പാലാ: തോട്ടിൽ കുളിക്കുന്നതിനിടെ ഒഴുക്കില്പെട്ട് മധ്യപ്രദേശ് സ്വദേശിനി മരിച്ചു. പാലായില് സ്ലോലെസ് ബ്യൂട്ടി പാര്ലർ ജീവനക്കാരി െനഹയാണ് (31) മരിച്ചത്. വ്യാഴാഴ്ച രാവിലെ 11.15ഓടെ പാലാ സ്റ്റേഡിയത്തിനുസമീപം ളാലം തോട്ടിലാണ് അപകടം. സഹപ്രവർത്തകരും മധ്യപ്രദേശ് സ്വദേശിനികളുമായ ബിന്ധ്യ, രണ്ബീര്, സുജുലാല്, ചന്ദ്ര് എന്നിവർക്കൊപ്പം പുഴക്കര കടവില് കുളിക്കാനിറങ്ങിയതായിരുന്നു. ശക്തമായ ഒഴുക്കുള്ള ഇവിടെ കുളിക്കുന്നത് സമീപവാസിയായ വീട്ടമ്മ വിലക്കിയിരുന്നു. എന്നാൽ, നീന്തല് വശമുണ്ടെന്ന് പറഞ്ഞാണ് ഇവരിറങ്ങിയത്. കുറച്ചുസമയത്തിനകം നെഹയും ബിന്ധ്യയും ഒഴുക്കില്പെട്ടു. ബിന്ധ്യ തോട്ടിലെ ചെടിയില് പിടിച്ചുകിടന്നു. നെഹ ഒഴുകിപ്പോയി. ഇതേസമയം, സ്റ്റേഡിയത്തില് ജില്ല സ്പോര്ട്സ് ഹോസ്റ്റലിലേക്കുള്ള വിദ്യാര്ഥികളുടെ പ്രവേശനം നടക്കുകയായിരുന്നു. നിലവിളികേട്ട് ഓടിയെത്തിയ ജില്ല സ്പോര്ട്സ് ഓഫിസര് എസ്. മനോജ്, സ്പോര്ട്സ് കൗണ്സില് നീന്തല് പരിശീലകന് വേണുഗോപാല്, അത്ലറ്റിക് പരിശീലകന് ബൈജു ജോസഫ് എന്നിവർ തോട്ടിലിറങ്ങി രക്ഷാപ്രവര്ത്തനം നടത്തി. പുഴക്കരപാലത്തിന് സമീപത്തുനിന്നാണ് നെഹയെ കരക്കെത്തിച്ചത്. പാലാ എസ്.എച്ച്.ഒ തോംസണ് കെ. പീറ്റര്, ഫയര്ഫോഴ്സ് ഓഫിസര് ബിജുമോന് എന്നിവരുടെ നേതൃത്വത്തില് പാലാ ജനറല് ആശുപത്രിയിലും തുടര്ന്ന് കോട്ടയം മെഡിക്കല് കോളജിലും എത്തിച്ചെങ്കിലും രാത്രി ഒമ്പതോടെ മരിച്ചു.