ആരോഗ്യമഹത്വം പറഞ്ഞ്​ ഭാരത്​ ജോഡോ യാത്ര

ബംഗളൂ​രു: പതിവ്​ രാഷ്ട്രീയപാർട്ടികളുടെ പദയാത്രയല്ല കോൺഗ്രസിന്‍റെ 'ഭാരത്​ ജോഡോ യാത്ര'യെന്ന്​ തെളിയിക്കുകയാണ്​ ഓരോ ദിവസവും രാഹുൽ ഗാന്ധി. കർണാടകയിൽ പര്യടനം തുടരുന്ന പദയാത്രയുടെ പ്രധാന പ്ര​ത്യേകത യുവതീയുവാക്കളുടേയും വിദ്യാർഥികളുടെയും സ്ത്രീകളുടെയും വർധിച്ച പങ്കാളിത്തമാണ്​.

ദിവസേന ഇതുമായി ബന്ധപ്പെട്ട വ്യത്യസ്തകാര്യങ്ങളാണ്​ സംഭവിക്കുന്നത്​. ബുധനാഴ്ച പുറത്തുവന്ന ചിത്രം അത്തരത്തിലുള്ളതാണ്​. ചിത്രദുർഗ ജില്ലയിലെ റോഡിൽ 52കാരനായ രാഹുൽ ഗാന്ധി പുഷ്​ അപ്പ്​ ചെയ്യുന്നതാണ്​ ചിത്രം. കർണാടക കോൺഗ്രസ്​ പ്രസിഡന്‍റ്​ ഡി.കെ. ശിവകുമാർ, എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എന്നിവരും ഒരു കുട്ടിയും ഒപ്പമുണ്ടായിരുന്നു​. എന്നാൽ, രാഹുൽ മാത്രമാണ്​ പുഷ്​അപ്പുകൾ കൃത്യമായി ചെയ്തത്​. 'ഒരു മുഴുവൻ പുഷ്​ അപ്പും മറ്റ്​ രണ്ട്​ പകുതി പുഷ്​അപ്പും' എന്ന അടിക്കുറിപ്പോടെ പാർട്ടി ജനറൽ സെക്രട്ടറി രൺദീപ്​ സുർജേവാല ഈ ചിത്രം ഇൻസ്റ്റ​ഗ്രാമിൽ പോസ്റ്റ്​ ചെയ്തത്​ വൈറലായി. കഴിഞ്ഞ ദിവസം യാത്രക്കിടെ മുൻമുഖ്യമന്ത്രിയും പ്രതിപക്ഷ നേതാവുമായ സിദ്ദരാമയ്യ, ഡി.കെ. ശിവകുമാർ എന്നിവരുടെ കൈകൾ പിടിച്ച്​ രാഹുൽ ഓടിയിരുന്നു.

​മാണ്ഡ്യയിലെ പാണ്ഡവപുരത്ത്​ നടന്ന ജോഡോ യാത്രയിൽ അമ്മയും കോൺഗ്രസ്​ അധ്യക്ഷയുമായ സോണിയ ഗാന്ധിയുടെ ഷൂവിന്‍റെ ചരട്​ രാഹുൽ ഗാന്ധി കെട്ടിക്കൊടുത്ത ചിത്രവും ഏറെ വൈറൽ ആയിരുന്നു. അവയവദാനം നടത്തിയവരും ഇവരുടെ ബന്ധുക്കളും ബുധനാഴ്ചത്തെ പര്യടനത്തിൽ പങ്കാളികളായി. 33 പേർ കണ്ണുകൾ ദാനം ചെയ്യുമെന്ന്​ പ്രതിജ്ഞയെടുത്തത്​ വ്യത്യസ്ത അനുഭവമായി.

ചെറിയ പ്രായത്തിൽതന്നെ മരണപ്പെട്ട രക്ഷിത, വേദ, വിജയ്​ തുടങ്ങിയവരുടെ ബന്ധുക്കളാണ്​ പ​ങ്കെടുത്തത്​. അവയവദാനം ചെയ്ത്​ മരണത്തിന്​ ശേഷവും മറ്റുള്ളവരിലൂടെ ജീവിക്കുന്ന ഇവർ ധീരരാണെന്ന്​ രാഹുൽ പറഞ്ഞു. സഹാനുഭൂതി, മാനവികത എന്നിവയാണ്​ അവർ പ്രസരിപ്പിക്കുന്നത്​. ഏതാനും ചിലരുടെ വിദ്വേഷ പ്രചാരണത്തിൽ മാനുഷിക സ്​നേഹം സമൂഹത്തിന്​ നഷ്​ടമാകരുതെന്നും അദ്ദേഹം പറഞ്ഞു.

തൊഴിലില്ലായ്മയടക്കമുള്ള വിഷയങ്ങളിൽ രൂക്ഷമായ വിമർശനമാണ്​ സംസ്ഥാനത്തെ ബി.ജെ.പി സർക്കാറിനെതിരെ രാഹുൽ ഉന്നയിക്കുന്നത്​. ഡബിൾ എൻജിൻ സർക്കാർ യുവാക്കളുടെ ഭാവിയെ അപഹരിക്കുകയാണെന്ന്​ അദ്ദേഹം പറഞ്ഞു. കേന്ദ്രത്തിലും കർണാടകയിലും ബി.ജെ.പി ഭരിക്കുന്നതിനാൽ ഇത്​ 'ഡബിൾ എൻജിൻ' സർക്കാർ ആണെന്നാണ്​ പ്രധാനമന്ത്രി മോദി അടക്കമുള്ള ബി.ജെ.പി നേതാക്കൾ അവകാശപ്പെടുന്നത്​.