പൊൻകുന്നം: റോഡ് മുറിച്ചുകടക്കവേ ബൈക്കിടിച്ച് ഡ്രൈവിങ് സ്‌കൂൾ ഉടമ മരിച്ചു. ബിസ്മി മോട്ടോർ ഡ്രൈവിങ് സ്‌കൂൾ ഉടമ കൂട്ടിക്കൽ മഠത്തിൽ എം.എസ്. ജലീലാണ് (62) മരിച്ചത്. പാലാ-പൊൻകുന്നം റോഡിൽ പൊൻകുന്നം അട്ടിക്കൽ ഭാഗത്ത് പഴയ ആർ.ടി ഓഫിസ് കെട്ടിടത്തിന് സമീപമായിരുന്നു അപകടം. ഈ ഭാഗത്തുതന്നെയാണ് ജലീലിന്റെ ഓഫിസ്. സമീപത്തുള്ളവർ ചേർന്ന് പൊൻകുന്നത്തെ സ്വകാര്യ ആശുപത്രിയിലും പിന്നീട് പാലാ മാർസ്ലീവ ഹോസ്പിറ്റലിലും എത്തിച്ചെങ്കിലും രക്ഷിക്കാനായില്ല. ബൈക്ക് യാത്രികരായ തമിഴ്നാട് സ്വദേശികളായ രണ്ട് യുവാക്കൾക്ക് പരിക്കുണ്ട്. ഇവരെ കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചു. മൃതദേഹം പാലാ ജനറൽ ആശുപത്രി മോർച്ചറിയിൽ. ഭാര്യ: സെലീന. മക്കൾ: ബിസ്മി, റിസ്മി, റിഷാദ്. മരുമക്കൾ: റെനീഷ്, ഉനൈസ്. ഖബറടക്കം ചൊവ്വാഴ്ച കൂട്ടിക്കൽ ജുമാമസ്ജിദ് ഖബർസ്ഥാനിൽ.
