ഏറ്റുമാനൂർ: മീനച്ചിലാറ്റിൽ കുളിക്കാനിറങ്ങിയ യുവാവ് മുങ്ങിമരിച്ചു. പേരൂർ ചിറ്റുമാലിയിൽ മാധവന്‍നായരുടെയും തങ്കമണിയുടെയും മകന്‍ സി.എം. പ്രമോദാണ് (46) മരിച്ചത്. ചൊവ്വാഴ്ച സന്ധ്യയോടെ പേരൂർ പൂവത്തുംമൂട് പാലത്തിന് സമീപത്തെ വീടിനുമുന്നിലെ കടവിൽ കുളിക്കാനിറങ്ങിയതായിരുന്നു. പുറത്തുപോയ ഭാര്യ തിരിച്ചെത്തിയപ്പോൾ പ്രമോദിനെ കാണാത്തതിനെത്തുടർന്നുള്ള അന്വേഷണത്തിൽ കടവിൽ ചെരുപ്പ് കണ്ടെത്തുകയുമായിരുന്നു. കോട്ടയത്തുനിന്ന് എത്തിയ അഗ്നിരക്ഷാസേനയും നാട്ടുകാരും ചേർന്ന് നടത്തിയ തിരച്ചിൽ ഫലം കണ്ടില്ല. ബുധനാഴ്ച രാവിലെ വീണ്ടും തുടർന്ന തിരച്ചിലിനിടെ കടവിൽനിന്നുതന്നെ മൃതദേഹം കണ്ടെത്തുകയായിരുന്നു. ഏറ്റുമാനൂർ വെട്ടൂർ ടെക്സ്റ്റൈൽസ് ജീവനക്കാരനാണ്. ഭാര്യ: ദിവ്യ. മകള്‍: നന്ദന. സഹോദരങ്ങള്‍: പ്രശാന്ത്, പ്രദീപ്. സംസ്കാരം വ്യാഴാഴ്ച ഉച്ചക്ക് 12ന് വീട്ടുവളപ്പില്‍.
