അമ്പലപ്പുഴ: ലോറിയിലിടിച്ച് തെറിച്ച് റോഡില്വീണ ബൈക്ക് യാത്രക്കാരനായ ഐ.ടി.സി വിദ്യാർഥിക്ക് ദാരുണാന്ത്യം. അമ്പലപ്പുഴ വടക്ക് ഗ്രാമപഞ്ചായത്ത് നീർക്കുന്നം അഞ്ചിൽവീട്ടിൽ സന്തോഷ്-രഹന ദമ്പതികളുടെ മകൻ അഭിഷേകാണ് (19) തൽക്ഷണം മരിച്ചത്. ദേശീയപാതയിൽ പുന്നപ്ര കപ്പക്കട ഭാഗത്ത് ബൈക്ക് ട്രെയിലറിൽതട്ടി റോഡിൽ വീണാണ് മരണം. ആലപ്പുഴയിലെ പാരലൽ കോളജിലേക്ക് കൂട്ടുകാരനെ ബൈക്കിൽ കൊണ്ടുപോകുന്നതിനിടെ ദേശീയപാതയിൽ അറവുകാട് കപ്പക്കടക്ക് സമീപം ശനിയാഴ്ച രാവിലെ ഒമ്പതരയോടെയായിരുന്നു അപകടം. മുന്നിൽ പോകുകയായിരുന്ന ട്രെയിലറിൽ ബൈക്ക് തട്ടി റോഡിലേക്ക് വീണ അഭിഷേകിന്റെ ദേഹത്ത് അടൂരിലേക്ക് പൈപ്പ് കയറ്റിപ്പോകുകയായിരുന്ന ലോറി കയറിയിറങ്ങുകയായിരുന്നു. പുന്നപ്ര അറവുകാട് ഐ.ടി.സിയിലെ ഒന്നാംവർഷ വിദ്യാർഥിയാണ്. സഹോദരി: അഭിരാമി. സംസ്കാരം ഞായറാഴ്ച രാവിലെ 11ന് വീട്ടുവളപ്പിൽ.
