കല്ലടിക്കോട്: ഓട്ടോയും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. തച്ചമ്പാറ കൂറ്റംപാടം മേലേടത്ത് അബ്ബാസ്-സാജിദ ദമ്പതികളുടെ മകൻ അഷ്റഫലിയാണ് (24) ഞായറാഴ്ച രാത്രി ഒമ്പതിന് തൃശൂർ മെഡിക്കൽ കോളജ് ആശുപത്രിയിൽ മരിച്ചത്. ഞായറാഴ്ച രാവിലെ എട്ടിന് തച്ചമ്പാറയിൽനിന്ന് ബൈക്കിൽ ഒറ്റപ്പാലത്തെ ജോലി സ്ഥലത്തേക്ക് പോകുന്നതിനിടെ വാണിയംകുളത്ത് ഇയാൾ സഞ്ചരിച്ച ബൈക്കും ഓട്ടോയും കൂട്ടിയിടിക്കുകയായിരുന്നു. അഷ്റഫലി പോളിഷ് ജോലിക്കാരനാണ്. സഹോദരങ്ങൾ: ഹാഷിം, സുഹ്റ. മൃതദേഹം തിങ്കളാഴ്ച രാവിലെ തൃശൂർ മെഡിക്കൽ കോളജിലെ പോസ്റ്റ്മോർട്ടത്തിന് ശേഷം ബന്ധുക്കൾക്ക് കൈമാറി. എടാക്കൽ ജുമാമസ്ജിദ് ഖബർസ്ഥാനിൽ ഖബറടക്കി.
