മുണ്ടൂർ: കാറും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. കല്ലടിക്കോട് മേലേ മഠത്തിൽ പരേതനായ ചിന്നന്‍റെ മകൻ ദിഷ്ണുവാണ് (20) മരിച്ചത്. കല്ലടിക്കോട് ഭാഗത്തുനിന്ന് പാലക്കാട്ടേക്ക് പോകുന്ന ബൈക്കും ഇതേ ദിശയിൽ വരുന്ന കാറും കൂട്ടിയിടിച്ചാണ് അപകടം. മൈലംപുള്ളി ഭാഗത്ത് കാർ വലത്തോട്ട് തിരിച്ചതാണ് അപകടത്തിനിടയാക്കിയതെന്ന് കോങ്ങാട് പൊലീസ് പറഞ്ഞു. പാലക്കാട്-കോഴിക്കോട് ദേശീയപാതയിൽ വേലിക്കാടിനടുത്ത് മൈലംപുള്ളിയിൽ വെള്ളിയാഴ്ച രാവിലെ 9.15നാണ് സംഭവം. മേലേ മഠത്തെ വീട്ടിൽനിന്ന് പാലക്കാട്ടെ സ്വകാര്യ സ്ഥാപനത്തിൽ ജോലിക്ക് പോകുന്ന യുവാവാണ് അപകടത്തിൽപെട്ടത്. സാരമായി പരിക്കേറ്റ യുവാവിനെ ആദ്യം പാലക്കാട് ജില്ല ആശുപത്രിയിലും തുടർന്ന് വിദഗ്ധ ചികിത്സക്കായി തൃശൂർ മെഡിക്കൽ കോളജിലും കൊണ്ടുപോയെങ്കിലും വെള്ളിയാഴ്ച ഉച്ചക്ക് 12ന് മരിച്ചു. മാതാവ്: രാധ. സഹോദരൻ: രാജൻ എന്ന ദീപു.
