കാഞ്ഞിരപ്പള്ളി: മലയോര മേഖലയിലെ വിദ്യാഭ്യാസ ഉന്നമനത്തിന് അരനൂറ്റാണ്ടോളം പ്രവർത്തിച്ച വൈദികനും കാഞ്ഞിരപ്പള്ളി രൂപതാംഗവുമായ ഡോ.ആൻറണി നിരപ്പേൽ (84) നിര്യാതനായി. വാർധക്യസഹജമായ അസുഖങ്ങളെ തുടർന്ന് മുണ്ടക്കയത്തെ മെഡിക്കൽ ട്രസ്റ്റ് ആശുപത്രിയിൽ ചികിത്സയിലായിരുന്നു. ചെങ്ങളം ഇടവക നിരപ്പേൽ കുഞ്ഞുമത്തായി-റോസമ്മ ദമ്പതികളുടെ ഒമ്പതു മക്കളിൽ മൂന്നാമനായി 1936 സെപ്റ്റംബർ എട്ടിനാണ് ജനനം. പ്രാഥമിക വിദ്യാഭ്യാസത്തിനുശേഷം ചങ്ങനാശ്ശേരി പാറേൽ സെമിനാരിയിൽ ചേർന്നു. ആലുവ സെൻറ് ജോസഫ്സ് പൊന്തിഫിക്കൽ സെമിനാരിയിൽ വൈദിക പരിശീലനം പൂർത്തിയാക്കി 1963 മാർച്ച് 11ന് തിരുപ്പട്ടം സ്വീകരിച്ചു. ചങ്ങനാശ്ശേരി കത്തീഡ്രലിൽ സഹവികാരിയായിട്ടായിരുന്നു ആദ്യനിയമനം. അഞ്ചു വർഷം ബെൽജിയത്തെ ലുവൈൻ യൂനിവേഴ്സിറ്റിയിലും ഒരു വർഷം ലൂമെൻ വീത്തേ എന്ന കാറ്റക്കെറ്റിക്കൽ ഇൻസ്റ്റിറ്റ്യൂട്ടിലും ഉപരിപഠനം നടത്തി. ഏഴു വർഷം ചങ്ങനാശ്ശേരി സന്ദേശനിലയത്തിൽ മതബോധന ഡയറക്ടറായി പ്രവർത്തിച്ചു. അഞ്ചുവർഷം അമേരിക്കയിലും ചിറക്കടവ് താമരക്കുന്ന്, പൊൻകുന്നം, ആനക്കല്ല്, വെളിച്ചിയാനി, എലിക്കുളം, കൂവപ്പള്ളി എന്നിവിടങ്ങളിലും വികാരിയായി സേവനമനുഷ്ഠിച്ചു.ചെങ്ങളം മേഴ്സി ഹോസ്പിറ്റൽ, എസ്.എച്ച് സ്കൂൾ, ചിറക്കടവ് സെൻറ് ഇഫ്രേംസ് ഹൈസ്കൂൾ, സെൻറ് അപ്രേംസ് മെഡിക്കൽ സെൻറർ എന്നിവ സ്ഥാപിക്കുന്നതിന് നേതൃത്വം വഹിച്ചു. ആനക്കല്ലിൽ സെൻറ് ആൻറണീസ് പബ്ലിക് സ്കൂൾ സ്ഥാപിച്ചു.
കാഞ്ഞിരപ്പള്ളി സെൻറ് ആൻറണീസ് കോളജും പെരുവന്താനത്ത് സ്വാശ്രയ മേഖലയിൽ തുടങ്ങിയ സെൻറ് ആൻറണീസ് കോളജും മേഖലയിലെ വേറിട്ടതായി മാറി. നിലക്കൽ പള്ളിയുടെ പുനഃസ്ഥാപനത്തിന് നിർണായക പങ്കുവഹിച്ചു. സംസ്കാരം ബുധനാഴ്ച ഉച്ചക്ക് രണ്ടിന് ചെങ്ങളം സെൻറ് ആൻറണീസ് പള്ളി സെമിത്തേരിയിൽ.