ചാമ്പ്യൻസ്​ ലീഗ്​: തുടക്കം മനോഹരം

പാരിസ്​: ചാമ്പ്യൻസ്​ ലീഗിലെ ശിശുക്കളെ മുന്നിൽ കിട്ടിയപ്പോൾ ഗോളടിച്ച്​ ആഘോഷിച്ചുതന്നെ ബാഴ്​സലോണ തുടങ്ങി. ഗ്രൂപ്​ റൗണ്ടിലെ ആദ്യ മത്സരത്തിൽ ​ഹംഗേറിയൻ ക്ലബ്​ ഫെറൻവാറോസിനെ 5-1ന്​ തോൽപിച്ച്​ ബാഴ്​സലോണ കിക്കോഫ്​ കുറിച്ചപ്പോൾ, പാരിസിയിൽ മാഞ്ചസ്​റ്റർ യുനൈറ്റഡും യുക്രെയ്​നിൽ യുവൻറസും ജയത്തോ​െട തുടങ്ങി.

ചെൽസിയും സെവിയ്യയും ഗോളില്ലാ സമനിലയുമായി കളം വിട്ടപ്പോൾ, എർലിങ്​ ഹാലൻഡി​െൻറ ബൊറൂസിയ ഡോർട്​മുണ്ടിനെ ലാസിയോ തരിപ്പണമാക്കി. ജർമൻ കരുത്തരായ ലൈപ്​സിഷും ജ​യ​ത്തോടെ തുടങ്ങി.

പാരിസിൽ യുനൈറ്റഡ്​

രണ്ടു സീസൺ മുമ്പ്​ പാരിസിലെത്തി പി.എസ്​.ജിയുടെ ശീട്ടുകീറിയ അതേ വീര്യത്തിലായിരുന്നു കഴിഞ്ഞ രാത്രിയിലും മാഞ്ചസ്​റ്റർ യുനൈറ്റഡി​െൻറ ജയം. 2018-19 സീസൺ പ്രീക്വാർട്ടറിൽ മാർകസ്​ റാഷ്​ഫോഡി​െൻറ ഇഞ്ചുറി ടൈം ഗോളിൽ പാരിസുകാരുടെ കുതിപ്പിന്​ തടയിട്ട യുനൈറ്റഡ്​ അതേ ഫോം ആവർത്തിച്ചു. നെയ്​മർ, എംബാപ്പെ, ഡി മരിയ കൂട്ടുകെട്ട്​ ഒരുമിച്ച ഫ്രഞ്ച്​ മുന്നേറ്റത്തിന്​ ലക്ഷ്യ​ബോധമില്ലായിരുന്നു. ​അനവധി അവസരങ്ങൾ കളഞ്ഞുകുളിക്കാൻ അവർ മത്സരിച്ചപ്പോൾ, കിട്ടിയ ചാൻസിൽ ഗോളാക്കി യുനൈറ്റഡ്​ കളി ജയിച്ചു.

23ാം മിനിറ്റിൽ ആൻറണി മാർഷലി​െന ഫൗൾ ചെയ്​തതിന്​ ലഭിച്ച പെനാൽറ്റി വലയിലാക്കി ബ്രൂണോ ഫെർണാണ്ടസ്​ ആദ്യ ഗോൾ ​സമ്മാനിച്ചു. ആദ്യ കിക്ക്​ പി.എസ്​.ജി ഗോളി കെയ്​ലർ നവാസ്​ രക്ഷപ്പെടുത്തിയെങ്കിലും ​ഗോളിയുടെ അഡ്വാൻസിന്​ റീടേക്ക്​ നൽകിയപ്പോൾ ബ്ര​ൂണോ​ വലകുലുക്കി. രണ്ടാം പകുതിയിൽ മാർഷൽ സമ്മാനിച്ച സെൽഫ്​ ഗോളിലാണ്​ പി.എസ്​.ജി സമനില നേടിയത്​. ഒടുവിൽ 87ാം മിനിറ്റിൽ പോൾ പോഗ്​ബ നൽകിയ ക്രോസ്​ മാർകസ്​ റാ​ഷ്​ഫോഡ്​ വലയിലെത്തിച്ച്​ യുനൈറ്റഡിന്​ വിജയമൊരുക്കി.

വെൽഡൺ യുവൻറസ്​

യുക്രെയ്​നിലെ കിയവിൽ 15,000ത്തോളം കാണികൾക്ക്​ നടുവിലായിരുന്നു ഡൈനാമോയും യുവൻറസും ഏറ്റുമുട്ടിയത്​. കോവിഡ്​ പോസിറ്റിവായ ക്രിസ്​റ്റ്യാനോക്ക്​ പകരം അൽവാരോ മൊറാറ്റ നയിച്ച യുവൻറസിന്​ പിഴച്ചില്ല. ആദ്യ പകുതിയിൽ മൊറാറ്റ മുന്നേറ്റത്തെ തടഞ്ഞുനിർത്തിയെങ്കിലും രണ്ടാം പകുതിയിൽ കെട്ടുപൊട്ടി. 46ഉം 84ഉം മിനിറ്റിലെ ഇരട്ട ഗോളിൽ യുവൻറസ്​ ഡൈനാമോയെ വീഴ്​ത്തി. ആരോൺ റംസിയും ദെജാൻ ക്ലുസെവിസ്​കിയും പിന്നാലെ പകരക്കാരനായെത്തിയ പൗലോ ഡിബാലയും മൊറാറ്റയുടെ ആക്രമണങ്ങൾക്കു പിന്നിൽ ക​ളിനെയ്​തു.

ബൊറൂസിയ ഡോർട്​മുണ്ടി​െൻറ ഗോൾ മെഷീൻ എർലിങ്​ ഹാലൻഡ​ിനെ പിടിച്ചുകെട്ടിയായിരുന്നു ലാസിയോയുടെ വിജയം (3-1). സിറോ ഇമ്മൊബിൽ, ജീൻ ഡാനിയേൽ അക്​പ്രോ എന്നിവർ ലാസിയോക്കായി സ്​കോർ ചെയ്​തു. ഒന്ന്​ ​സെൽഫായും പിറന്നു.

തൂർക്കിയിൽ നിന്നുള്ള ഇസ്​തംബൂൾ ബാസ്​കെസിറിനെ 2-0ത്തിന്​ തോൽപിച്ച്​ കഴിഞ്ഞ ചാമ്പ്യൻസ്​ ലീഗ്​ സെമിഫൈനലിസ്​റ്റായ ലൈപ്​സിഷും തുടങ്ങി. സ്​പാനിഷ്​ താരം ആഞ്​ജലിനോയുടെ ഇരട്ട ഗോളാണ്​ തുണയായത്​.

ഫ്രാങ്ക്​ ​ലാംപാർഡി​െൻറ ചെൽസിയും യൂലൻ ലോപറ്റ്​ഗുയിയുടെ സെവിയ്യയും തമ്മിലെ മത്സരം നല്ലൊരു കളിവിരുന്നൊരുക്കിയെങ്കിലും ഫലമില്ലാതെ പിരിഞ്ഞു. ഇരു ടീമി​െൻറയും മധ്യ-പ്രതിരോധ നിരയിലായി കളി തളച്ചിടപ്പെട്ടപ്പോൾ ഗോളുകൾ പിറന്നില്ല.

യൂത്ത്​ ബാഴ്​സ

നേരത്തേ എഴുതിയ തിരക്കഥപോലെ തന്നെയായിരുന്നു നൂകാംപിൽ ബാഴ്​സലോണയുടെ വിജയം. കാൽ നൂറ്റാണ്ടിനുശേഷം ചാമ്പ്യൻസ്​ ലീഗ്​ യോഗ്യത നേടിയ കൗതുകം വിട്ടുമാറാതെയായിരുന്നു ​ഹംഗേറിയൻ ക്ലബ്​. എതിരാളി ഇത്തിരിക്കുഞ്ഞനെ​ങ്കിലും ബാഴ്​സലോണ കോച്ച്​ റൊണാൾഡ്​ കൂമാൻ ഒട്ടും ഗൗരവം കുറച്ചില്ല.

മെസ്സി, കുടീന്യോ എന്നീ പരിചയസമ്പന്നർക്കൊപ്പം കൗമാരക്കാരൻ അൻസു ഫാതി, പുതുമുഖങ്ങളായ ഫ്രാൻസിസ്​കോ ട്രിയാ​േങ്കാ, 17കാരൻ പെഡ്രി എന്നിവർക്കും അവസരം നൽകി. 27ാം മിനിറ്റിൽ മെസ്സിയുടെ പെനാൽറ്റിയിലൂടെയായിരുന്നു തുടക്കം. അൻസു ഫാതി (42), ഫിലിപ്​ കുടീന്യോ (52), പെഡ്രി (82), ഒസ്​മാനെ ഡെംബലെ (89) എന്നിവരുടെ വകയായിരുന്നു ബാഴ്​സലോണയുടെ ഗോളുകൾ.

ഇതിനിടയിൽ ഇഹോ കഖരാടി​െൻറ പെനാൽറ്റിയിലൂടെ ​ഫെറൻവാറോസ്​ ആശ്വാസ ഗോൾ നേടി. 68ാം മിനിറ്റിൽ പ്രതിരോധ താരം ജെറാഡ്​ പിക്വെ ചുവപ്പുകാർഡുമായി പുറത്തായതോടെ 10 പേരുമായാണ്​ ബാഴ്​സലോണ അവസാന മിനിറ്റുകളിൽ പന്തുതട്ടിയത്​.