കോട്ടയം: അമിതവേഗത്തിലെത്തിയ കാറിടിച്ച് സ്‌കൂട്ടർ യാത്രികൻ മരിച്ചു. സൗത്ത് പാമ്പാടി വെള്ളറമറ്റത്തിൽ വി.കെ. രാജപ്പൻ (കുഞ്ഞ് -68) ആണ് മരിച്ചത്. ചൊവ്വാഴ്ച വൈകീട്ട് നാലിന് പാമ്പാടി ആലാംപള്ളി കവലക്ക് സമീപമാണ് അപകടം. ഗുരുതര പരിക്കേറ്റ രാജപ്പനെ പാമ്പാടി താലൂക്ക് ആശുപത്രിയിലും പിന്നീട് മെഡിക്കൽ കോളജ് ആശുപത്രിയിലും എത്തിച്ചെങ്കിലും രക്ഷിക്കാനായില്ല. കെ.എസ്.ഇ.ബി ഇലക്കൊടിഞ്ഞി സബ് സ്‌റ്റേഷൻ ക്വാർട്ടേഴ്‌സിൽ താമസിക്കുന്ന ലിന്‍റോ എബ്രഹാമിന്‍റെ കാറാണ് അപകടത്തിനിടയാക്കിയത്. രാജപ്പനെ ഇടിച്ചിട്ടശേഷം കാർ നിർത്താതെ പോയി. പാമ്പാടി പൊലീസ് നടത്തിയ അന്വേഷണത്തിൽ കാർ കസ്റ്റഡിയിൽ എടുത്തു. ഭാര്യ: പ്രസന്നകുമാരി. മക്കൾ: അശ്വതി ദാസ് (റിലയൻസ് ഹോസ്പിറ്റൽ, മുംബൈ), അതുൽ. മരുമകൻ: നിധീഷ്. സംസ്കാരം ബുധനാഴ്ച വൈകുന്നേരം മൂന്നിന് വീട്ടുവളപ്പിൽ.
