ആലപ്പുഴ: പി.എസ്.സി മുൻ ചെയർമാനും മുതിർന്ന കോൺഗ്രസ് നേതാവുമായ ആലപ്പുഴ സനാതനപുരം കളർകോട് രശ്മിയിൽ പ്രഫ. വി. ഗോപാലകൃഷ്ണക്കുറുപ്പ് (86) നിര്യാതനായി. 1984ലാണ് പി.എസ്.സി ചെയർമാനായത്. ആലപ്പുഴ എസ്.ഡി കോളജ് ധനതത്ത്വശാസ്ത്രവിഭാഗം പ്രഫസറായിരുന്നു. 24ാം വയസ്സിൽ ഡി.സി.സി അംഗമായി. തച്ചടി പ്രഭാകരൻ ഡി.സി.സി പ്രസിഡന്‍റായപ്പോൾ വൈസ് പ്രസിഡന്‍റായിരുന്നു. കെ. കരുണാകരന്‍റെ വിശ്വസ്തനായിരുന്നു. അവിഭക്ത എ.കെ.പി.സി.ടി.എയുടെയും പിന്നീട് പി.സി.ടി.എയുടെയും രൂപവത്കരണത്തിന് നേതൃപരമായ പങ്കുവഹിച്ചു. കർഷക കോൺഗ്രസ് സംസ്ഥാന പ്രസിഡന്‍റ്, കെ.പി.സി.സി അച്ചടക്കസമിതി അംഗം, നിർവാഹക സമിതി അംഗം എന്നീ നിലകളിലും പ്രവർത്തിച്ചു.
ഹരിപ്പാട് പിലാപ്പുഴ എരുമക്കാട്ട് കൊട്ടാരത്തിൽ വേലായുധക്കുറുപ്പ്-ഗൗരിയമ്മ ദമ്പതികളുടെ മകനാണ്. ഭാര്യ: പത്മാവതിയമ്മ. മകൻ: ഡോ. വിനുകുമാർ. മരുമകൾ: നിത്യ. സംസ്കാരം ശനിയാഴ്ച വൈകീട്ട് നാലിന് നെടുമുടിയിലെ കുടുംബ വീട്ടുവളപ്പിൽ.
