നിലമ്പൂർ-നഞ്ചൻകോട്​ പാത വേണം; ധർണയിൽ പ്രതിഷേധമിരമ്പി

കോഴിക്കോട്​: നിലമ്പൂർ-നഞ്ചൻകോട്​ ലിങ്ക്​ റെയിൽപാത യാഥാർഥ്യമാകുന്നത്​ അട്ടിമറിക്കുന്ന സംസ്ഥാന സർക്കാർ നടപടിക്കെതിരെ പ്രതിഷേധമിരമ്പി. നീലഗിരി- വയനാട്​ എൻ.എച്ച്​ ആൻഡ്​ റെയിൽവേ ആക്ഷൻ കമ്മിറ്റിയുടെ നേതൃത്വത്തിലാണ്​ കിഡ്​സൺ കോർണറിൽ ധർണ നടത്തിയത്​. എം.കെ. രാഘവൻ എം.പി ഉദ്​ഘാടനം ചെയ്​തു. നിലമ്പൂർ- നഞ്ചൻകോട്​ പാതക്ക്​ കേ​ന്ദ്രാനുമതിയുണ്ടായിട്ടും പിണറായി സർക്കാർ തലശ്ശേരി-മൈസൂരു പാതക്കായി താൽപ​ര്യം പ്രകടിപ്പിക്കുന്നതിൽ ദുരൂഹതയുണ്ടെന്ന്​ എം.കെ. രാഘവൻ പറഞ്ഞു. നഞ്ചൻകോട്​ പാതക്കായി സംസ്ഥാനത്തെ മുഴുവൻ എം.പിമാരും അടുത്ത പാർലമെന്‍റ്​ സമ്മേളനകാലത്ത്​ പ്രധാനമന്ത്രിയെയും റെയിൽവേ മന്ത്രിയെയും കണ്ട്​ സമ്മർദം ചെലുത്തണം. കക്ഷിരാഷ്​ട്രീയമില്ലാതെ മുന്നോട്ടുപോകണം. സംസ്ഥാനത്തിന്​ മാ​ത്രമല്ല, രാജ്യത്തിനുതന്നെ ഏറ്റവും അത്യാവശ്യമായ റെയിൽപാതയാണിത്​. കേന്ദ്രം ഭരിക്കുന്ന ബി.ജെ.പിയുടെ നേതാക്കളും നഞ്ചൻകോട്​ പാതക്കുവേണ്ടി സമ്മർദം ചെലുത്തണം. ഫറോക്കിൽനിന്ന്​ അങ്ങാടിപ്പുറത്തേക്കുള്ള പാതയുടെ നീക്കങ്ങളും ശക്​തമാക്കണമെന്നും എം.കെ. രാഘവൻ പറഞ്ഞു. പാരിസ്ഥിതിക പഠനം നടത്തി, പൊതുസമൂഹത്തിൽ ചർച്ച ചെയ്ത്​ ഈ പദ്ധതി നടപ്പാക്കണമെന്ന്​ മുഖ്യപ്രഭാഷണം നടത്തിയ പരിസ്ഥിതി പ്രവർത്തകൻ സി.ആർ. നീലകണ്ഠൻ പറഞ്ഞു. ഏറ്റവും കുറവ്​ പരിസ്ഥിതി ആഘാതമുള്ള റൂട്ടാണിത്​. കേന്ദ്രം അംഗീകരിച്ച പദ്ധതി വഴിയിലുപേക്ഷിക്കുകയാണ്​. വിശദ പദ്ധതിരേഖ തയാറാ​ക്കേണ്ടെന്ന്​ സംസ്ഥാന സർക്കാർ ഡൽഹി ​മെട്രോ റെയിൽ കോർപറേഷനോട് ​ ആവശ്യപ്പെട്ടത്​ സ്വാർഥതാൽപര്യം കാരണ​മാണെന്നും നീലകണ്ഠൻ കൂട്ടിച്ചേർത്തു. തലശ്ശേരി-മൈസൂരു പാതയു​ടെ സർവേക്കുമാത്രം 18 കോടി രൂപയാണ്​ ചെലവാക്കിയതെന്ന്​ സുൽത്താൻ ബത്തേരി എം.എൽ.എ ഐ.സി. ബാലകൃഷ്ണൻ പറഞ്ഞു. ബ്രിട്ടീഷുകാർ ഉപക്ഷേിച്ചതാണ്​ ഈ പദ്ധതി. തലശ്ശേരി-മൈസൂരു പാത യാഥാർഥ്യമാകില്ലെന്ന്​ മെട്രോമാൻ ഇ. ശ്രീധരനും വ്യക്​തമാക്കിയതാണ്​. കർണാടക പരിസ്ഥിതി അനുമതി നൽകില്ലെന്നായിരുന്നു അന്ന്​ മന്ത്രിയായിരുന്ന ജി. സുധാകരൻ നിയമസഭയിൽ പറഞ്ഞത്​. എന്നാൽ, ഡി.പി.ആർ തയാറാക്കി നൽകാനാണ്​ കർണാടക ആവശ്യപ്പെട്ടതെന്നും എം.എൽ.എ പറഞ്ഞു. സി.ഇ. ചാക്കുണ്ണി അധ്യക്ഷത വഹിച്ചു. vj1