കേരളശ്ശേരി: ബൈക്കും കാറും കൂട്ടിയിടിച്ച് ബൈക്ക് യാത്രക്കാരനായ വാദ്യകലാകാരൻ മരിച്ചു. കേരളശ്ശേരി വടശ്ശേരി തെഞ്ചീരി വീട്ടിൽ സുരേഷ് കുമാർ (ഓമനക്കുട്ടൻ -35) ആണ് മരിച്ചത്. കോങ്ങാട് -പത്തിരിപ്പാല റോഡിൽ വടശേരി ബസ്സ്റ്റോപ്പിന് താഴെ ബുധനാഴ്ച ഉച്ച ഒന്നരയോടെയാണ് സംഭവം. ബൈക്കിനു മുന്നിൽ സഞ്ചരിച്ചിരുന്ന കാർ വലത് ഭാഗത്തേക്ക് തിരിച്ചപ്പോൾ കാറിന്‍റെ വാതിൽ ബൈക്കിൽ തട്ടിയാണ് അപകടമെന്ന് ദൃക്സാക്ഷികൾ പറഞ്ഞു. ഗുരുതര പരിക്കേറ്റ സുരേഷ് കുമാറിനെ പത്തിരിപ്പാലയിലെ സ്വകാര്യ ആശുപത്രിയിലും പിന്നീട് പാലക്കാട് ജില്ല ആശുപത്രിയിലും എത്തിച്ചുവെങ്കിലും രക്ഷിക്കാനായില്ല. മൃതദേഹം പാലക്കാട് ജില്ല ആശുപത്രിയിൽ. വ്യാഴാഴ്ച പോസ്റ്റ്മോർട്ടത്തിന് ശേഷം ബന്ധുക്കൾക്ക് കൈമാറും. മരിച്ച സുരേഷ് കുമാർ അറിയപ്പെടുന്ന കുറുംകുഴൽ കലാകാരനായിരുന്നു. കുണ്ടളശേരി തിരുനെല്ലി ക്ഷേത്രത്തിൽ ശ്രീകൃഷ്ണപുരം മോഹനന്‍റെ ശിക്ഷണത്തിൽ ചെറുപ്പത്തിലേ വാദ്യകല അഭ്യസിച്ചു. പിതാവ്: രാമകൃഷ്ണൻ. മാതാവ്: ശ്രീദേവി. ഭാര്യ: ഉപന്യ. മകൾ: വൈഗ.
