അമ്പലപ്പുഴ: വീട്ടമ്മയുടെ മൃതദേഹം ദുരൂഹസാഹചര്യത്തില്‍ വീടിനടുത്ത പുരയിടത്തിൽ കത്തിക്കരിഞ്ഞ നിലയില്‍ കണ്ടെത്തി. പുന്നപ്ര വടക്ക് 10ാം വാർഡിൽ ആയിരംതൈവളപ്പ് ജോസിന്‍റെ ഭാര്യ ജെസിയാണ് (52) മരിച്ചത്. പറവൂര്‍ വാട്ടര്‍ വര്‍ക്സിന് സമീപം പഴയ ആസ്പിന്‍വാള്‍ കമ്പനി വളപ്പിലാണ് മൃതദേഹം കണ്ടത്. കഴിഞ്ഞ ദിവസം മുതല്‍ ജെസിയെ കാണാനില്ലെന്ന് ബന്ധുക്കള്‍ പുന്നപ്ര പൊലീസില്‍ പരാതി നല്‍കിയിരുന്നു.
ഫോറൻസിക് വിഭാഗം ശാസ്ത്രീയ പരിശോധനകള്‍ നടത്തി മൃതദേഹം ആലപ്പുഴ മെഡിക്കല്‍ കോളജ് ആശുപത്രി മോര്‍ച്ചറിയിലേക്ക് മാറ്റി. മൃതദേഹത്തിനരികില്‍നിന്ന് മണ്ണെണ്ണക്കുപ്പിയും തീപ്പെട്ടിയും പൊലീസ് കണ്ടെടുത്തു. മക്കള്‍: ജോബിന്‍, ജോഷ്മി. മരുമകന്‍: ജോമോന്‍.
