കൊല്ലം: വാളത്തുങ്കലിൽ ഭാര്യയുടെയും മകളുടെയും ദേഹത്ത് ഗൃഹനാഥൻ ആസിഡ് ഒഴിച്ചു. വാളത്തുങ്കുൽ സ്വദേശി ജയനാണ് ആസിഡ് ആക്രമണം നടത്തിയത്. ചൊവ്വാഴ്ച വൈകിട്ടോടെയാണ് സംഭവം. ആക്രമണം കണ്ടുനിന്ന അയൽവാസികളായ രണ്ട് കുട്ടികൾക്കും ആക്രമണത്തിൽ ചെറിയ തോതിൽ പരിക്കേറ്റിട്ടുണ്ട്.
ജയന്‍റെ ഭാര്യ രജി, മകൾ ആദിത്യ(14) എന്നിവർക്കും അയൽവാസികളായ പ്രവീണ, നിരഞ്ജന എന്നിവർക്കുമാണ് പരിക്കേറ്റത്. രജിയെയും ആദിത്യയേയും തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
40 ശതമാനം പൊള്ളലേറ്റ ഭാര്യ രജിയുടെ നില ഗുരുതരമാണ്. രജി ലോട്ടറി വിൽപ്പനശാലയിൽ ജോലിക്ക് പോയതിനാണ് ജയൻ ആസിഡ് ആക്രമണം നടത്തിയതെന്ന് പൊലീസ് പറഞ്ഞു. ഭാര്യ ജോലിക്ക് പോയ സ്ഥലത്തെത്തി വഴക്കുണ്ടാക്കുക പതിവാണ്. സംശയരോഗിയാണ് ഇയാളെന്നും പൊലീസ് പറയുന്നു. വീടിന്‍റെ മതിലിനുമുകളിൽ നിന്ന് ജയൻ എഴുതിയ ഒരു കത്തും കണ്ടെടുത്തിട്ടുണ്ട്. ഞാൻ മരിക്കുകയാണെങ്കിൽ അതിന് കാരണം നിങ്ങളുടെ അമ്മയാണെന്നാണ് മക്കൾക്കെഴുതിയ കത്തിൽ പറയുന്നത്.
സംഭവത്തിൽ ഇരവിപുരം പോലീസ് കേസെടുത്തു. ആക്രമണത്തിന് ശേഷം ഒളിവിൽ പോയ ജയനു വേണ്ടി പോലീസ് അന്വേഷണം തുടരുകയാണ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.