തലയോലപ്പറമ്പ്: മത്സ്യബന്ധനത്തിനിടെ തൊഴിലാളി പുഴയിൽ മുങ്ങിമരിച്ചു. വൈക്കം മറവൻതുരുത്ത് ഇടവട്ടം ചോളൻവീട്ടിൽ ബിജുവാണ് (49) മരിച്ചത്. വ്യാഴാഴ്ച വൈകീട്ട് അഞ്ചോടെ മൂവാറ്റുപുഴയാറിൽ പാലാംകടവ് തുരുത്തേൽ ഭാഗത്ത് മത്സ്യബന്ധനത്തിനിടയിലായിരുന്നു അപകടം.
നാട്ടുകാർ രക്ഷാപ്രവർത്തനത്തിന് ശ്രമിച്ചെങ്കിലും വിഫലമായതോടെ കടുത്തുരുത്തി അഗ്നിരക്ഷാസേനയുടെ രണ്ട് യൂനിറ്റും വൈക്കം അഗ്നിരക്ഷാസേനയും എത്തി. സ്കൂബ ടീം അംഗങ്ങളായ ശ്രീനാഥ്, കെ.എസ്. നന്ദു എന്നിവർ പുഴയിൽ ഇറങ്ങി 10 മിനിറ്റിനകം ബിജുവിനെ മുങ്ങിയെടുത്തു കരയിൽ കൊണ്ടുവന്ന് പ്രഥമ ശുശ്രൂഷ നൽകി. തുടർന്ന്, ആംബുലൻസിൽ വൈക്കം താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കടുത്തുരുത്തി അഗ്നിരക്ഷാനിലയം അസി. സ്റ്റേഷൻ ഓഫിസർ ടി. ഷാജികുമാർ, സീനിയർ ഫയർ ആൻഡ് റെസ്ക്യൂ ഓഫിസർമാരായ എ. നൗഷാദ്, എസ്.ആർ. രഞ്ജിത്ത്, റിജിൻ പ്രകാശ്, ആർ.രാകേഷ്, കെ.സി. മനു എന്നിവർ നേതൃത്വം നൽകി.
