മാരാരിക്കുളം: വാഹനാപകടത്തിൽ പരിക്കേറ്റ് ചികിത്സയിലിരുന്ന കോൺഗ്രസ് നേതാവ് മരിച്ചു. മാരാരിക്കുളം വടക്ക് പഞ്ചായത്ത് പതിനെട്ടാം വാർഡ് ജനക്ഷേമം കാരക്കാട്ട് കെ.വി. ജോസിയാണ് (54) മരിച്ചത്. ഡിസംബർ 28ന് രാത്രി കോലഞ്ചേരി കടമറ്റത്തിന് സമീപമായിരുന്നു അപകടം. ഗുരുതര പരിക്കേറ്റ് കോലഞ്ചേരി മെഡിക്കൽ മിഷൻ മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു. അഖിലേന്ത്യ മത്സ്യത്തൊഴിലാളി കോൺഗ്രസ് സംസ്ഥാന ജനറൽ സെക്രട്ടറി, കോൺഗ്രസ് മാരാരിക്കുളം മണ്ഡലം പ്രസിഡന്റ്, ചെത്തി മത്സ്യത്തൊഴിലാളി ക്ഷേമ സഹകരണ സംഘം പ്രസിഡന്റ് എന്നീ നിലകളിൽ പ്രവർത്തിക്കുകയായിരുന്നു. രണ്ടുതവണ മാരാരിക്കുളം വടക്ക് പഞ്ചായത്ത് ജനപ്രതിനിധിയായിരുന്നു. ഭാര്യ: അനിത. മക്കൾ: റോബിൻ, അയറിൻ. സംസ്കാരം ബുധനാഴ്ച്ച രാവിലെ 11ന് മാരാരിക്കുളം സെന്‍റ് അഗസ്റ്റിൻസ് ദേവാലയ സെമിത്തേരിയിൽ.
