർമാരായ ബി.എസ്. അജിത്, എം.ആർ. അനീഷ്, ജെ. ജോജോ, പി.എസ്. സൂരജ്, ബാലു എസ്.സുന്ദർ, വനിത സിവിൽ എക്സൈസ് ഓഫിസർ ജി. ഗംഗ എന്നിവർ പങ്കെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.