മൂലമറ്റം: പകൽ ചൂട് കൂടിയതോടെ സംസ്ഥാനത്ത് വൈദ്യുതി ഉപഭോഗം കുത്തനെ കൂടി. ചൊവ്വാഴ്ച രാവിലെ എട്ടുവരെ 79.56 ദശലക്ഷം യൂനിറ്റാണ് ഉപഭോഗം. കഴിഞ്ഞവർഷം ഇതേസമയം 74.06 ദശലക്ഷം യൂനിറ്റായിരുന്നു. ചൂട് ആരംഭിച്ചപ്പോൾ തന്നെ ഉപഭോഗം കൂടിയത് വൈദ്യുതി ബോർഡിന്‍റെ കണക്കുകൂട്ടലുകൾക്ക് അപ്പുറമാണ്. ഫെബ്രുവരിയിൽ ഉപഭോഗം ഇത്രയും ഉയരുന്നത് ആദ്യമാണ്. എയർ കണ്ടീഷണറുകളുടെയും ഫാനുകളുടെയും ഉപയോഗം വർധിച്ചതാണ് കാരണം. ജനുവരി അവസാന ആഴ്ച ഉപഭോഗം ശരാശരി 75 ദശലക്ഷം യൂനിറ്റ് വരെ എത്തിയിരുന്നു. വേനൽ ശക്തമാകുന്നതോടെ ഉപഭോഗം ഇനിയും ഉയരും. 2021 മാർച്ച് 19ന് രേഖപ്പെടുത്തിയ 88.42 ദശലക്ഷം യൂനിറ്റ് വൈദ്യുതി ഉപഭോഗമാണ് കെ.എസ്.ഇ.ബിയുടെ സർവകാല റെക്കോഡ്. ഈ റെക്കോഡ് മറികടക്കുമെന്നാണ് കരുതുന്നത്.
ചൊവ്വാഴ്ചത്തെ വൈദ്യുതി ഉപഭോഗത്തിൽ 52.98 ദശലക്ഷം യൂനിറ്റും പുറത്തുനിന്ന് കൊണ്ടുവന്നതാണ്. സംസ്ഥാനത്തെ ഉൽപാദനം 26.57 ദശലക്ഷം യൂനിറ്റ് മാത്രമാണ്. വൈദ്യുതി വകുപ്പിന്‍റെ ഡാമുകളിൽ 79 ശതമാനം ജലമാണ് അവശേഷിക്കുന്നത്. ഇത് ഉപയോഗിച്ച് 3270.44 ദശലക്ഷം യൂനിറ്റ് വൈദ്യുതി ഉൽപാദിപ്പിക്കാം.
ഏറ്റവും വലിയ അണക്കെട്ടായ ഇടുക്കിയിൽ സംഭരണശേഷിയുടെ 82 ശതമാനം വെള്ളമാണ് ശേഷിക്കുന്നത്. പമ്പ 77 ശതമാനം, ഷോളയാർ 92, ഇടമലയാർ 76, കുണ്ടള 91, മാട്ടുപ്പെട്ടി 77, ആനയിറങ്കൽ 100, കുറ്റ്യാടി 55, പൊന്മുടി 68, ലോവർ പെരിയാർ 57, തര്യോട് 57 ശതമാനം എന്നിങ്ങനെയാണ് മറ്റ് ഡാമുകളിലെ കണക്ക്.
മൂലമറ്റം നിലയത്തിൽ തിങ്കളാഴ്ച 12.81 ദശലക്ഷം യൂനിറ്റ് വൈദ്യുതി ഉൽപാദിപ്പിച്ചപ്പോൾ ശബരിഗിരിയിൽ 4.51 ദശലക്ഷം, ഇടമലയാർ 1.59, ഷോളയാർ 1.22, പള്ളിവാസൽ 0.31, നേര്യമംഗലം 0.42, കക്കാട് 0.67, കുറ്റ്യാടി 1.75 ദശലക്ഷം എന്നിങ്ങനെയായിരുന്നു മറ്റ് പദ്ധതികളിലെ ഉൽപാദനം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.