കടുത്തുരുത്തി: മദ്യലഹരിയിലുണ്ടായ വാക്തർക്കത്തിനിടയിൽ വീണ് പരിക്കേറ്റ് ചികിത്സയിലിരുന്നയാൾ മരിച്ചു. ഞീഴൂർ മരങ്ങോലി പുളിക്കിയിൽ പി.കെ. പൈലിയാണ് (58) മരിച്ചത്. സംഭവത്തിൽ മരങ്ങോലി നെല്ലിക്കുന്നേൽ ടോമി (50) അറസ്റ്റിലായി.ഈ മാസം 14ന് രാത്രി 9.30ഓടെ മരങ്ങോലി കള്ളുഷാപ്പിന് മുൻവശമാണ് ഇവർ തമ്മിൽ വഴക്കുണ്ടായതെന്ന് പൊലീസ് പറഞ്ഞു. ടോമിയും പൈലിയും രമണൻ എന്നയാളും തമ്മിൽ വാക്തർക്കമുണ്ടായി. ഇതിനിടയിൽ ടോമി പിടിച്ചു തള്ളിയപ്പോൾ പൈലി തലയടിച്ചുവീഴുകയായിരുന്നു. ബോധരഹിതനായ പൈലിയെ ഉപേക്ഷിച്ച് ഇവർ സ്ഥലംവിട്ടു. രക്തം വാർന്നുകിടന്ന പൈലിയെ സഹോദരങ്ങളും നാട്ടുകാരും ചേർന്നാണ് കോട്ടയം മെഡിക്കൽ കോളജ് ആശുപത്രിയിൽ എത്തിച്ചത്. തിങ്കളാഴ്ച രാവിലെ 6.45ഓടെ മരിക്കുകയായിരുന്നു. പോസ്റ്റ്മോർട്ടത്തിനുശേഷം മൃതദേഹം സംസ്കരിച്ചു. ഭാര്യ: മോളി. മക്കൾ: മെബീന, മോബിൻ. സംഭവത്തിൽ രമണൻ എന്നയാളെ പിടികൂടാനുണ്ടെന്നും ഇയാൾക്കായി അന്വേഷണം ഊർജിതമാക്കിയതായും കടുത്തുരുത്തി എസ്.ഐ ബിബിൻ ചന്ദ്രൻ പറഞ്ഞു.