ഗാന്ധിനഗര് (കോട്ടയം): നിരവധി ക്രിമിനൽ കേസുകളിൽ പ്രതിയായ യുവാവിനെ തൂങ്ങിമരിച്ച നിലയിൽ കണ്ടെത്തി. അതിരമ്പുഴ മാന്നാനം കരയില് അമലഗിരി ഗ്രേസ് കോട്ടേജില് അമ്മഞ്ചേരി സിബി എന്ന സിബി ജി. ജോണാണ് (39) മരിച്ചത്. ശനിയാഴ്ച രാവിലെ അമ്മഞ്ചേരി ഗാന്ധിനഗര് ഹൗസിങ് കോളനിയിലെ വാടകവീടിെൻറ അടുക്കളയുടെ ഗ്രില്ലിനോടു ചേര്ന്നാണ് തൂങ്ങിമരിച്ച നിലയില് കണ്ടത്. സംഭവസ്ഥലത്ത് ടെറസില് കയറാന് ഉപയോഗിച്ച ഏണിയും ഒഴിഞ്ഞ മദ്യക്കുപ്പിയും വെള്ളക്കുപ്പിയും ഗ്ലാസും കണ്ടെത്തി. പ്ലാസ്റ്റിക് കയര് കഴുത്തില്കെട്ടി ടെറസില്നിന്ന് താഴേക്കു ചാടുകയായിരുന്നു എന്നാണ് പ്രാഥമിക നിഗമനം. മൃതദേഹം മെഡിക്കൽ കോളജ് മോർച്ചറിയിലേക്ക് മാറ്റി. കോട്ടയം ജില്ലയിലെ വിവിധ പൊലീസ് സ്റ്റേഷനുകളിലായി നിരവധി കേസുകളില് പ്രതിയാണ് സിബി. ഗാന്ധിനഗര് സ്റ്റേഷനിലും സമീപ സ്റ്റേഷനുകളിലും രജിസ്റ്റര് ചെയ്ത പിടിച്ചുപറി, ദേഹോപദ്രവം, കൊലപാതകശ്രമം, ആയുധങ്ങളുമായി സംഘം ചേര്ന്ന് ആക്രമിച്ച് പരിക്കേല്പിക്കൽ, പൊലീസ് ഉദ്യോഗസ്ഥരെ ആക്രമിക്കുക, പൊലീസ് വാഹനത്തിന് കേടുപാടുകള് വരുത്തുക തുടങ്ങിയ ക്രിമിനല് കേസുകളില് ഇയാള്ക്കെതിരെ കാപ്പ ചുമത്തി നാടുകടത്തിയിരുന്നു. പലിശക്ക് പണമിടപാടുമുണ്ട്.സംസ്കാരം ഞായറാഴ്ച ഉച്ചക്ക് രണ്ടിന് ചിങ്ങവനം പരുത്തുംപാറ ആത്മചൈതന്യ സെമിത്തേരിയിൽ.