മലയാളം വിത്ത് ഡച്ച് സ്റ്റൈൽ

10 മാസം മുമ്പ്​ നെതർലൻഡിൽ നിന്ന്​ ദുബൈയിലെത്തുമ്പോൾ യുക്രെയ്​ൻ ദമ്പതികളായ ദിമിദ്രോ സ്വിക്കിനും ഭാര്യ മരിയ ഡെൻസ്യൂയിക്കിനും കേരളത്തെ കുറിച്ചോ മലയാള​മെന്ന ഭാഷയെ കുറിച്ചോ ഒന്നും അറിയില്ലായിരുന്നു. പക്ഷെ, പത്തുമാസത്തിനിപ്പുറം അങ്ങനെയല്ല, മലയാളി പ്രവാസികളുടെ ‘ചങ്കായി’ മാറിയിരിക്കുകയാണീ ദമ്പതികൾ. മലയാളം ഒട്ടും അറിയില്ലെങ്കിലും മലയാള സിനിമയിലെ ചിരിയുണർത്തുന്ന രസകരമായ സംഭാഷണ ശകലങ്ങൾ കൂട്ടിയിണക്കിയുള്ള ഇവരുടെ ഇൻസ്​​റ്റഗ്രാം, ടിക്​ടോക്​ റീലൂകളാണ്​ ഗൾഫ്​ മലയാളികൾക്കിടയിൽ വൈറലായി മാറിയിരിക്കുന്നത്​. മമ്മുട്ടി, മോഹൻലാൽ, ശ്രീനിവാസൻ തുടങ്ങിയ മലയാള നടൻമാർ അഭിനയിച്ച സിനിമകളിലെ സംഭാഷണങ്ങളാണ്​ ഇവരുടെ റീലുകളിലെ ശ്രദ്ധേയ ആകർഷണം​​.

മാരിടൈം ലോജിസ്റ്റിക്സ്​ പ്രഫഷണലായ ദിമി​ദ്രോ ഭാര്യക്കും മകൾക്കുമൊപ്പം​ ജോലി ആവശ്യാർഥമാണ്​ ഒമ്പതു മാസം മുമ്പ്​ ദുബൈയിലെത്തുന്നത്​. സോഷ്യൽ മീഡിയ ഇൻഫ്ലുവൻസറാണ് 32കാരിയായ​ മരിയ. ഒമ്പതു വർഷ​ത്തോളം ഇരുവരും നെതർലണ്ടിലായിരുന്നു താമസം. അക്കാലത്തു തന്നെ മരിയക്ക്​ ലക്ഷത്തിനു മുകളിൽ ഇൻസ്റ്റ ഫോളേവേഴ്​സ്​ ഉണ്ടായിരുന്നു. അതോടൊപ്പം മികച്ച വ്ലോഗറും കൂടിയായിരുന്നു അവർ. നെതർലണ്ട്​ കൂടാതെ ജർമനി, യുക്രൈൻ, പോളണ്ട്​, റഷ്യ എന്നീ രാജ്യങ്ങളിൽ നിന്നുള്ളവരായിരുന്നു പ്രേക്ഷകരിൽ ഭൂരിഭാഗവും.

എന്നാൽ, യാത്രകൾ ഇഷ്ടപ്പെടുന്ന ഇരുവരും ഒരിടത്ത്​ സ്ഥിരമായി തങ്ങുന്ന പതിവില്ല. കുറച്ചു കാലം ഒരിടത്ത്​ താമസിച്ച​ ശേഷം മറ്റൊരിടം കണ്ടെത്തുകയാണ്​ രീതി​. ദുബൈയിലെത്തിയതും അങ്ങനെ തന്നെയാണ്​. ഓരോയിടത്തും വരുമാനത്തിനായി പുതു വഴികൾ തേടുന്നതും​ പല രീതിയിലായിരുന്നു. ദുബൈയിലെത്തിയ മരിയയുടെ സോഷ്യൽമീഡിയ ഇൻഫ്ലുവൻസർ കരിയർ വരുമാന മാർഗമാക്കുന്നതിനെ കുറിച്ചുള്ള ചിന്തയാണ്​ വ്യത്യസ്ത രീതിയിലുള്ള ഇൻസ്റ്റഗ്രാം റീലുകൾ എന്ന ആശയത്തിലെത്തിയതെന്ന്​ ദിമി​ദ്രോ വാട്​സാപ്പ്​ ചാറ്റിലൂടെ ഗൾഫ്​ മാധ്യ​മത്തോട്​ പറഞ്ഞു.

മലയാളികൾ ഏറെയുള്ള ദുബൈയിൽ എത്തിയ ഒരു വിദേശിയുടെ ഇംഗ്ലീഷ്​ ഭാഷയിലുണ്ടാകുന്ന മാറ്റത്തെ കുറിച്ചുള്ളതായിരുന്നു ആദ്യ വീഡിയോ. ദിമിദ്രി അഭിനയിച്ച 30 സെക്കൻഡ്​ ദൈർഘ്യമുള്ള ഈ വീഡിയോ മലയാളി പ്രവാസികൾ ഏ​റ്റെടുത്തതോടെ​ വൻ ഹിറ്റായി മാറി​. നിലവിൽ ഇൻസ്റ്റഗ്രാമിലും ടിക്​ടോക്കിലുമായി 13,0000 ഫോളോവേഴ്​സുണ്ട്​ ദിമിദ്രിക്ക്​​. തുടർന്ന്​ മലയാളത്തിൽ അഭിനയിച്ച്​ ഫലിപ്പിക്കാൻ കഴിയുന്ന രീതിയിലുള്ള വീഡിയോകൾക്കായി യൂട്യൂബിൽ തെരയുന്നതിനിടെയാണ്​ ചില മലയാള സിനിമകളിൽ ഒന്ന്​ കണ്ണിലുടക്കിയത്​. മറ്റ്​ ഭാഷകളെ അപേക്ഷിച്ച്​ മലയാളം കടും കട്ടിയാണെങ്കിലും ഒരു ആകർഷണീയത ആ വീഡിയോകൾക്കുണ്ടായിരുന്നതായും ദിമിദ്രോ പറഞ്ഞു.

ഭാര്യ മരിയയും വീഡിയോകളിൽ ദിമിദ്രിക്കൊപ്പം അഭിനയിക്കുന്നുണ്ട്​. ഈ വീഡിയോകൾ മരിയയുടെ ഇൻസ്റ്റപേജിൽ അപ്​ലോഡ്​ ചെയ്തതോടെ ഫോളോവേഴ്​സിന്‍റെ എണ്ണം കുതിച്ചുയർന്നു. നിലവിൽ രണ്ടര ലക്ഷമാണ്​ ഫോളോവേഴ്​സ്​. മറ്റ്​ ഇൻസ്റ്റവീഡിയോകളിൽ നിന്ന്​ വ്യത്യസ്തമായി ആസ്വാദകരെ ആകർഷിക്കാവുന്ന വിത്യസ്​ത ആശയങ്ങൾക്കാണ്​ ഇവർ പ്രാധാന്യം നൽകാറുള്ളതെന്നതാണ്​ പ്ര​ത്യേകത. കോമഡി സീനുകളിലായിരുന്നു ദിമിദ്രി കൂടുതൽ അഭിനയിച്ച​ത്​. എന്നാൽ ഫിറ്റ്​നസ്​, പാരന്‍റിങ്​, ലൈഫ്​സ്​റ്റൈൽ എന്നിവ കൂടിക്കലർന്ന വീഡിയോകളിലാണ്​ മരിയ ശ്രദ്ധകേന്ദ്രീകരിച്ചിരുന്നത്​. ഇരുവരുടെയും വീഡിയോൾ വമ്പൻ ഹിറ്റായതോടെയാണ്​ മകൾ മിയയേയും വളർത്തു മൃഗങ്ങളേയും വീഡിയോയിൽ ഉൾപ്പെടുത്താൻ തുടങ്ങിയതെന്ന്​ ദിമിദ്രി പറഞ്ഞു.

34കാരനായ ദിമിദ്രിയുടെയും മരിയയുടെയും ജൻമസ്ഥലം യുക്രൈനാണ്​. 13 വർഷം മുമ്പാണ്​ ഇരുവരും വിവാഹിതരായത്​. 2014ൽ നെതർലണ്ടിലേക്ക്​ ചേക്കേറുകയും ഡച്ച്​ പൗരത്വം നേടുകയുമായിരുന്നു. 2022ൽ ആണ്​ യു.എ.ഇയിലേക്ക്​ വരുന്നത്​. ഇൻസ്റ്റഗ്രാം വീഡിയേകളി​ലൂടെ മാത്രം കണ്ടു പരിചയിച്ച കേരളത്തെ ഇപ്പോൾ ഏറെ ഇഷ്​പ്പെടുന്നുണ്ട്​​. മുമ്പ്​ നാവികനായി ജോലി നോക്കിയിരുന്ന കാലത്ത്​ ജോലിയുടെ ആവശ്യാർഥം മുംബൈ, സിക്ക, ഹസിറ തുടങ്ങിയ സ്ഥലങ്ങൾ സന്ദർശിച്ചിട്ടുണ്ടെങ്കിലും കേരളം ഇതുവരെ കണ്ടിട്ടുണ്ടായിരുന്നില്ല. പിന്നീട്​, മലയാളി സുഹൃത്തുക്കൾ അയച്ച വീഡിയോയിലൂടെയാണ്​ കേരളത്തെ അടുത്തറിയുന്നത്​.

വെറും ഒരു വർഷത്തിനുള്ളിൽ ഒരു ഇൻസ്റ്റഗ്രാം പേജ്​ വിജയിപ്പിക്കുകയെന്നത് അത്ര​ എളുപ്പമുള്ള കാര്യമല്ലെന്നാണ്​ ദിമി​ദ്രിയുടെ വിലയിരുത്തൽ. വീഡിയോയുടെ ഉള്ളടക്കത്തിൽ കാര്യമായി ശ്രദ്ധിച്ചാൽ മാത്രമേ ഇത്​ സാധ്യമാകൂ. ഈ രംഗത്തേക്ക്​ കടന്നുവരാൻ ആഗ്രഹിക്കുന്ന​വരോടും ഇത്​ തന്നെയാണ്​ പറയാനുള്ളത്​. ഇഷ്ടമുള്ള ഉള്ളടക്കം തെരഞ്ഞെടുക്കാം. പക്ഷെ, അതിൽ ശ്രദ്ധകേന്ദ്രീകരിക്കുന്നതോടൊപ്പം കാത്തിരിക്കൻ ക്ഷമയും ഉണ്ടാവണം. വീഡിയോ ചെയ്യാൻ ഉപയോഗിക്കുന്ന ക്യാമറകളുടെ ഗുണനിലവാരവും വളരെ പ്രധാനമാണ്​. എപ്പോഴും ക്യാമറയുടെ ലെൻസ്​ ക്ലീൻ ചെയ്യാൻ ശ്രദ്ധിക്കണം. അല്ലാത്തപക്ഷം വീഡിയോകളുടെ മികവ്​ നഷ്ടമാവും. തുടർച്ചയായി വീഡിയോകൾ അപ്​ലോഡ്​ ചെയ്യുകയെന്നതാണ്​ മറ്റൊരു പ്രധാന കാര്യം. കൂടുതൽ പേരും വീഡിയോ ചെയ്യാൻ ​ആഗ്രഹിക്കുന്നവരാണ്​. എന്നാൽ, അത്​ തുടർന്നു പോകുന്നവർ വിരളമാണ്​. തുടർച്ചയായി മികച്ച വീഡിയോകളിലൂടെ മാത്രമേ ആസ്വാദകരെ ആകർഷിക്കാനാവൂവെന്നും ദിമിദ്രി പറഞ്ഞുവെക്കുന്നു.