മൂവാറ്റുപുഴ: കാറും ഓട്ടോറിക്ഷയും കൂട്ടിയിടിച്ച് ഒരാൾ മരിച്ചു. രണ്ടുപേർക്ക് ഗുരുതരമായി പരിക്കേറ്റു. കൊച്ചി-ധനുഷ്കോടി ദേശീയപാതയിൽ മൂവാറ്റുപുഴ വാളകത്ത് ബുധനാഴ്ച രാവിലെ 11 ഓടെയാണ് അപകടം. ഓട്ടോയിൽ സഞ്ചരിച്ചിരുന്ന മേക്കടമ്പ് വടക്കേ പാലക്കാട്ടിൽ മുഴമ്പേൽ നാരായണനാണ് (60) മരിച്ചത്. ഓട്ടോറിക്ഷ ഡ്രൈവർ മേക്കടമ്പ് വാരക്കാപ്പിള്ളി എബ്രഹാം (67), കാർ ഡ്രൈവർ ഇടുക്കി കോലാനി കാവുക്കാട്ട് അജിത് കുമാർ (56) എന്നിവർക്കാണ് പരിക്ക്. ഇവരെ കോലഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.മൂവാറ്റുപുഴയിൽനിന്ന് എറണാകുളത്തേക്ക് പോകുകയായിരുന്ന കാർ അമിതവേഗത്തിൽ മറ്റൊരു വാഹനത്തെ മറികടക്കുമ്പോൾ എതിരെ വന്ന ഓട്ടോറിക്ഷയിൽ ഇടിക്കുകയായിരുന്നു.നാട്ടുകാർ പരിക്കേറ്റവരെ ഉടൻ ആശുപത്രിയിൽ എത്തിച്ചെങ്കിലും നാരായണനെ രക്ഷപ്പെടുത്താനായില്ല. നാരായണന്‍റെ മൃതദേഹം വ്യാഴാഴ്ച പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുകൊടുക്കും. ഷെല്ലിയാണ് നാരായണന്‍റെ ഭാര്യ. മക്കൾ: നിമിഷ, നിമേഷ്.
