മണ്ണഞ്ചേരി: മിനിഗുഡ്‌ഡ് വാഹനം മറിഞ്ഞ് യുവാവ് മരിച്ചു. ആര്യാട് പഞ്ചായത്ത് ഒന്നാം വാർഡിൽ പനച്ചിക്കൽ വീട്ടിൽ ബനഡിക്ടിന്റെ മകൻ ജോൺ ബോസ്കോയാണ് (27) മരിച്ചത്. ബുധനാഴ്ച രാവിലെ ഒമ്പതോടെ മെറ്റൽ പൊടിയുമായി പാതിരപ്പള്ളി ബണ്ട് റോഡിലെത്തി ചരക്ക് ഇറക്കിയ ശേഷം വാഹനം വൃത്തിയാക്കുമ്പോൾ തനിയെ മുന്നോട്ടു നീങ്ങിയ വാഹനം നിയന്ത്രിക്കുന്നതിനിടെ സമീപത്തെ കുറ്റിയിൽ തട്ടി വീണ ജോൺ ബോസ്ക്കോയുടെ ദേഹത്തേക്ക് വാഹനം മറിയുകയായിരുന്നു. ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മാതാവ്: മറിയാമ്മ. സഹോദരങ്ങൾ: ആന്റണി, റോബർട്ട്. മൃതദേഹം ആലപ്പുഴ ജനറൽ ആശുപത്രി മോർച്ചറിയിൽ. സംസ്കാരം വ്യാഴാഴ്ച.
