രാജ്യതലസ്ഥാനത്ത് കർഷകരുടെ വലിയ പ്രേക്ഷാഭത്തിന് കളമൊരുങ്ങിയിരിക്കുകയാണ്. തങ്ങൾ വഞ്ചിക്കപ്പെട്ടതായി തിരിച്ചറിഞ്ഞ കർഷകർ ഇത്തവണ തങ്ങളുടെ ആവശ്യങ്ങൾ നേടിയെടുത്തേ പിന്നോട്ടുള്ളൂവെന്ന് പ്രഖ്യാപിച്ചിട്ടുണ്ട്. മുമ്പ് കണ്ടതിനേക്കാൾ ശക്തമായ പ്രക്ഷോഭമാകും നടക്കുക.
കൃഷിഭൂമി ഏറ്റെടുക്കുന്നതിന് കേന്ദ്രം കൊണ്ടുവന്ന പുതിയ ലാൻഡ് അക്വിസിഷൻ നിയമമനുസരിച്ച് 2014 ജനുവരി ഒന്നു മുതൽ അക്വയർ ചെയ്ത ഭൂമിക്ക് നാലു മടങ്ങ് നഷ്ടപരിഹാരം, ഗൗതം ബുദ്ധ നഗർ ജില്ലയിൽ പത്തു വർഷമായി അനുവദിച്ചുകിട്ടാത്ത അവകാശങ്ങൾ പുതിയ നിയമമനുസരിച്ച് ഉടൻ അനുവദിക്കുക, മിനിമം താങ്ങുവിലക്ക് നിയമപ്രാബല്യം നൽകുക, പ്രക്ഷോഭങ്ങളിൽ പങ്കെടുത്ത കർഷകരുടെ കാർഷിക വായ്പകൾ എഴുതിത്തള്ളുക, കാർഷിക, ക്ഷീര, പഴം, പച്ചക്കറി, മാംസ ഉൽപന്നങ്ങളുടെ ഇറക്കുമതി തീരുവ കുറക്കുന്നതിന് സബ്സിഡി വർധിപ്പിക്കുക തുടങ്ങിയ ആവശ്യങ്ങളാണ് സമരക്കാർ ഉന്നയിക്കുന്നത്.
കൂടാതെ, 58 വയസ്സിനു മുകളിലുള്ള കർഷകർക്കും കർഷകത്തൊഴിലാളികൾക്കും പതിനായിരം രൂപ പ്രതിമാസ പെൻഷൻ അനുവദിക്കുക, പ്രധാനമന്ത്രി ഫസൽ ബീമാ യോജന എന്ന ഇൻഷുറൻസ് പദ്ധതിയിൽ എല്ലാ വിളകളെയും ഉൾപ്പെടുത്തുക, ലഖിംപുർ ഖേരിയിൽ നടന്ന കർഷകവിരുദ്ധ അതിക്രമത്തിലെ ഇരകൾക്ക് നീതി ഉറപ്പാക്കുക, ഇന്ത്യ ലോകവ്യാപാര കരാറിൽനിന്ന് പിന്തിരിയുക തുടങ്ങിയ ആവശ്യങ്ങളും ഉയർത്തുന്നു.
കഴിഞ്ഞ ഫെബ്രുവരി 13ന് കർഷകർ ഡൽഹി മാർച്ച് പ്രഖ്യാപിച്ചിരുന്നു. കാർഷിക വിളകൾക്ക് മിനിമം താങ്ങുവില ആവശ്യപ്പെട്ട്, അത് നിരാകരിക്കുന്ന പുതിയ കാർഷിക നിയമത്തിനെതിരെ കർഷകർ നടത്തിയിരുന്ന സമരം അധികൃതരുടെ കടുത്ത അവഗണനയെത്തുടർന്ന് ഏറക്കുറെ വിസ്മൃതിയിലായിരുന്നു.
പിന്മാറാൻ കൂട്ടാക്കാതിരുന്ന പഞ്ചാബിൽനിന്നുള്ള കർഷകരെ കടത്തിവിടാതിരിക്കാൻ ഹരിയാനയിലെ ബി.ജെ.പി ഗവൺമെന്‍റ് കടുത്ത ജനവിരുദ്ധ നടപടികളാണ് സ്വീകരിച്ചത്. ഡൽഹി മാർച്ച് തടയാൻ കേന്ദ്ര-സംസ്ഥാന ബി.ജെ.പി ഗവൺമെന്‍റുകൾ പലയിന പരിപാടികൾ ആവിഷ്കരിച്ചു. അതിന്‍റെ ഭാഗമായി സമരം തണുപ്പിക്കാൻ കേന്ദ്രമന്ത്രിമാരായ പിയൂഷ് ഗോയൽ, അർജുൻ മുണ്ട, നിത്യാനന്ദ് റായ് എന്നിവരുടെ നേതൃത്വത്തിൽ സർക്കാർ ചർച്ചക്കും തയാറായി.
എന്നാൽ, അഞ്ചു വർഷത്തേക്ക് ഏതാനും ഇനങ്ങൾക്ക് താങ്ങുവില നൽകി ഗവ. ഏജൻസികൾ വാങ്ങാം എന്ന പരിഹാരനിർദേശം കർഷകർ തള്ളി. 22 ഇനങ്ങൾക്ക് നിയമപരിരക്ഷയോടെ താങ്ങുവില അനുവദിക്കണമെന്നായിരുന്നു ആവശ്യം. ഇതനുവദിക്കാതെ വന്നപ്പോൾ ഫെബ്രുവരി 21ന് കർഷകർ വീണ്ടും ഡൽഹി മാർച്ചിന് ഒരുങ്ങി, സർക്കാർ ബലം പ്രയോഗിച്ച് തടഞ്ഞു. അതോടെ അതിർത്തിയായ ശംഭുവിലും ഖനോരിയിലും തമ്പടിച്ചുകൂടി കർഷകർ.
മാസം പത്തു തികയുമ്പോൾ അവർ വീണ്ടും ഡൽഹിയെ സമരമുഖരിതമാക്കാൻ തീരുമാനിച്ചിരിക്കുകയാണ്. ഭാരതീയ കിസാൻ പരിഷത്ത്, കിസാൻ മസ്ദൂർ സഭ, സംയുക്ത് കിസാൻ മോർച്ച എന്നീ സംഘടനകൾ ഡിസംബർ ആറിന് മാർച്ച് പ്രഖ്യാപിച്ചു. അന്ന് പല സംസ്ഥാനങ്ങളിലും നിയമസഭകളിലേക്ക് മാർച്ച് നടന്നു. ഡിസംബർ 14ന് ശംഭുവിൽനിന്ന് 101 കർഷകർ ഡൽഹിയിലേക്ക് മാർച്ച് പ്രഖ്യാപിച്ചിട്ടുണ്ട്.
കർഷകരുടെ ജീവൽപ്രശ്നങ്ങളുമായി ബന്ധപ്പെട്ട ആവശ്യങ്ങൾക്കൊന്നും ചെവികൊടുക്കാനോ പരിഹാരം കാണാനോ ബി.െജ.പി സർക്കാർ തയാറായിട്ടില്ല. മുമ്പ് നടന്ന കർഷക സമരത്തോട് സർക്കാർ എടുത്ത സമീപനം ലോകം കണ്ടതുമാണ്. കർഷകരാണ് ഇൗ രാജ്യത്തിന്റെ സാമ്പത്തിക വ്യവസ്ഥയുടെ നെട്ടല്ല്. അന്തസ്സും മാന്യവുമായ ജീവിതം കർഷകർ അർഹിക്കുന്നു. അതിനാൽതന്നെ കർഷകർക്കൊപ്പം നിലയുറപ്പിക്കുകയാണ് രാജ്യം ഇൗ നിമിഷം ചെയ്യേണ്ടത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.