ഈരാറ്റുപേട്ട: അടുക്കത്തെ മാർമല അരുവിയിൽ കുളിക്കാനിറങ്ങിയ നേവി ഉദ്യോഗസ്ഥൻ മുങ്ങിമരിച്ചു. ലഖ്നൗ സ്വദേശിയും കൊച്ചി നേവൽ കമാൻഡിലെ നേവൽ ഓഫിസറുമായ ലഫ്റ്റനൻറ് അഭിഷേക് കുമാറാണ് (28) മരിച്ചത്. ഞായറാഴ്ച ഉച്ചയോടെയായിരുന്നു സംഭവം. രണ്ട് കാറുകളിലായി എട്ടംഗ നേവി സംഘമാണ് അരുവി സന്ദർശിക്കാൻ എത്തിയത്. ഇതിൽ നാലുപേർ അരുവിയിൽ കുളിക്കാനിറങ്ങി. ഇതിനിടെ അഭിഷേക്കുമാറിനെ കാണാതാവുകയായിരുന്നു. സംഭവസ്ഥലത്തുണ്ടായിരുന്ന ഈരാറ്റുപേട്ടയിൽനിന്ന് അരുവി കാണാനെത്തിയ നടക്കൽ സ്വദേശി മുജീബാണ് വിവരം നാട്ടുകാരെ അറിയിച്ചത്. ഉടൻ അഗ്നിരക്ഷാസേനയും പൊലീസും ടീം നന്മക്കൂട്ടവും സംഭവസ്ഥലത്തെത്തി.ശക്തമായ ഒഴുക്കായതിനാൽ നന്മക്കൂട്ടം അംഗങ്ങൾ മാത്രമാണ് വെള്ളത്തിലിറങ്ങിയത്. ഒരുമണിക്കൂറോളം നീണ്ട തിരച്ചിലിനൊടുവിലാണ് നന്മക്കൂട്ടം പ്രവർത്തകർ മൃതദേഹം കണ്ടെടുത്തത്. ശക്തമായ ഒഴുക്കാണ് ഇപ്പോൾ അരുവിയിൽ. കയത്തിൽ നല്ല തണുപ്പും അനുഭവപ്പെടുന്നുണ്ട്.ഈരാറ്റുപേട്ട പൊലീസ് ഇൻക്വസ്റ്റ് തയാറാക്കി മൃതദേഹം പി.എം.സി ഹോസ്പിറ്റൽ മോർച്ചറിയിലേക്ക് മാറ്റി.നിരവധി അപകടങ്ങളാണ് മാർമല അരുവിയിൽ സംഭവിച്ചിട്ടുള്ളത്. കഴിഞ്ഞ ദിവസം വേങ്ങത്താനം അരുവിയിൽ മുങ്ങിമരിച്ച കാഞ്ഞിരപ്പള്ളി ഒന്നാംമൈൽ സ്വദേശി ഷാജിയുടെ മകൻ അഹദിെൻറ സംസ്കാരച്ചടങ്ങുകൾ നടന്നുകൊണ്ടിരിക്കെയാണ് മാർമല അരുവി മറ്റൊരപകടത്തിന് സാക്ഷിയായത്.