എവിടെയെത്തി കേരളം?

ഐക്യകേരളത്തിന്​ 66-ാം പിറന്നാളാണിന്ന്​. ഏതു നാഗരികതയുടെയും പുരോഗതിയുടെ അളവായി എണ്ണുന്ന സാക്ഷരത, വിദ്യാഭ്യാസ വളർച്ച, ആരോഗ്യപരിരക്ഷ, സ്​ത്രീ മുന്നേറ്റം തുടങ്ങിയ വിവിധ രംഗങ്ങളിൽ തിളക്കമാർന്ന നേട്ടങ്ങൾ സ്വന്തമാക്കാൻ ആറരപ്പതിറ്റാണ്ടിനിടെ നമുക്ക്​ സാധിച്ചുവെന്നത്​ അഭിമാനകരം തന്നെ. ലോകത്തി​െൻറ വിവിധ കോണുകളിൽ ആരോഗ്യ-വൈജ്​ഞാനിക-സാ​ങ്കേതിക-വ്യവസായ- സേവന രംഗങ്ങളിൽ ഗണ്യമായ സാന്നിധ്യമറിയിച്ചിരിക്കുന്നു മലയാളി. രാഷ്​ട്രീയ പ്രബുദ്ധതയുടെയും പുരോഗമന ചിന്തയുടെയും പേരിൽ ആവുന്നിടത്തെല്ലാം മലയാളി ഊറ്റം കൊള്ളാറുണ്ട്. കൂടുതൽ വലിയ ലക്ഷ്യങ്ങളുമായി ഉയരങ്ങളിലേക്ക്​ കുതിക്കാനൊരുങ്ങവെ നേട്ടങ്ങൾക്കൊപ്പം നമ്മുടെ വീഴ്​ചകളുടെയും പോരായ്​മകളുടെയും കൂടി കണക്കെടുപ്പ്​ നടത്തുന്നത്​ നന്ന്​.

വിദ്യാഭ്യാസ മേഖലയിൽ നിന്നു തന്നെ തുടങ്ങാം. മികച്ച സർവകലാശാലകളും കലാലയങ്ങളും അതി വിദഗ്ധരായ അധ്യാപകരുമുണ്ട്​ കേരളത്തിൽ. എന്നാൽ, പ്ലസ്​ടുവിന്​ ശേഷം കേരളത്തിൽ തുടർപഠനം ആഗ്രഹിക്കുന്ന വിദ്യാർഥികളുടെ എണ്ണം അനുദിനം കുറഞ്ഞുവരുന്നു. തീക്ഷ്​ണമായ രാഷ്​ട്രീയകാലാവസ്​ഥയെ അവഗണിച്ച്​ ഇതര സംസ്​ഥാനങ്ങളിലേക്കും കടമെടുത്താണെങ്കിലും വിദേശരാജ്യങ്ങളിലും ഉപരിപഠനം നടത്താൻ അവർ താൽപര്യപ്പെടുന്നു. സാമൂഹികമോ, സാമ്പത്തികമോ ആയ തടസ്സങ്ങൾ ഒന്നുകൊണ്ടു ​മാത്രമാണ്​ പഠനം ഇവിടെ തുടരാൻ പകുതിയിലേറെ കുട്ടികളും നിർബന്ധിതരാകുന്നത്​. വർഷങ്ങൾ കലാലയങ്ങളിൽ ചെലവിട്ട ശേഷം മത്സരപരീക്ഷകളിലും തൊഴിൽ നൈപുണ്യത്തിലും പിന്നാക്കം പോകാൻ ആരാണ്​ ആഗ്രഹിക്കുക? അതിരുവിട്ട രാഷ്​ട്രീയം കളിയും സ്​ഥാപിതതാൽപര്യങ്ങളുമാണ്​ ഉന്നതവിദ്യാഭ്യാസ മേഖലയിലെ നേട്ടങ്ങളെ കെടുത്തിക്കളയുന്നത്​ എന്ന കാര്യം അവഗണിക്കാനാവില്ല.

ആരോഗ്യ പരിരക്ഷാരംഗത്ത്​ ഇന്ത്യയിലെന്നല്ല, ലോകമൊട്ടുക്കുമുള്ള മികച്ച ആതുരാലയങ്ങളിലെല്ലാം മലയാളക്കരയിൽ നിന്നുള്ള ആരോഗ്യപ്രവർത്തകരുടെ കൈയൊപ്പുണ്ട്​. കോവിഡിനെതിരായ പോരാട്ടത്തിൽ വിദേശരാജ്യങ്ങളിലുൾപ്പെടെ അവർ വഹിച്ച പങ്ക്​ നിസ്​തുലമാണ്​. വിദ്യാർഥികളെന്ന പോലെ ആരോഗ്യപ്രവർത്തകരും കേരളം വിട്ടുപറക്കാൻ ഔത്സുക്യം കാണിക്കുന്നത്​ ഗൗരവബുദ്ധിയോടെ വിലയിരുത്താൻ നമ്മളിനിയും തയാറായിട്ടില്ല. ആരോഗ്യപ്രവർത്തകർ അർഹിക്കുന്ന വേതനം മാത്രമല്ല, അന്തസ്സോ സുരക്ഷയോ പോലും ഉറപ്പുവരുത്താൻ നമുക്ക്​ സാധിക്കുന്നില്ല. ആംബുലൻസില്ലാതെ രോഗികളെയോ മൃതദേഹങ്ങളെയോ ഏറ്റി കാൽനടയായും സൈക്കിളിലും കിലോ മീറ്ററുകൾ താണ്ടേണ്ടി വരുന്ന ഉത്തരേന്ത്യൻ സങ്കടക്കാഴ്​ച ഇവിടെയില്ല എന്നത്​ ആശ്വാസകരം തന്നെ. അത്യാധുനിക സൗകര്യങ്ങളോടെ ഒട്ടനവധി ആതുരാലയങ്ങൾ സർക്കാർമേഖലയിൽ ഉയരുന്നു എന്നതും അഭിമാനകരം. എന്നിരിക്കിലും അട്ടപ്പാടിയിൽ ആവർത്തിക്കപ്പെടുന്ന ശിശുമരണങ്ങളിലും മറ്റും ചികിത്സ ഉറപ്പാക്കുന്നതിൽ വരുത്തുന്ന ഉപേക്ഷയുടെ ഉത്തരവാദിത്തത്തിൽ നിന്ന്​ ഒഴിഞ്ഞുമാറാൻ ആർക്കുമാവില്ല. കാസർകോടുള്ള കാൻസർ രോഗിയെ ഏതാനും മണിക്കൂർ കൊണ്ട്​ തിരുവനന്തപുരത്ത്​ ചികിത്സക്കെത്തിക്കാനെന്ന പേരിൽ സഹസ്രകോടികൾ കടമെടുത്ത്​ വേഗറെയിൽ പണിയാൻ തിടുക്കപ്പെടുന്നതല്ല, ഏതാനും കോടികൾ മുടക്കി കാസർ​കോട്​ ചികിത്സാലയമുയർത്തുന്നതാണ്​ സുസ്​ഥിര ആരോഗ്യ വികസനമാതൃക എന്ന്​ മനസ്സിലാക്കാൻ സർക്കാറോ നയരൂപകർത്താക്കളോ തയാറാവുന്നില്ല എന്നതും പരാജയം തന്നെ.

ആണധികാര കേന്ദ്രങ്ങൾ പണിതുവെച്ചിരുന്ന സകല തടസ്സങ്ങളും മറികടന്ന്​ സ്​ത്രീസമൂഹം പഠനരംഗത്തും തൊഴിൽമേഖലയിലും വെന്നിക്കൊടി നാട്ടുന്നതും രാഷ്​ട്രീയരംഗത്ത്​ പോരാട്ടം തുടരുന്നതും കേരളത്തി​െൻറ തിളക്കമാർന്ന ചിത്രമാണ്​. എന്നാൽ സ്​ത്രീ സുരക്ഷയുടെ കാര്യത്തിൽ മുഖം പൊത്തി നിൽക്കേണ്ട നാണക്കേടിലാണ്​ നാം ഓരോരുത്തരും. മറ്റേതെങ്കിലും സംസ്​ഥാനത്തേക്കാൾ കുറവാണ്​ സ്​ത്രീകൾക്കെതിരായ കുറ്റകൃത്യങ്ങൾ എന്നതുപോലും നേട്ടമല്ല. കഴിഞ്ഞ ഒരു കലണ്ടർ വർഷം മാത്രം എത്രയോ പെൺകുട്ടികളാണ്​ സ്​ത്രീധനം എന്ന സാമൂഹിക വിപത്തി​െൻറ ഇരകളായി കൊല്ലപ്പെട്ടത്​. ഓരോ ജീവൻ പൊലിയു​േമ്പാഴും നമ്മൾ നടുക്കം ആവർത്തിക്കുന്നു. ഈ ദുരന്തത്തിന്​ പൂർണവിരാമമിടാൻ സാധിക്കാത്തിടത്തോളം സ്​ത്രീശക്​തിയെക്കുറിച്ച്​ മഹാകാവ്യമെഴുതിയിട്ടും കാര്യമില്ല തന്നെ.

മലയാളി അഭിമാനപുരസ്സരം എടുത്തണിഞ്ഞ്​ നടന്നിരുന്ന നവോത്ഥാനത്തി​െൻറയും പുരോഗമനചിന്തയുടെയും മുഖംമൂടികളും മേലങ്കികളും എത്ര അപഹാസ്യമെന്ന്​ വെളിപ്പെടുത്തുന്നു നരബലിയുടെയും ദുരഭിമാനക്കൊലയുടെയും ചിത്രങ്ങൾ.

വർഗീയശക്തികളെ പരാജയപ്പെടുത്താൻ തെരഞ്ഞെടുപ്പ്​ രാഷ്​ട്രീയത്തിൽ പുലർത്തുന്ന ജാഗ്രത സാമൂഹികജീവിതത്തിൽ പാലിക്കാൻ കഴിയുന്നുണ്ടോ എന്ന കാര്യവും ആ ലോചനക്ക്​ വിധേയമാക്കേണ്ടിയിരിക്കുന്നു. നമുക്ക്​ ജാതിയില്ല എന്നൊക്കെ മുദ്രാവാക്യം മുഴക്കുകയും സമൂഹ മാധ്യമ പോസ്​റ്റുകളെഴുതുകയും ചെയ്യുന്ന മലയാളി അധികാര രംഗത്തുനിന്നും വൈജ്​ഞാനിക മേഖലയിൽ നിന്നും ദലിതുകളെയും പിന്നാക്കസമൂഹങ്ങളെയും അദൃശ്യവത്​കരിക്കാനും അന്യവത്​കരിക്കാനും പുലർത്തുന്ന ശുഷ്​കാന്തിയും ചോദ്യം ചെയ്യപ്പെടേണ്ടതുണ്ട്​.

​മുദ്രാവാക്യങ്ങളും കെട്ടുകാഴ്​ചകളും കൊണ്ട്​ സാധ്യമാക്കാൻ കഴിയുന്നതല്ല നവകേരളം. അഹംബോധമില്ലാത്ത ആത്മവിമർശനത്തോടെ വേണം അതിനു തുടക്കമിടാൻ. ഈ കേരളപ്പിറവി ദിനം അതിനു നമ്മെ പ്രാപ്​തമാക്ക​ട്ടെ.