പെരുമ്പാവൂർ: ചക്ക കയറ്റാൻ പോയ പിക്അപ് വാൻ എം.സി റോഡിലെ മലമുറിയിൽവെച്ച് കെ.എസ്.ആർ.ടി.സി ബസുമായി കൂട്ടിയിടിച്ച് യുവാവ് മരിച്ചു. രണ്ടുപേർക്ക് ഗുരുതര പരിക്കേറ്റു. മലയിടംതുരുത്ത് മണ്ണൂപറമ്പിൽ വീട്ടിൽ അലിയാരുടെ മകൻ ഷിഹാബാണ് (32) മരിച്ചത്. പിക്അപ് വാനിലുണ്ടായിരുന്ന രണ്ട് അന്തർസംസ്ഥാന തൊഴിലാളികളെ ഗുരുതര പരിക്കുകളോടെ കളമശ്ശേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ചൊവ്വാഴ്ച പുലർച്ച ആറിനായിരുന്നു അപകടം. പിക്അപ് വാൻ ഓടിച്ചിരുന്നത് ഷിഹാബാണ്. ചക്ക കയറ്റാൻ മൂവാറ്റുപുഴ ഭാഗത്തേക്ക് പോകുമ്പോഴായിരുന്നു അപകടം. പ്രദേശവാസികൾ പരിക്കേറ്റവരെ ആശുപത്രിയിൽ എത്തിച്ചെങ്കിലും ഷിഹാബ് മരിച്ചു. മാതാവ്: റാബിയ. സഹോദരങ്ങൾ: സിറാജ്, ഷിബിന.
