പ്രവാസികൾ പറയുന്നു-'സൗകര്യം കൂട്ടണം സർ, ഈ കോവിഡ് കാലത്ത് ഞങ്ങളെ കൂട്ടംകൂടി നിർത്തരുത്'

കോഴിക്കോട്​: യു.എ.ഇയിലേക്കുള്ള യാത്രക്ക്​ റാപിഡ് പി.സി.ആർ ടെസ്റ്റ്​ നിർബന്ധമാക്കിയ സാഹചര്യത്തിൽ, കോഴിക്കോട്​ അടക്കം കേരളത്തി​ലെ വിമാനത്താവളങ്ങളിൽ ഇതിനുള്ള സൗകര്യങ്ങൾ വർധിപ്പിക്കണമെന്ന്​ ആവശ്യപ്പെട്ട്​ പ്രവാസികൾ. ആവശ്യത്തിന്​ ജീവനക്കാർ ഇല്ലാത്തതിനാൽ റാപിഡ്​ പി.സി.ആർ ടെസ്റ്റ്​ നടത്തുന്ന കൗണ്ടറിലെ തിരക്ക്​ ഏറെ പ്രയാസം സൃഷ്​ടിക്കുന്നു​ണ്ടെന്നും ഈ കോവിഡ്​ കാലത്ത്​ ആൾക്കൂട്ടം ഒഴിവാക്കുംവിധമുള്ള സൗകര്യങ്ങൾ ഏർപ്പെടുത്തണമെന്നുമാണ്​ പ്രവാസികൾ ആവശ്യപ്പെടുന്നത്​. ​

ഗൾഫിലേക്കുള്ള യാത്രക്കാർ ആറുമണിക്കൂർ മുമ്പ്​ വിമാനത്താവളത്തിൽ എത്തണമെന്ന്​ കർശന നിർദേശമുണ്ട്​. എന്നാൽ, ഒരേ സമയം രണ്ടും മൂന്നും എമിറേറ്റുകളിലേക്കുള്ള യാത്രക്കാർ ഒരുമിച്ച്​ എത്തു​േമ്പാൾ റാപിഡ്​ പി.സി.ആർ ടെസ്റ്റിന്​ ജീവനക്കാർ കുറവായതിനാൽ പ്രവാസികൾക്ക്​ മണിക്കൂറുകൾ കാത്തുനിൽക്കേണ്ടി വരികയാണ്​. കൈക്കുഞ്ഞുങ്ങളുമായി എത്തുന്നവർക്കടക്കം ഇത്​ ഏറെ ബുദ്ധിമുട്ടുകളാണ്​ സൃഷ്​ടിക്കുന്നത്​. ടെസ്റ്റ്​ റിസൾട്ട്​ ലഭിക്കാതെ ബോർഡിങ്​ പാസ്​ ലഭിക്കുകയില്ല. വിമാനം പുറപ്പെടുന്നതിന്​ ഒരു മണിക്കൂർ മുമ്പ്​ എയർലൈൻ കമ്പനികൾ കൗണ്ടർ അടക്കുമെന്നതിനാൽ പരിശോധനയും റിസൾട്ടും വൈകുന്നത്​ പ്രവാസികളെ ഏറെ സമ്മർദ്ദത്തിലാക്കുകയാണ്​.

കോഴിക്കോട്​ വിമാനത്താവളത്തിലെ റാപിഡ്​ പി.സി.ആർ കൗണ്ടറുകളിൽ ആകെ മൂന്ന്​ ജീവനക്കാർ ആണ്​ ഉള്ളത്​. സ്രവമെടുക്കാൻ രണ്ടുപേരും. ഒരേസമയം, മുന്നൂറിനടുത്ത്​ യാത്രക്കാർ എത്തു​േമ്പാൾ പരിശോധനക്ക്​ ഏറെ സമയമെടുക്കും. സ്വകാര്യ ലാബ്​ ഗ്രൂപ്പിനാണ്​ പരിശോധനയുടെ ചുമതല. ഇതിന്​ 2,500 രൂപയാണ്​ ഫീസ്​ ഈടാക്കുന്നത്​. കഴിഞ്ഞ ദിവസം കോഴിക്കോട്​ വിമാനത്താവളത്തിൽ നിന്ന്​ അബൂദബിക്ക്​ പോകാ​നെത്തിയ പൂനൂർ സ്വദേശി സാദിഖ് വേണാടി എന്ന പ്രവാസി പങ്കുവെച്ച അനുഭവം ഇങ്ങനെ-

കഴിഞ്ഞദിവസം രാത്രി 8.45നാണ്​ അബൂദബിയിലേക്ക്​ പോകാൻ കോഴിക്കോട്​ വിമാനത്താവളത്തിൽ എത്തുന്നത്​. പുലർച്ചെ 3.30നാണ്​ ഫ്ലൈറ്റ്​. ആറ്​ മണിക്കൂർ മുമ്പ്​ എത്തണമെന്ന കർശന നിർദേശമുള്ളതുകൊണ്ടാണ്​ 8.45ന്​ എത്തിയത്​. വിമാനത്താവളത്തിൽ എത്തിയപ്പോൾ വിമാന സമയം 5.15ലേക്ക്​ മാറ്റ​ിയെന്ന്​ അറിയുന്നത്​. വലിയ ഒരു കടമ്പയാണ്​ വിമാനത്താവളത്തിൽ കട​ക്കേണ്ടത്​. പോകേണ്ടത്​ യു.എ.ഇയിലേക്ക്​ ആയതിനാൽ കോവിഡ്​ റാപിഡ്​ പി.സി.ആർ ടെസ്റ്റ്​ ചെയ്യണം. അതും പുറപ്പെടുന്നതിന്‍റെ നാലുമണിക്കൂർ മുമ്പ്​.

അബൂദബിക്കുള്ള ഫ്ലൈറ്റിൽ ഞാനടക്കം 185 ആളുകൾ ഉണ്ട്. ഞാൻ എത്തിയ സമയം ഷാർജയിലേക്കുള്ള യാത്രക്കാർക്കുള്ള റാപിഡ് ടെസ്റ്റ് നടക്കുകയാണ്. അബൂദബി ഫ്ലൈറ്റ്​ വൈകി ആയതിനാൽ അർധരാത്രി 12 മണിക്ക്​ എത്താനാണ്​ എനിക്ക്​ ലഭിച്ച നിർദേശം. അതുപ്രകാരം 12 മണിക്ക്​ എത്തി​യപ്പോൾ ലഭിച്ച ടോക്കൺ 142. കാത്തുനിൽക്കുന്നതിനിടയിൽ അബൂദബി യാത്രക്കാർക്ക്​ റാപിഡ് ടെസ്റ്റ് ഉള്ളിൽ നിന്നാണെന്ന അറിയിപ്പ് ലഭിച്ചു. അരമണിക്കൂർ ക്യൂ നിന്ന ശേഷം ഉള്ളിൽ കയറി. വളരെ സങ്കടം തോന്നിയത് 185 പേർക്കും റാപിഡ്​ ടെസ്റ്റിനുള്ള രജിസ്ട്രേഷൻ നടത്താൻ മൂന്നുപേർ മാത്രമേയുള്ളൂ എന്ന്​ കണ്ടപ്പോഴാണ.്​ അപ്പോഴും ഷാർജയിലേക്കുള്ള യാത്രക്കാരുടേത്​ കഴിഞ്ഞിരുന്നില്ല. ഞങ്ങൾ കാത്തുനിന്നപ്പോൾ ദുബൈയി​േലക്കുള്ള യാത്രക്കാരുമെത്തി. അവരുടെ ഫ്ലൈറ്റ് രാവിലെ 7.35നാണ്​. അവരുടെയും റാപിഡ് ടെസ്റ്റ് ആരംഭിച്ചു. ഇത്രയും യാത്രക്കാർക്കുള്ള കൗണ്ടറിലുള്ളത്​ മൂന്നുപേർ. സ്രവം എടുക്കാൻ രണ്ടുപേർ. ഫീസ്​ 2500 രൂപയും.

റാപിഡ് ടെസ്റ്റ് 3.30ന്​ നടക്കുന്നു. ഫലം വന്നത്​ 4.30ന്​. പോകേണ്ട ഫ്ലൈറ്റ്​ 5.15നും. ഞങ്ങൾ എല്ലാം എത്ര പ്രയാസത്തിലായി എന്ന് അറിയാമോ? റാപിഡ് ടെസ്റ്റ്​ റിസൽട്ട് ഇല്ലാതെ ബോർഡിങ് പാസ് ലഭിക്കില്ല. ഒരു മണിക്കൂർ മുമ്പ്​ കൗണ്ടർ അടിക്കുകയും ചെയ്യും. കൈക്കുഞ്ഞുങ്ങളടക്കം എത്ര പേരാണ് ബുദ്ധിമുട്ടിലായത്? സംവിധാനം മാറ്റണം സർ, സൗകര്യം കൂട്ടണം. ഈ കോവിഡ് കാലത്ത് യാത്രക്കാരെ പുറത്തുള്ള ആളുകളുടെ കൂടെ നിർത്തരുത്. വാങ്ങുന്ന പണത്തിന്​ അനുസരിച്ചുള്ള സംവിധാനം ഒരുക്കണം.