ഏറ്റുമാനൂർ: കോവിഡ് പ്രതിസന്ധിയിൽ കോട്ടയത്ത് വീണ്ടും ആത്മഹത്യ. ഏറ്റുമാനൂരിന് സമീപം പുന്നത്തുറ കറ്റോട് ജങ്ഷനിൽ ചായക്കട നടത്തുകയായിരുന്ന കറ്റോട് കണിയാംകുന്നേൽ കെ.ടി. തോമസിനെയാണ് (60) തൂങ്ങിമരിച്ച നിലയിൽ കണ്ടെത്തിയത്. കഴിഞ്ഞദിവസം വൈകീട്ട് നാലോടെയാണ് മൃതദേഹം കടയിൽ കണ്ടത്. ഷട്ടർ പൂട്ടാതെ താഴ്ത്തിയിട്ട നിലയിലായിരുന്നു. പരിസരവാസികളാണ് മൃതദേഹം ആദ്യം കണ്ടത്. തുടർന്ന് പൊലീസ് സ്ഥലത്തെത്തി പരിശോധന നടത്തി. നേരേത്ത ബേക്കറിയും നടത്തിയിരുന്നു. അടുത്തകാലത്ത് ചായക്കടയിലേക്ക് മാത്രമായി തിരിയുകയായിരുന്നു. കോവിഡ് പ്രതിസന്ധിമൂലം വ്യാപാരം കുറഞ്ഞതോടെ തോമസ് വലിയ വിഷമത്തിലായിരുന്നു. 2019-ൽ ഇദ്ദേഹം സഞ്ചരിച്ച സ്കൂട്ടർ ഇടിച്ച് ഒരു സ്ത്രീക്ക് പരിക്കേറ്റിരുന്നു. ഇതിെൻറ കേസ് നടത്തിപ്പുമായി ബന്ധപ്പെട്ടും മനോവിഷമമുണ്ടായിരുന്നതായി ബന്ധുക്കൾ പറഞ്ഞു. മൃതദേഹം പോസ്റ്റ്മോർട്ടത്തിന് മെഡിക്കൽ കോളജ് ആശുപത്രിയിലേക്ക് മാറ്റി. റീനിയാണ് ഭാര്യ. മക്കൾ: ജെറി, ജിനു.
