പിറന്നാൾ ആഘോഷത്തിനുമപ്പുറം

പ്രധാനമന്ത്രി നരേന്ദ്ര മോദിയുടെ എഴുപതാം പിറന്നാളായിരുന്നു സെപ്​റ്റംബർ 17 വ്യാഴാഴ്​ച. ലോകത്തെ ഏറ്റവും വലിയ ജനാധിപത്യരാജ്യത്ത്​ രണ്ടാമൂഴത്തിൽ അധികാരത്തിലിരിക്കുന്ന പ്രധാനമന്ത്രിക്ക്​ വിവിധ ലോകനേതാക്കൾ ഹൃദയംഗമമായ ആശംസാസന്ദേശങ്ങൾ അയച്ചു.

രാജ്യത്തെ​ കക്ഷിരാഷ്​ട്രീയ ഭേദമെന്യേ എല്ലാ പ്രമുഖരും പ്രധാനമന്ത്രിക്ക്​ ആയുരാരോഗ്യ സൗഖ്യം നേർന്നു. കേന്ദ്രത്തിലെ ഭരണകക്ഷിയായ ബി.ജെ.പിയാക​െട്ട, തങ്ങളുടെ സർവസ്വമായ നേതാവി​െൻറ പിറന്നാളാഘോഷം കെ​േങ്കമമാക്കുന്നതിനു വിവിധ പരിപാടികളാണ്​ ആവിഷ്​കരിച്ചിരിക്കുന്നത്​. ​സെപ്​റ്റംബർ 14 മുതൽ 20 വരെ നീണ്ടുനിൽക്കുന്ന സേവനവാരം തന്നെ പാർട്ടി അധ്യക്ഷൻ ജെ.പി നഡ്ഡ പ്രഖ്യാപിച്ചിരിക്കുന്നു.

മുമ്പ്​ ഗാന്ധിജയന്തിയോടനുബന്ധിച്ച്​ വിദ്യാർഥികൾക്ക്​ സേവനപ്രവർത്തനങ്ങളിൽ ആഭിമുഖ്യം വളർത്താൻ സേവനവാരം കൊണ്ടാടുന്ന പതിവുണ്ടായിരുന്നു. അതേ മാതൃകയിൽ പ്രധാനമന്ത്രി മോദിയുടെ സേവനസമ്പന്നമായ ജീവിതയാത്രയിൽനിന്നു പ്രചോദനമുൾക്കൊണ്ടാണ്​ പാർട്ടി സേവനസപ്​താഹ യജ്ഞവുമായി ഇറങ്ങിത്തിരിക്കുന്നതെന്നാണ്​ പാർട്ടി അധ്യക്ഷ​െൻറ വിശദീകരണം.

അങ്ങനെ എഴുപതിൽ പൊതിഞ്ഞ ഒരു കൂട്ടം പരിപാടികളും പാർട്ടി രാജ്യവ്യാപകമായി അവതരിപ്പിക്കുന്നുണ്ട്​. 70 ഭിന്നശേഷിക്കാർക്ക്​ കൃത്രിമാവയവങ്ങൾ, ദൃഷ്​ടിഭംഗമുള്ള 70 പേർക്ക്​ കണ്ണടകൾ, ഭാരതീയ ജനത യുവമോർച്ചയുടെ 70 രക്തദാന ക്യാമ്പുകൾ, ഒാരോ ബൂത്തിലും 70 തൈ നടീൽ, എല്ലാ ജില്ലകളിലും 70 ഗ്രാമങ്ങളിൽ ശുചീകരണം തുടങ്ങി വൈവിധ്യമാർന്ന പരിപാടികളാണ്​ പിറന്നാളാഘോഷത്തിനൊരുക്കിയിരിക്കുന്നത്​.

ഇതിനു പുറമെ നരേന്ദ്ര മോദിയുടെ 'ജീവിതവും ദൗത്യവും' വ്യക്തമാക്കുന്ന 70 വെർച്വൽ കോൺഫറൻസുകൾ നടത്താനും ​സമൂഹ മാധ്യമങ്ങളിൽ പിറന്നാൾ ദിനം എഴുപത്​ ​സ്ലൈഡുകൾ വിതരണം നടത്താനും പദ്ധതിയിട്ടു. വിവിധ സംസ്​ഥാന ഘടകങ്ങൾ നേതാവി​െൻറ പിറന്നാൾ ഉത്സവമാക്കാൻ അഹമഹമികയാ മത്സരത്തിലാണ്​. അതുവഴി രാഷ്​ട്രശിൽപികളായും പ്രധാനമന്ത്രിപദങ്ങളിൽ ജനകീയരായും വിരാജിച്ച മുൻനേതാക്കളുടെ വ്യക്തിപ്രഭാവങ്ങൾക്ക്​ അതീതമായി മോദിയെ ചിരപ്രതിഷ്​ഠനാക്കാനുള്ള ശ്രമമാണ്​ പാർട്ടി അധികാര മെഷിനറിയും ആൾക്കരുത്തും ഉപയോഗിച്ച്​ ചിട്ടപ്പെടുത്തിയിരിക്കുന്നത്​

രാജ്യത്തെ ഏതാണ്ടെല്ലാ മുഖ്യധാരാ മാധ്യമങ്ങളും പതിവിൽ കവിഞ്ഞ പ്രാധാന്യം പ്രധാനമന്ത്രിയുടെ ജന്മദിനത്തിന്​ നൽകി​. അപദാനങ്ങൾ പാടിപ്പറഞ്ഞ്​ അദ്ദേഹത്തെ ഇതിഹാസമാക്കി മാറ്റാൻ ശ്രമിച്ചവരും ഭരണനേട്ടങ്ങൾ എടുത്തുകാട്ടി അദ്വിതീയനും അതുല്യനുമായ ഇന്ത്യൻ ഭരണാധികാരിയായി അദ്ദേഹത്തെ ചിത്രീകരിച്ചവരും ഉണ്ട്. മറ്റു താളുകളിൽ കേന്ദ്രഭരണത്തി​െൻറ പരാജയത്തിൽനിന്ന്​ ഉടലെടുക്കുന്ന രാജ്യത്തി​െൻറ ഗുരുതര പ്രശ്​നങ്ങൾ അടയാളപ്പെടുത്തിത്തന്നെയാണ്​ പല മാധ്യമങ്ങളും മോദിസ്​തുതിയിൽ അത്യുക്തി ചമച്ചത്.

ജവഹർലാൽ നെഹ്​റു മുതൽ മൻമോഹൻ സിങ്​ വരെയുള്ളവർ ഭരിച്ച സ്വാതന്ത്ര്യാനന്തരമുള്ള 67 കൊല്ലങ്ങൾകൊണ്ട്​ നേടിയെടുക്കാനാകാത്ത നേട്ടമാണ്​ ആദ്യ ഉൗഴത്തിൽ മോദി നേടിയെടുത്തതെന്നും നിലവിൽ കോവിഡ്​ പ്രതിരോധത്തിലും ചൈനയെ ചെറുത്തുതോൽപിക്കുന്നതിലും അദ്ദേഹം വിജിഗീഷുവായി വിരാജിക്കുകയാണെന്നും വിസ്​തരിക്കാൻ മാധ്യമങ്ങൾ നിർലോഭം സമയവും സ്​ഥലവും വിനിയോഗിച്ചു.

അമിത്​ ഷാ മുതൽ സംസ്​ഥാനനേതാക്കൾവരെയുള്ള ബി.ജെ.പി പാർട്ടിവൃത്തങ്ങളെപ്പോലും നിഷ്​പ്രഭമാക്കുന്ന രീതിയിലാണ്​ പത്രകോളങ്ങളും ചാനൽപരിപാടികളും മോദി പിറന്നാൾ ആഘോഷിച്ചത്​. സ്വാഭാവികമായ സ്​നേഹാശിസ്സുകൾക്കും ആദരപ്രകടനങ്ങൾക്കുമപ്പുറം ഇല്ലാത്ത ഭരണനേട്ടങ്ങളുടെ വല്ലാത്ത കൊട്ടിഘോഷമാക്കി പിറന്നാളിനെ മാറ്റുകയായിരുന്നു ഭരണത്തിനു സേവപിടിക്കുന്ന മാധ്യമങ്ങൾ ചെയ്​തത്​.

83,000ലേറെ പേർ കോവിഡ്​ ബാധയിൽ മരണപ്പെട്ട, ജി.ഡി.പി മൈനസ്​ 23.9 ശതമാനത്തിലേക്ക്​ മുതലക്കൂപ്പ്​ നടത്തിയ, എട്ടു കോടിയിലേറെ കുടിയേറ്റ തൊഴിലാളികൾ ഭവനരഹിതരായ, ദശലക്ഷക്കണക്കിനു​േപർ തൊഴിൽരഹിതരായ പ്രശ്​നകലുഷമായ ആറുമാസക്കാലത്തും അൽപസ്വൽപം ക്ഷതമേറ്റിട്ടും കുലുങ്ങാതെ അക്ഷോഭ്യനായി നിൽക്കുന്ന പ്രധാനമന്ത്രിയുടെ 'നമോ'സ്​തുതിയിൽ മതിമറന്ന 'ഇന്ത്യ ടുഡേ' തന്നെ അതി​െൻറ ഒന്നാന്തരം ഉദാഹരണം. ഇന്ത്യ എന്തായാലെന്ത്​, മോദി തന്നെ രാജാവ്​ എന്നായിരുന്നു ഇത്തരം വിദൂഷകമാധ്യമങ്ങളുടെയെല്ലാം പിറന്നാൾ കീർത്തനം.

എന്നാൽ, നേതാക്കളുടെ പുറംതലോടലോ മാധ്യമങ്ങളുടെ പാദസേവയോ കാര്യമാക്കാതെ, അതിനെതിരായ പ്രതികരണമെന്നോണം സമൂഹ മാധ്യമങ്ങളിൽ മോദിഭരണം നിശിതമായി വിലയിരുത്തപ്പെട്ടതും ശ്രദ്ധേയമായി. 'സമൂഹമാധ്യമങ്ങളിലെ പൗരന്മാർ' (നെറ്റിസൺസ്​) ദേശീയ തൊഴിലില്ലായ്​മ ദിനമായാണ്​ സെപ്​റ്റംബർ 17 ആചരിച്ചത്​. 12.2 കോടി പേർക്ക്​ തൊഴിൽ നഷ്​ടപ്പെട്ട ഇന്ത്യയിൽ ഇൗ ആഗസ്​റ്റിൽ കഴിഞ്ഞ മൂന്നുവർഷത്തെ ഏറ്റവും വലിയ തൊഴിൽനഷ്​ടമാണ്​ ഉണ്ടായിരിക്കുന്നതെന്നു അവർ ചൂണ്ടിക്കാണിച്ചത്​ മോദിവാഴ്​ത്തിൽ കേമത്തമുള്ള മാധ്യമങ്ങളുടെ കണക്കുതന്നെ എടുത്തുദ്ധരിച്ചാണ്​.

തൊഴിലില്ലായ്​മ കഴിഞ്ഞ 45 വർഷത്തെ ഏറ്റവും ഉയർന്ന നിരക്കിലെത്തിയതും കോവിഡ്​ ഫലമായി ജൂലൈയിൽമാത്രം അഞ്ചു ദശലക്ഷം ശമ്പളക്കാർക്ക്​ ജോലി നഷ്​ടപ്പെട്ടതും ചൂണ്ടിക്കാട്ടി അവർ നടത്തിയ ദിനാചരണാഹ്വാനത്തിന്​ വമ്പിച്ച പ്രതികരണമാണുണ്ടായത്​.

കണ്ണടയും കൃത്രിമാവയവവും വിതരണം ചെയ്​തല്ല, കെടുകാര്യസ്​ഥതയിൽ മുടന്തിനീങ്ങുകയും അധികാരത്തി​െൻറ ആന്ധ്യം ബാധിക്കുകയും ചെയ്​ത കേന്ദ്രഭരണ​ം ശരിപ്പെടുത്തിയാണ്​ പിറന്നാളാഘോഷം കേമമാക്കാൻ എന്നാണ്​ അവരുടെ പക്ഷം. അതല്ലാതെയുള്ള കൊണ്ടാട്ടങ്ങൾ​ ബി.ജെ.പിക്ക്​ പെരുന്നാളാകാമെങ്കിലും രാജ്യത്തി​െൻറ ആയുരാരോഗ്യത്തിന്​ ഹാനികരമായിത്തീരുമെന്ന അവരുടെ മുന്നറിയിപ്പിൽ എല്ലാമുണ്ട്​.