വൈപ്പിന്: നിയന്ത്രണം വിട്ട മോട്ടോര് സൈക്കിള് മതിലില് ഇടിച്ച് യാത്രക്കാരൻ മരിച്ചു. കൂടെ സഞ്ചരിച്ച ആള്ക്ക് ഗുരുതര പരിക്കേറ്റു. എളങ്കുന്നപ്പുഴ പെരുമാള്പടി തോട്ടുങ്കത്തറ പ്രവീണിന്റെ മകന് രോഹന് കുമാറാണ് (18) മരിച്ചത്. ഒപ്പമുണ്ടായിരുന്ന പുതുവൈപ്പ് തോണിപ്പാലം സ്വദേശി അമലിനാണ്(25) പരിക്കേറ്റത്. ഇയാള് എറണാകുളം ലിസി ആശുപത്രിയില് ചികിത്സയിലാണ്. ഞായറാഴ്ച പുലര്ച്ച നാലരയോടെ സംസ്ഥാനപാതയില് തെക്കന് മാലിപ്പുറം കൊട്ടാരം ബാറിനു മുന്നിലായിരുന്നു അപകടം. ഉടന് ആശുപത്രിയിലെത്തിച്ചെങ്കിലും രോഹന് മരിച്ചു. പുലര്ച്ച പെട്രോള് നിറക്കാൻ വല്ലാര്പാടം പെട്രോള് പമ്പിലേക്ക് പോകുമ്പോഴായിരുന്നു അപകടം. രോഹന്റെ മൃതദേഹം പോസ്റ്റ്മോര്ട്ടത്തിനുശേഷം സംസ്കരിച്ചു. മാതാവ്: ബിന്ദു, സഹോദരന്: അശ്വിന്.